अजित पवारांनी घेतले का शरद पवार व सुप्रिया सुळेंचा नाव? बारामतीमधील महारोजगार मेळाव्याला आले एकाच मंचावर

बारामती : आज बारामती शहरामध्ये राज्यातील अनेक महत्त्वाचे नेते जमले आहेत. बारामतीमध्ये पश्चिम महाराष्ट्रासाठी ‘नमो महारोजगार मेळावा’ आयोजित करण्यात आले आहे. यावेळी पवार कुटुंब एकाच मंचावर आलेले पाहायले मिळाले. खासदार शरद पवार व उपमुख्यमंत्री अजित पवार यावेळी एकमेकांशी बोलणार का याकडे सर्वांचे लक्ष लागले होते.

‘नमो महारोजगार मेळावा’ हा मागील दोन दिवसांपासून चर्चेचे कारण ठरला आहे. आज पार पडलेल्या या रोजगार मेळाव्यावेळी एकाच मंचावर मुख्यमंत्री एकनाथ शिंदे, उपमुख्यमंत्री अजित पवार, उपमुख्यमंत्री देवेंद्र फडणवीस, खासदार शरद पवार, खासदार सुप्रिया सुळे, सुनेत्रा पवार, विधानपरिषदेच्या उपसभापती निलम गोऱ्हे, दिलीप वळसे पाटील अशी अनेक मंडळी उपस्थित होती. यावेळी अजित पवार यांनी सुप्रिया सुळे व शरद पवार यांच्यासोबत बोलणे टाळले. तसेच सुप्रिया सुळे यांनी देखील अजित पवार यांच्याकडे दुर्लक्ष केले. खा. सुळे या मंचावर नेत्यांचे स्वागत करण्यासाठी पुढे आल्या. त्यांनी एकनाथ शिंदे यांचे हात जोडून स्वागत केले. पण तेवढ्या शिंदे यांच्या मागे असलेल्या अजित पवार यांनी जनतेकडे हात दाखवून अभिवादन करण्यास सुरुवात केली आणि सुप्रिया सुळे यांच्याकडे दुर्लक्ष केले. त्यानंतर सुप्रिया सुळे अजित पवार यांच्यामागून जाऊन देवेंद्र फडणवीस यांच्यासोबत बोलल्या. त्यांचेही सुळे यांनी स्वागत केले. याहीवेळेस अजित पवार आणि सुप्रिया सुळे यांनी एकमेकांशी नजरा-नजर करणे टाळले.

त्याचबरोबर सुप्रिया सुळे यांनी उद्योग मंत्री उदय सामंत आणि कौशल्य विकास मंत्री मंगलप्रभात लोढा यांच्याशीही बातचीत केली. यावेळी त्यांच्याशेजारीच अजित पवार यांच्या पत्नी सुनेत्रा पवारदेखील उपस्थित होत्या. मात्र दोघींनीही मंचावर एकमेकांशी बोलणे टाळले. मात्र सुळे यांनी दिलीप वळसे पाटील यांच्यासोबत हस्तांलोदन केले. मात्र शरद पवार यांनी वळसे पाटील यांच्यासोबत बोलणे देखील टाळले आणि ते थेट आपल्या जागेवर जाऊन बसले.

अजित पवारांनी केला भाषणात उल्लेख

नमो महारोजगार मेळावा यामध्ये पवार कुटुंबीयातील अनेक राजकारणी मंडळी उपस्थित होती. यावेळी अजित पवार हे आपल्या भाषणामध्ये प्रोटोकॉलप्रमाणे खासदार शरद पवार व खासदार सुप्रिया सुळे यांची नावं घेणार का याकडे सर्वांचे लक्ष लागले होते. उपस्थितांची नावे घेताना उपमुख्यमंत्री अजित पवार यांनी राज्यातील मंत्र्यांची नावे घेतल्यानंतर ‘आदरणीय पवार साहेब, सुप्रिया सुळे’ एवढाच नामोल्लेख केला. त्यांनी सुप्रिया सुळे यांचा खासदार म्हणून उल्लेख केला नाही. तसेच शरद पवार यांचेही पूर्ण नाव घेतले नाही. दुसरीकडे उपमुख्यमंत्री देवेंद्र फडणवीस यांनी मात्र शरद पवार आणि सुप्रिया सुळे यांचा यथोचित उल्लेख केला.