पुणे : भाजपच्या राष्ट्रीय सचिव पंकजा मुंडे यांच्यावर पक्षाने पुण्यातील जबाबदारी टाकली असली तरी मुंडे यांना पक्षांतर्गत अनेक आव्हानांवर मार्ग काढावा लागणार असे आत्ताच दिसू लागले आहे. लोकसभा निवडणुकीतील हिशेब पूर्ण करण्याचा पक्षातील पदाधिकाऱ्यांचा विचार असून, वडगाव शेरीतून आमदार सुनील टिंगरे यांच्यासाठी काम करणार नसल्याची भूमिका घेतली आहे. लोकसभा निवडणुकीत आमदार टिंगरे यांनी भाजपचे काम केलेले नाही. त्यामुळे विधानसभा निवडणुकीत आम्हीही त्यांचे काम करणार नाही, अशी भूमिका पदाधिकाऱ्यांनी मांडली.
मुंडे यांनी वडगाव शेरी येथील भाजप पदाधिकाऱ्यांची बैठक घेतली. बैठकीवळी भाजपचे शहराध्यक्ष धीरज घाटे, जगदीश मुळीक, स्थानिक माजी नगरसेवक आणि पदाधिकारी उपस्थित होते. यावेळी भाजप पदाधिकाऱ्यांनी राष्ट्रवादीच्या आमदारांविरोधात आपली खदखद व्यक्त केली. आमदार सुनील टिंगरे युतीधर्म पाळत नसल्याचा थेट आरोप येथील माजी आमदार जगदीश मुळीक यांनी काही दिवसांपूर्वी केला होता. त्यानंतर मुंडेंसमोर पदाधिकाऱ्यांनी टिंगरे यांच्यावर आरोप केले. आपले असलेले आक्षेप लेखी पत्रातून मुंडे यांच्यापर्यंत पोहचवण्यात आले. तसेच वडगाव शेरी मतदारसंघ भाजपला द्यावा, अशी मागणी पदाधिकाऱ्यांनी मुंडे यांच्याकडे केली.
लोकसभा निवडणुकीत विरोधकांनी संविधान बदलाचे फेक नेरिटीव्ह पसरवून काही प्रमाणात यश मिळवले. आता मात्र जनता खोट्या प्रचाराला बळी पडणार नाही, असा विश्वास कार्यकर्त्यांना देत लाडकी बहीण, तसेच युती सरकारच्या इतर योजना जनतेपर्यंत जाऊन पोहोचवा, असा सल्ला मुंडे यांनी बैठकीतील पदाधिकाऱ्यांना दिला.
त्यानंतर बोलताना मुंडे म्हणाल्या, आयुष्यभर ज्या राष्ट्रवादी काँग्रेसला विरोधक मानले त्यांना सोबत घ्यावे लागले. सत्तेसाठी असे तह करावे लागतात. वडगाव शेरीत भाजपची मोठी ताकद असल्यामुळे हा मतदारसंघ भाजपला देण्याची पदाधिकाऱ्यानी केलेली मागणी नैसर्गिक आहे. परंतु कोणती जागा कोणाला सोडायची याचा निर्णय वरिष्ठ घेतील.
.png "Videos"){kind=small}
