प्रवाशांच्या जीवाशी खेळ सुरूच; आठ दिवसांत उपाययोजना करा, अन्यथा मनसे स्टाईल आंदोलन! हर्षद पाटील आक्रमक
मनसे विभागाध्यक्ष रितेश म्हात्रे यांनी व्हिडिओच्या माध्यमातून हा गंभीर प्रकार समोर आणला होता. रेल्वे रुळांच्या मध्यभागी बसून प्रवास करणे अत्यंत धोकादायक असून, यामुळे प्रवाशांच्या जीवाला धोका निर्माण होऊ शकतो. त्यामुळे रेल्वे प्रशासनाने या प्रकाराकडे गांभीर्याने लक्ष देऊन कायमस्वरूपी उपाययोजना कराव्यात, अशी मागणी करण्यात आली आहे.
या मागणीसाठी आज महाराष्ट्र नवनिर्माण सेनेचे डोंबिवली शहराध्यक्ष हर्षद हरिश्चंद्र पाटील यांच्या नेतृत्वाखाली मनसेच्या पदाधिकाऱ्यांनी कोपर रेल्वे स्थानकातील स्टेशन मास्तरांची भेट घेतली. यावेळी प्रवाशांच्या सुरक्षेसंदर्भात निवेदन देऊन तातडीने उपाययोजना करण्याची मागणी करण्यात आली.
रेल्वे प्रशासनाने येत्या आठ दिवसांत या गंभीर प्रश्नाची दखल घेऊन प्रत्यक्ष उपाययोजनांना सुरुवात करावी. अन्यथा कोपर रेल्वे स्थानकातील स्टेशन मास्तरांच्या कार्यालयाला मनसे स्टाईलने टाळे ठोकण्यात येईल आणि तीव्र आंदोलन छेडण्यात येईल, असा स्पष्ट इशारा हर्षद पाटील यांनी दिला आहे. प्रवाशांच्या जीवाशी सुरू असलेला हा धोकादायक प्रकार थांबवण्यासाठी रेल्वे प्रशासन नेमकी कोणती पावले उचलणार, याकडे आता प्रवाशांचे लक्ष लागले आहे.
कोपर स्थानकातील या घटनेमुळे रेल्वे प्रशासनाच्या प्रवासी सुरक्षा व्यवस्थेवर प्रश्नचिन्ह निर्माण झाले आहे. गर्दीच्या वेळेत RPF कडून नियमित गस्त घालणे, रेल्वे रुळांवर उतरणाऱ्या प्रवाशांविरोधात प्रतिबंधात्मक कारवाई करणे, उद्घोषणांच्या माध्यमातून जनजागृती करणे आणि MEMU ट्रेनमधील गर्दी नियंत्रित करण्यासाठी ठोस उपाययोजना करणे आवश्यक आहे. प्रवाशांच्या जीवाशी खेळ सुरू असताना रेल्वे प्रशासन एखादी मोठी दुर्घटना घडण्याची वाट पाहत आहे का, असा संतप्त सवाल उपस्थित केला जात आहे. कोणतीही दुर्घटना घडण्यापूर्वीच कोपर रेल्वे स्थानकातील या गंभीर प्रकाराची दखल घेऊन प्रवाशांच्या सुरक्षेसाठी तातडीने ठोस पावले उचलावीत, अशी मागणी प्रवाशांकडून केली जात आहे.
Ans: कोपर रेल्वे स्थानकात काही प्रवासी रेल्वे रुळांच्या मध्यभागी बसून प्रवास करत असल्याचा धक्कादायक व्हिडिओ सोशल मीडियावर व्हायरल झाला होता. त्यामुळे प्रवाशांच्या सुरक्षेचा प्रश्न ऐरणीवर आला आहे.
Ans: मनसेने रेल्वे प्रशासनाला आवश्यक उपाययोजना करण्यासाठी आठ दिवसांचा अल्टिमेटम दिला आहे.
Ans: आठ दिवसांत ठोस उपाययोजना सुरू न झाल्यास कोपर रेल्वे स्थानकातील स्टेशन मास्तरांच्या कार्यालयाला मनसे स्टाईलने टाळे ठोकून तीव्र आंदोलन छेडण्यात येईल, असा इशारा शहराध्यक्ष हर्षद पाटील यांनी दिला आहे.






