Ahilyanagar News: सुकेवाडीत पकडला तब्बल सव्वा कोटींचा गांजा, तस्कर मात्र फरार

संगमेनर शहराजवळील सुकेवाडीत तब्बल सव्वा कोटींचा गांजा पकडला गेला आहे. मात्र, या कारवाईवेळी तस्कर फरार झाला.

• सुकेवाडीत तब्बल सव्वा कोटींचा गांजा पकडला
• कारवाईवेळी तस्कर फरार
• नाशिक येथील आमली पदार्थविरोधी टास्क फोर्सची कारवाई

संगमनेर शहरालगत असणाऱ्या सुकेवाडी येथे गुरुवारी पहाटे नाशिक विभाग आमली पदार्थविरोधी टास्क फोर्स पथकाने धडक कारवाई करत तब्बल १ कोटी १४ लाख ५० हजार रुपये किमतीचा ४५६ किलो १९२ ग्रॅम वजनाचा गांजा हस्तगत केला. गांजातस्कर तुषार उत्तम पडवळ (रा. सुकेवाडी, ता संगमनेर) हा पसार झाला असून, पोलिस त्याचा कसून शोध घेत आहे. पडवळ हा कोणाला माल देत होता, कोणाकडून आणत होता, तसेच याच्यामागील खरा सूत्रधार कोण, याबाबत पोलिस चौकशी करत आहेत. टास्क फोर्सचे कॉन्स्टेबल वैभव पांढरे यांनी फिर्याद दिली.

राजकारणातील चाणक्य Sharad Pawar यांच्या Car Collection वर एकदा नजर फिरवाच

तुषार पडवळच्या घरातून चालत होते रॅकेट

संगमनेर तालुक्यातील सुकेवाडी गावात काही तरुण अमली पदार्थांची विक्री करत असून, मोठे रॅकट यात गुंतलेले असल्याची गोपनीय माहिती नाशिक विभाग आमली पदार्थविरोधी टास्क फोर्सचे पोलिस उपअधीक्षक गुलाबराव पाटील यांना समजली. ते स्वतः पथकासह सुकेवाडीत दाखल झाले. सुकेवाडी गावामध्ये तुषार पडवळ यांच्या घरातून हे गांजाचे रॅकेट चालत असल्याची पाटील यांची खात्री झाली. पडवळ याच्या घराची झडती घेतली असता ३०० किलो गांजा मिळून आला. त्यामुळे संपूर्ण घराची झडती घेण्यात आली.

टेम्पोमध्ये पाकिटे

पडवळच्या घराच्या परिसरातच एक छोटा हत्ती म्हणजेच टेम्पो उभा होता. त्याची तपासणी केली असता गांजाचे पॅकेट करून ठेवलेले आढळले. त्यावर मोठा पडदा टाकलेला होता. पडदा काढला तेव्हा टेम्पोत १५० किलो गांजाची पाकिटे मिळून आली. एवढ्या मोठ्या प्रमाणात गांजातस्करी पकडण्यात आल्यामुळे अमली पदार्थ प्रतिबंधक टास्क फोर्सचे पोलिस उपअधीक्षक गुलाब पाटील यांचे सर्वत्र कौतुक होत असून, स्थानिक पोलिसांबाबत प्रश्न उपस्थित होत आहे.

छत्रपती शिवाजी महाराजांचा इतिहास केवळ 68 शब्दांत गुंडाळला; सभागृहात झाला शाब्दिक वाद

तरुणाई ड्रग्सच्या जाळयात?

संगमनेर शहरात गांजा, ड्रग्जसारखे अमली मोठ्या प्रमाणात येऊन तरुणांना त्यात ओढले जात आहे. गुटखातस्करीसुद्धा मोठ्या प्रमाणात सुरू आहे. त्यावर निर्बंध आणण्यात संगमनेर पोलिस अपयशी ठरत असल्याचे या कारवाईवरून दिसून येत आहे, नाशिकच्या टास्क फोर्सने अमली पदार्थाची विक्री करणाऱ्यांचे मनसुबे उधळून लावण्याची मागणी संगमनेरकर करत आहेत.