Pune Election : भाजपकडून बहुतेक विद्यमानांना घरचा रस्ता; नवाेदित चेहऱ्यांना संधी देण्याचा प्रयाेग

उमेदवारी अर्ज दाखल करण्याचे शेवटचे दिवस शिल्लक असतानाच भाजपने थेट यादी जाहीर न करता उमेदवारांना अर्ज दाखल करण्याच्या सुचना दिल्या आहेत. यात भाजपने बहुतेक विद्यमानांना घरचा रस्ता दाखविल्याचे दिसते.

• भाजपकडून बहुतेक विद्यमानांना घरचा रस्ता
• अनेक कार्यकर्त्यांमध्ये नाराजी
• नवाेदित चेहऱ्यांना संधी देण्याचा प्रयाेग

पुणे : उमेदवारी अर्ज दाखल करण्याचे शेवटचे दिवस शिल्लक असतानाच भाजपने थेट यादी जाहीर न करता उमेदवारांना अर्ज दाखल करण्याच्या सुचना दिल्या आहेत. यात भाजपने बहुतेक विद्यमानांना घरचा रस्ता दाखविल्याचे दिसते. यामुळे पक्षात नाराजी निर्माण झाली आहे. महापालिका निवडणुकीपुर्वी भाजपकडून प्रभाग निहाय सर्वेक्षण केले गेले हाेते. तसेच प्रत्येक नगरसेवकाच्या कामाचा आढावा घेण्यात आला हाेता. या सर्वांचा विचार करून इच्छुकांना उमेदवारीची संधी दिली गेल्याचे दिसते.

भाजपकडून याेगेश समेळ, दिपक पाेटे, माधुरी सहस्त्रबुद्धे, प्रसन्न जगताप, राजेश येनपुरे, गायत्री खडके, श्रध्दा प्रभुणे, जयंत भावे, आरती काेंढरे, शंकर पवार आदी विद्यमान नगरसेवकांना उमेदवारी नाकारण्यात आल्याची प्राथमिक माहीती पुढे येत आहे. अद्याप भाजपकडून उमेदवारांची अधिकृत यादी जाहीर केली गेली नाही. विद्यमान नगरसेवकांपैकी श्रीनाथ भिमाले, गणेश बिडकर या वरीष्ठ नगरसेवकांची नावे यादीत समाविष्ट असुन, काही विद्यमान नगरसेवकांच्या पत्नी, मुलगा, मुलगी यांना संधी दिली गेली आहे.

एकीकडे भाजपने विद्यमान नगरसेवकांना उमेदवारी नाकारताना जुन्या कार्यकर्त्यांना संधी देण्याचा प्रयत्न केला आहे. यामध्ये सुनील पांडे, निलेश काेंढाळकर, नितीन पंडीत ( पत्नीला उमेदवारी ) आदींना संधी दिल्याचे दिसते. दुसऱ्या पक्षातून भाजपमध्ये आलेले बाळा ओसवाल, विशाल धनकवडे, सचिन दाेडके, सायली वांंजळे आदींना संधी दिली गेली आहे. भाजपने नाराजी टाळण्यासाठी यादी जाहीर न करता थेट एबी फाॅर्मच देण्याचा पर्याय निवडला.

भाजपने १०० जागांपैकी बहुसंख्य जागांवर उमेदवार निश्चित करत त्यापैकी ८० जणांना थेट एबी फॉर्म दिल्याची माहिती समोर आली आहे. दिवंगत नेते गिरीश बापट आणि मुक्ता टिळक यांच्या कुटुंबीयांना महापालिका निवडणुकीत संधी देण्याचा दिलेला शब्द भाजपने पाळला आहे. कुणाल टिळक यांना तसेच गिरीश बापट यांच्या सून स्वरदा बापट यांना प्रभाग क्रमांक २६ मधून उमेदवारी देण्यात आली असून, त्यांना एबी फॉर्मही वितरित करण्यात आला आहे.