Ahilyanagar News: ठराव गेला केराच्या टोकरीत! दारूबंदी असूनही राजुरीत अवैध दारू विक्री सुरु

दारूबंदी असणाऱ्या राजुरीत अवैधरित्या दारू विक्री होताना दिसत आहे. जिल्हा पोलीस अधीक्षकांनी याकडे लक्ष देत कठोर कारवाई करण्याचे आदेश दिले आहेत.

• राजुरीत अवैध दारू विक्री सुरु
• दारूबंदीचा ठरावाचा विसर
• ग्रामस्थांकडून कठोर कारवाईची मागणी

दारुबंदी असलेल्या राजूर गावात गल्ली बोळात अवैध दारु विक्रीचा व्यवसाय तेजीत आहे. अवैध दारूविक्रीसोबतच गुटका, ताडी, जुगार आदी धंदे फोफावल्याने सामान्य नागरिक त्रस्त झाले आहेत. अवैध व्यावसायिक आणि काही पोलिस अधिकारी-कर्मचाऱ्यांच्या अर्थपूर्ण संबंधामुळे राजूर पोलिस प्रशासनाचे याकडे दुर्लक्ष असल्याने जिल्हा पोलिस अधीक्षकांनी याकडे लक्ष देत कारवाई करण्याचे साकडे राजूर ग्रामस्थांनी घातले आहे. आदिवासी विभागाचे केंद्र बिंदु असलेल्या राजूर गावात सन २००५ मध्ये दारुबंदीचा ठराव होऊन सहा देशी-विदेशी दारु दुकानाचे परवाने रद्द करण्यात आले आहेत.

Ahilyanagar News: शेवगाव आणि पाथर्डीला गारपीटीने झोडपले; शेतकरी मोठ्या संकटात

अवैध धंदे आणि दारूच्या व्यसनापायी गावातील अनेकांचे संसार उद्ध्वस्त झाले. सततच्या भांडणापायी ग्रामपंचायतीने राजूर येथील अवैध धंदे बंद करण्यासोबतच परिसरातील अवैध दारू विक्री बंद करण्याचा ठराव घेतला. मात्र राजूर पोलिस आणि दारू उत्पादन शुल्क विभागाच्या वरदहस्तामुळे गावातील अवैध दारू विक्रीसोबतच गुटका, जुगार, ताडी यासारखे अवैध धंदे जोमात आले आहेत. यामुळे संतप्त गावकऱ्यांनी ग्रामसभेत अवैध दारुबंदीचा अनेकदा ठराव केला. तसेच अवैध दारु विक्री करणाऱ्यावर कारवाई करण्याच्या मागणीसाठी राजूर पोलिस ठाण्याचा उंबरठा झिजवला आहे. सामाजिक कार्यकर्ते, ग्रामस्थ, दारुबंदी कार्यकर्ते आता मोठे आंदोलन छेडण्याच्या तयारी आहेत. राजूर गावातील भर बाजारपेठेसह दिंगबर रोड, ग्रामपंचायत कार्यालयामागे अवैध दारू विक्री केली जाते.

संघटना, ग्रामस्थांचा पुढाकार हवा

अवैध दारु विक्रेते, गुटका व रेती तस्करासोबतचे पोलिस अधिकाऱ्यांचे मैत्रीपूर्ण संबंध सामान्य नागरिकांना खटकणारे आहेत. गावात चाललेल्या अवैध धंद्यांना आळा घालण्याऐवजी चालना मिळत असल्याने मुख्य सुत्रधार कोण?, कुणाकुणाचे संगनमत आहे?, याबाबत संशय व्यक्त होत आहे. वारंवार पोलिसांचे लक्ष वेधूनही फारसा काही उपयोग होताना दिसत नाही. या व्यावसायांना अंकुश लावण्यासाठी सामाजिक संघटनांसोबतच ग्रामस्थांनीही पुढाकार घेण्याची गरज आहे.

Swami Samarth Prakat Din: म्हसवड शहरात स्वामींचा प्रकटदिन उत्साहात साजरा, दर्शनासाठी मंदिरात भाविकांची अलोट गर्दी

पोलिस ठाण्यातील ऊठबस सीसीटीव्हीच्या कॅमेऱ्यात कैद

अनेकांचे संसार वाचविण्यासाठी राजूर ग्रामपंचायतने अनेकदा मासिक सभेत अवैध धंदे आणि दारूबंदीसाठी ठराव केला. सरपंच, ग्रामसचिव आणि ग्रामपंचायत सदस्यांच्या उपस्थितीत झालेल्या या ठरावाची प्रत राजूर पोलिस स्टेशनला देण्यात आली. मात्र, पोलिसांकडून अद्याप उपाययोजना झाल्या नाहीत. याउलट गावातील अवैध व्यावसायिकांची पोलिस प्रशासनाकडून पाठराखण केली जात आहे. अवैध दारू विक्री करणाऱ्यासह पोलिसांच्या मोबाईलवरील संभाषणाची चौकशी होणे गरजेचे आहे. त्याचबरोबर राजूर पोलिस ठाण्यात अवैध व्यवसायिकांची नेहमीच वर्दळ असते. त्याचे चित्रण सीसीटीव्हीमध्ये कैद झाल्याचे दिसत आहे.