पुण्याचे नवे जिल्हाधिकारी म्हणून सुहास दिवसे यांची नेमणूक; पुण्यात अधिकाऱ्यांच्या बदल्या सुरूच

पुणे : राज्यात लोकसभा निवडणुकीआधी प्रशासनात मोठे बदल होताना दिसत आहेत. काही दिवसांपूर्वीच ५८ आयपीएस अधिकाऱ्यांच्या बदल्या करण्यात आल्या होत्या. त्यानंतर आता पुन्हा प्रशासकीय अधिकाऱ्यांच्या बदल्या होताना दिसत असून, पुणे जिल्हाधिकारी यांची बदली करण्यात आली आहे. विद्यमान जिल्हाधिकारी डॉ. राजेश देशमुख यांची बदली झाली असून, त्यांच्या जागी सुहास दिवसे यांची पुणे जिल्ह्याच्या जिल्हाधिकारीपदी नियुक्ती झाली आहे.

सुहास दिवसे हे याआधी क्रीडा व युवक सेवा आयुक्तपदी कार्यरत होते. डॉ. राजेश देशमुख हे आता सुहास दिवसे यांच्या जागी क्रीडा व युवक सेवा आयुक्तपदाचा कार्यभार सांभाळतील.

त्या अगोदर दिवसे हे महिला व बालकल्याण आयुक्त म्हणून पुण्यात काम पाहत होते. ते २००५ च्या बॅचचे आयएएस अधिकारी आहेत. ते २००५ मध्ये युपीएसएसीच्या नागरी सेवा परीक्षेत देशात प्रथम आले होते. दिवसे यांच्या कारकिर्दीत हिंजवडी ते शिवाजीनगर या मेट्रोचे काम मार्गी लागले. तसेच, त्यांच्याच काळात विकास आराखडाही अंतिम टप्प्यात आला.

दरम्यान, पुण्याच्या पोलिस आयुक्तपदी अमितेश कुमार यांची नियुक्ती करण्याचे आदेश गृह विभागाकडून देण्यात आल्यानंतर रितेश कुमार यांची पदोन्नतीने राज्य राखीव पोलीस दलाच्या समादेशकपदी नियुक्ती करण्यात आली. गेल्या दोन महिन्यापासून रिक्त असलेल्या पुणे पोलिस पोलीस दलातील सह पोलीस आयुक्तपदी कोकण परिक्षेत्राचे विशेष पोलीस महानिरीक्षक प्रवीण पवार यांची नियुक्ती करण्यात आली.

विशेष पोलीस महानिरीक्षकपदी बदली

राज्यातील 59 वरिष्ठ पोलीस अधिकाऱ्यांच्या बदल्यांचे आदेश गृह विभागाने दिले होते. पुणे पोलिसांच्या गुन्हे शाखेचे अतिरिक्त पोलीस आयुक्त रामनाथ पोकळे यांची अमरावती परिक्षेत्राचे विशेष पोलीस महानिरीक्षकपदी बदली करण्यात आली. गुन्हे शाखेच्या अतिरिक्त पोलीस आयुक्तपदी राज्य राखीव दलाचे समादेशकशैलेश बलकवडे यांची नियुक्ती करण्यात आली. पुणे पोलिसांच्या उत्तर विभागाचे अतिरिक्त आयुक्त रंजनकुमार शर्मा यांची राज्य गुन्हे अन्वेषण विभागात आर्थिक गुन्हे शाखेत बदली करण्यात आली. त्यांच्या जागी मुंबईचे पोलीस उपायुक्त मनोज पाटील यांची नियुक्ती करण्यात आली

राज्यातील 17 सनदी अधिकाऱ्यांच्या बदल्या
दुसरीकडे, आगामी लोकसभा निवडणुकीच्या पार्श्वभूमीवर राज्यातील 17 सनदी अधिकाऱ्यांच्या मागील आठवड्यात बदल्या करण्यात आल्या आहेत.