मंगळवार, 10 नोव्हेंबर 2026
शेतकऱ्यांच्या बांधावर जाऊन शेतीची पाहणी (Photo - Social Media)
रायगड : राज्यातील दुष्काळसदृश परिस्थिती आणि शेतकऱ्यांच्या अडचणींच्या पार्श्वभूमीवर सांस्कृतिक कार्यमंत्री ॲड. आशिष शेलार यांनी महत्त्वाचं वक्तव्य केलं आहे. पनवेल तालुक्यातील शेतकऱ्यांनाही दुष्काळग्रस्त घोषित करण्यासाठी आपण मंत्रिमंडळात जोरदार मागणी करणार असल्याचं त्यांनी स्पष्ट केलं. रायगडमधील कलेगाव येथे आयोजित दिवाळी स्नेहमेळाव्यात ते बोलत होते. यावेळी त्यांनी आदिवासी बांधवांसोबत दिवाळीचा फराळ घेतला आणि त्यांच्या समस्या जाणून घेतल्या. (Ashish Shelar)
राज्यातील 305 तालुक्यांमध्ये पावसाच्या कमतरतेमुळे दुष्काळसदृश परिस्थिती निर्माण झाली आहे. अशा परिस्थितीत शेतकऱ्यांना दिलासा देण्यासाठी मुख्यमंत्री देवेंद्र फडणवीस यांनी पात्र शेतकऱ्यांच्या खात्यात दिवाळीपूर्वी प्रत्येकी 5 हजार रुपयांची मदत जमा केली आहे. पनवेल तालुक्यातील शेतकऱ्यांनाही दुष्काळग्रस्त घोषित करण्यासाठी आपण प्रयत्न करणार असल्याचं आशिष शेलार यांनी सांगितलं.
या कार्यक्रमात आशिष शेलार यांनी आखाडवाडी आदिवासी वाडीतील रोशन वाघमारे यांच्या घरी सहकुटुंब भेट दिली. तिथे त्यांनी आदिवासी बांधवांसोबत दिवाळीचा फराळ घेतला. यावेळी आपल्या आईच्या निधनानंतर गेल्या 10 ते 12 वर्षांत दिवाळीचा आनंद मनापासून अनुभवता आला नव्हता. मात्र, आदिवासी बांधवांसोबत फराळ करताना बालपणीच्या आठवणी जाग्या झाल्या आणि अनेक वर्षांनंतर दिवाळीचा खरा आनंद मिळाल्याची भावुक भावना त्यांनी व्यक्त केली.
आदिवासी समाजाची लोककला, पारंपरिक नृत्य, गायन आणि निसर्गाशी असलेलं नातं जपण्याची गरजही त्यांनी यावेळी व्यक्त केली. आदिवासी बांधवांच्या सर्वांगीण विकासासाठी विशेष योजना राबविण्यात येतील, असं आश्वासनही त्यांनी दिलं.
या स्नेहमेळाव्यात जिल्हा परिषदेच्या 15 टक्के निधीतून सात आदिवासी वाड्यांमधील 389 कुटुंबांना शेतीपूरक अवजारांचं वाटप करण्यात आलं. आमदार प्रशांत ठाकूर यांनीही आदिवासी आणि दुर्गम भागातील शेवटच्या घटकापर्यंत सरकारी योजनांचा लाभ पोहोचवण्यावर भर दिला.
कार्यक्रमानंतर आशिष शेलार यांनी शिरढोण येथील शेतात जाऊन शेतीची पाहणी केली. दुष्काळामुळे अडचणीत आलेल्या शेतकऱ्यांशी संवाद साधत त्यांच्या समस्या जाणून घेतल्या. यावेळी आमदार महेश बालदी यांच्यासह अनेक लोकप्रतिनिधी आणि प्रशासकीय अधिकारी उपस्थित होते.
आदिवासी बांधवांसोबत दिवाळी साजरी करण्यापासून ते शेतकऱ्यांच्या बांधावर जाऊन त्यांच्या अडचणी जाणून घेण्यापर्यंत आशिष शेलार यांचा हा रायगड दौरा चर्चेत आला आहे. आता पनवेलच्या शेतकऱ्यांना दुष्काळग्रस्त घोषित करण्याबाबत मंत्रिमंडळात काय निर्णय होतो, याकडे लक्ष लागलं आहे.
Ans: पनवेल तालुक्यातील शेतकऱ्यांनाही दुष्काळग्रस्त घोषित करावं, अशी मागणी मंत्रिमंडळात करणार असल्याचं आशिष शेलार यांनी सांगितलं.
Ans: जिल्हा परिषदेच्या 15 टक्के निधीतून सात आदिवासी वाड्यांमधील 389 कुटुंबांना शेतीपूरक अवजारांचं वाटप करण्यात आलं.
Ans: रायगड जिल्ह्यातील पनवेल तालुक्यातील कलेगाव ग्रामपंचायत हद्दीतील आखाडवाडी आदिवासी वाडीमध्ये त्यांनी दिवाळी फराळाचा आनंद घेतला.
