गॅस सिलिंडरचा वाढता काळाबाजार, प्रशासनाचे दुर्लक्ष की संगनमत? ‘या’ भागातून सिलिंडर आणून विक्री

वाढत्या मागणीचा गैरफायदा घेत काही बेकायदेशीर विक्रेते अवैध घरगुती गॅस सिलिंडरचा व्यवसाय उघडपणे करत आहेत. यामुळे भविष्यात मोठ्या दुर्घटनेची शक्यता नाकारता येत नाही.

शिरवळ/ जीवन सोनवणे : शिरवळ आणि परिसरातील अवैध गॅस सिलेंडर विक्रीचा मुद्दा दिवसेंदिवस गंभीर होत चालला आहे. शिरवळ औद्योगिकीकरणामुळे वेगाने विस्तारत आहे. लोकसंख्याही वाढत आहे. मात्र, वाढत्या मागणीचा गैरफायदा घेत काही बेकायदेशीर विक्रेते अवैध घरगुती गॅस सिलिंडरचा व्यवसाय उघडपणे करत आहेत. सर्वात चिंतेची बाब म्हणजे, प्रशासनाने वेळोवेळी कारवाईचे आदेश दिले असले तरी, प्रत्यक्षात या बेकायदेशीर व्यवहारावर कुठलीही ठोस कारवाई झालेली नाही. परिणामी, रहिवाशांमध्ये नाराजीचा सूर उमटत आहे आणि भविष्यात मोठ्या दुर्घटनेची शक्यता नाकारता येत नाही.

शिरवळ परिसरात अधिकृत गॅस वितरक असतानाही मोठ्या प्रमाणावर बेकायदेशीर गॅस सिलिंडर विक्री होत आहे. भोर, लोणंद, फलटण या भागांतून मोठ्या संख्येने घरगुती गॅस सिलिंडर आणले जातात आणि वाढीव दराने ग्राहकांना विकले जातात. विशेष म्हणजे, हे सिलिंडर गॅस कनेक्शन नसलेल्या ग्राहकांनाही दिले जात असल्याने सुरक्षा धोक्यात आली आहे. सर्वसामान्य नागरिकांना अधिकृत गॅस कनेक्शनसाठी नियम आणि प्रतीक्षा यांचा सामना करावा लागतो. मात्र, हे अवैध विक्रेते कोणत्याही नियमांचे पालन न करता, हवे तेव्हा आणि हव्या त्या किंमतीत गॅस सिलिंडर विकत आहेत. परिणामी, अधिकृत गॅस वितरण यंत्रणेवरही परिणाम होत आहे.

सुरक्षेचा मोठा धोका, प्रशासन झोपेत?

बेकायदेशीर सिलिडरचा साठा मोठ्या प्रमाणावर रहिवासी भागात, दुकानांमध्ये आणि गोदामांमध्ये अनधिकृतरित्या केला जात आहे. कोणतीही सुरक्षा उपाययोजना न करता सिलिंडर हाताळले जात असल्याने कुठल्याही क्षणी मोठा अपघात होऊ शकतो. गॅस सिलिंडरचा स्फोट हा महाविनाशकारी ठरू शकतो. एकच चुकीची हाताळणी किंवा गळती मोठ्या आगीला कारणीभूत ठरू शकते. दुर्घटना घडल्यास अनेक निष्पाप नागरिकांचे प्राण जाऊ शकतात. त्यामुळे प्रशासनाने तातडीने कारवाई करणे अत्यावश्यक आहे.

प्रशासनाचा सुस्तपणा की राजकीय हस्तक्षेप?

या गंभीर समस्येवर नागरिक आणि सामाजिक कार्यकर्ते वेळोवेळी आवाज उठवत असले तरी प्रशासनाची कोणतीही ठोस हालचाल दिसून येत नाही. महसूल प्रशासन, पोलीस विभाग, आणि गॅस कंपन्यांचे अधिकारी यांनी जर ठाम भूमिका घेतली असती, तर हा अवैध व्यवसाय कधीच बंद झाला असता. मात्र, यामागे मोठे राजकीय आणि आर्थिक हितसंबंध गुंतले आहे का? असा प्रश्न उपस्थित हाेत आहे. स्थानिक प्रभावशाली मंडळींच्या आशीर्वादाने हा अवैध व्यवसाय बिनधास्त सुरू आहे. काही वेळा महसूल प्रशासन किंवा पोलिसांनी कारवाई केली, तरीही काही दिवसांतच हे बेकायदेशीर व्यवसाय पुन्हा सुरू होतात. त्यामुळे प्रशासनाच्या भूमिकेवर मोठा प्रश्नचिन्ह निर्माण झाला आहे.

अवैध गॅस विक्रेत्यांचे खुलेआम धाडस

अवैध गॅस सिलेंडर विक्रेत्यांमध्ये कोणताही भीतीभाव दिसून येत नाही. उलट, “प्रशासन आमच्या खिशात आहे,” असे ते बिनधास्त म्हणताना दिसतात. जर हे सत्य असेल, तर ही बाब अत्यंत गंभीर आहे. गॅस सिलेंडर विक्रीसारखा संवेदनशील व्यवसाय भ्रष्टाचाराच्या विळख्यात सापडल्यास, त्याचे परिणाम भयंकर असू शकतात.

लोकांनीही सावधगिरी बाळगणे आवश्यक

अवैध गॅस विक्रेत्यांविरोधात कारवाई करण्यासाठी प्रशासनाने जबाबदारी स्वीकारली पाहिजे, पण नागरिकांनीही सजग राहण्याची गरज आहे. सुलभतेच्या नावाखाली बेकायदेशीर गॅस खरेदी करणे हे भविष्यात मोठ्या संकटाला निमंत्रण देण्यासारखे आहे. नागरिकांनी अशा घटनांची माहिती त्वरित प्रशासनाला द्यावी आणि अधिकृत गॅस वितरण व्यवस्थेवर विश्वास ठेवावा. प्रशासनाने जर योग्य ती कारवाई केली आणि नागरिकांनी सहकार्य केले, तरच या संकटाला आळा घालता येईल.

आता तरी प्रशासनाने पावले उचलावीत

अवैध गॅस सिलेंडर विक्रीमुळे शिरवळ आणि परिसरात मोठा धोका निर्माण झाला आहे. भविष्यात अनर्थ टाळायचा असेल, तर प्रशासनाने तातडीने कठोर पावले उचलली पाहिजेत. महसूल प्रशासन, पोलीस आणि गॅस वितरकांनी संयुक्त कारवाई करून हे बेकायदेशीर व्यवहार बंद करणे अत्यंत गरजेचे आहे. जर वेळेत योग्य ती कारवाई झाली नाही, तर शिरवळमध्ये मोठ्या अपघाताला तोंड द्यावे लागू शकते. त्यामुळे प्रशासनाने तत्काळ हालचाल करून, नागरिकांच्या सुरक्षेसाठी योग्य ती उपाययोजना करावी. प्रशासनाच्या हलगर्जीपणामुळे निष्पाप जीव धोक्यात येऊ नयेत, हीच नागरिकांची कळकळीची मागणी आहे.