फोटो सौजन्य: Gemini
आदिवासी भागासह बागायती पट्टयातील अनेक रुग्ण उपचार घेण्यासाठी रूग्णालयात दाखल होतात. मात्र रक्त, लघवीसह इतर तपासण्यांसाठी रुग्णांकडून हजारो रुपये उकळणाऱ्या तालुक्यातील अनेक पॅथॉलॉजी लॅब अनधिकृत आहेत. अकोले तालुक्यात केवळ दोन एमडी अधिकृत पॅथॉलॉजी लॅब असून तब्बल १९ पॅथॉलॉजी लॅब अनधिकृत आहेत. त्यामुळे डॉक्टरांना देव समजल्या जाणाऱ्या रुग्णांची तेच डॉक्टर व अनधिकृत पॅथॉलॉजी लॅबच्या संगनमताने शुद्ध फसवणूक करत आहेत.
अकोलेच्या आरोग्य विभागाला भरघोस आर्थिक डोस मिळत असल्याने ते हाताची घडी अन तोंडावर बोट ठेवून गपगुमान आहेत. अकोले तालुक्यातून ग्रामीण व शहरी भागात अनधिकृत पॅथॉलॉजी व लॅबरोटरीच्या माध्यमातून बेकायदेशीर व्यवसाय सुरू आहे. एमबीबीएस नंतर एम. डी. (पॅथॉलॉजी) किंवा डीपीबी, डीसीपी, डीएनबी (पॅथॉलॉजी) व तत्सम पदवी प्राप्त नसेलेल्यांनी दुकाने थाटली आहेत. नियमानुसार शासनमान्य डीएमएलटी पदविका प्राप्त पॅथॉलॉजी लॅब टेक्निशियन हाच रक्त, लघवी नमुना तपासणी करू शकतो. पण परवानगी नसलेले काही स्वतःचः पॅथॉलॉजीच्या स्वाक्षरीसह रिपोर्ट देत आहेत.
अकोले शहरासह राजूर, कोतुळ, शेंडी, देवठाण, ब्राम्हणवाडा, लिंगदेव, समशेरपूर परिसरात अनधिकृत पॅथॉलॉजी व लॅबोरेटरीचा सुळसुळाट झाला आहे.
संसर्गजन्य आजाराचे सकट समोर असताना अशा अनधिकृत लॅबधारकांची चौकशी करून कठोर कारवाई करण्याची मागणी होत आहे.
अकोले तालुक्यातील पॅथॉलॉजी लॅब धारकांची नोंदणी असलेल्या पॅथॉलॉजी लॅबची माहिती प्राथमिक आरोग्य केंद्रामार्फत संग्रहित करण्यात येईल. ती जिल्हा आरोग्य अधिकाऱ्यांकडे पुढील कारवाईसाठी पाठविण्यात येणार आहे. अशी माहिती अकोले तालुक्याचे वैद्यकीय अधिकारी, डॉ. शामकांत शेटे यांनी दिली.
.png "Videos"){kind=small}
