१४० बालके अतितीव्र कुपोषित! मेळघाटातील वास्तव; धारणी-चिखलदऱ्यात २,२९१ बालके आढळले
Amravati News: मेळघाटातील कुपोषणाचे विदारक वास्तव पुन्हा एकदा आकडेवारीतून समोर आले. धारणी आणि चिखलदरा आदिवासीबहुल तालुक्यांतील ० ते ६ वर्षे वयोगटातील बालकांच्या आरोग्य या तपासणीत २१ हजार ८९५ बालके कुपोषित आढळली. यामध्ये १४० बालके अतितीव्र कुपोषित कमी वजनाची असल्याची नोंद जिल्हा परिषद आरोग्य विभागाच्या आकडेवारीत झाली. त्यामुळे गतकाळातील आकडेवारीचा विचार करता मेळघाटातील बालकांचे कुपोषण रोखण्यासाठी सुरू असलेल्या उपाययोजनांचा चांगला परिणाम दिसून येत आहे. धारणी तालुक्यात ० ते ६ वर्षे वयोगटातील २१ हजार ८९५ बालकांची तपासणी करण्यात आली. त्यापैकी २० हजार ४२० बालके उंचीची आढळली. मात्र १ हजार ३८० बालके मध्यम कमी वजनाची, तर ९५ बालके तीव्र कमी वजनाची असल्याचे तपासणीत निष्पन्न झाले.(फोटो सौजन्य – istock)
धारणी तालुक्यात कुपोषित बालकांची संख्या १ हजार ४७५ इतकी आहे. चिखलदरा तालुक्यातही परिस्थिती फारशी वेगळी नाही. येथे तपासणी करण्यात आलेल्या ९ हजार ६६९ बालकांपैकी ८ हजार ९४७बालके सर्वसाधारण वजन व उंचीची आढळली. तर ६७७ बालके मध्यम कमी वजनाची आणि ४५ बालके तीव्र कमी वजनाची असल्याचे समोर आले. या तालुक्यात कुपोषित बालकांची एकूण संख्या ७२२ आहे. धारणी आणि चिखलदरा या दोन्ही तालुक्यांची आकडेवारी एकत्रित पाहता, हजारो बालकांना पोषणाच्या समस्येला सामोरे जावे लागत असून, त्यापैकी १४० बालकांची प्रकृती गंभीर श्रेणीत असल्याचे चित्र आहे.
कुपोषणावर नियंत्रण मिळविण्यासाठी शासकीय प्रयत्नांसोबतच पालकांचा सक्रिय सहभागही आवश्यक आहे. माता-पित्यांना घरच्या घरी बालकांना द्यावयाचा पौष्टिक आहार, स्वच्छतेच्या सवयी तसेच बालकांच्या आरोग्याची योग्य काळजी घेण्याबाबत माहिती दिली जात आहे. महिला व बालविकास विभाग, आदिवासी विकास विभाग, आरोग्य विभाग आणि पालक यांनी एकत्रितपणे काम करून बालकांच्या आरोग्यात कायमस्वरुपी सुधारणा घडवून आणावी, असा प्रशासनाचा प्रयत्न आहे, अशी माहिती डॉ. प्रवीण पारिसे, जिल्हा आरोग्य अधिकारी जि.प. अमरावती यांनी दिली आहे.
प्रत्येक बालक निरोगी आणि सुदृढ राहावे, हेच आमचे प्रमुख उद्दिष्ट आहे. एमएएम आणि एसयूडब्ल्यू बालकांच्या पोषणस्थितीत सुधारणा करण्यासाठी व्हिसीडीसीच्या माध्यमातून नियोजनबद्ध पद्धतीने काम केले जात आहे. बालकांना पौष्टिक आहार, आवश्यक आरोग्य सेवा, नियमित देखरेखीचा लाभ मिळावा, यासाठी अंगणवाडी व आरोग्य विभागाचे कर्मचारी समन्वयाने कार्यरत आहेत. प्रत्येक बालकाच्या प्रगतीचा नियमित आढावा आहे, अशी माहिती – ऋषिकेश लोटन पाटील, बाल विकास प्रकल्प अधिकाऱ्यांनी दिली आहे.
दरम्यान, यापूर्वीच्या सरकारी आकडेवारीनुसार। मेळघाटात अतितीव्र कुपोषित बालकांची संख्या कमी करण्यासाठी विशेष मोहिमा राबविण्यात आल्या. २०२० मध्ये ४५६ असलेली अतितीव्र कुपोषित बालकांची संख्या २०२२ मध्ये २१३ आणि मे २०२३ मध्ये २०५ पर्यंत खाली आली होती आणि आता जूनमध्ये ही संख्या १४० पर्यंत आली.
.png "Videos"){kind=small}
