पुण्यात घरगुती गॅस सिलिंडर ब्लॅकने
पुणे : इराण-अमेरिका युद्धामुळे गॅस सिलेंडर पुरवठा प्रभावित होणार असल्याच्या अफवांमुळे शहरात बाजारात खळबळ उडाली आहे. परिणामी, घरगुती गॅस सिलिंडरची मागणी अचानक वाढल्याने काही ठिकाणी तुटवड्यासारखी परिस्थिती निर्माण होत आहे. याचा फायदा घेत काही ठिकाणी काळाबाजार सुरू झाल्याचे समोर आले आहे. सध्या घरगुती गॅस सिलिंडरची अधिकृत किंमत सुमारे ९०० रुपये असताना काळ्या बाजारात तोच सिलिंडर तब्बल २२०० रुपयांपर्यंत विकला जात असल्याच्या तक्रारी नागरिकांकडून होत आहेत.
अनेक ग्राहकांनी गॅस एजन्सीकडून सिलेंडर उशिरा मिळत असल्याची तसेच वाढत्या मागणीमुळे वितरणात अडचणी येत असल्याची नाराजी व्यक्त केली आहे. व्यावसायिक गॅस सिलिंडरचा पुरवठा विस्कळीत झाल्याने हॉटेल, ढाबे, खाणावळी तसेच खाद्यपदार्थ विक्री करणाऱ्या छोट्या-मोठ्या व्यावसायिकांनाही मोठ्या अडचणींचा सामना करावा लागत आहे. व्यवसाय बंद ठेवण्यापेक्षा अधिक दराने सिलिंडर खरेदी करून कामकाज सुरू ठेवण्याची वेळ काही व्यावसायिकांवर आली आहे.
हेदेखील वाचा : Strait of Hormuz Tension : आखातात 23000 भारतीय खलाशी, होमुर्जच्या सामुद्रधुनीत 24 जहाजे, केंद्राने परिस्थितीचा दिला आढावा
दरम्यान, भविष्यात गॅसची कमतरता भासेल या भीतीने अनेक नागरिक आधीच सिलिंडरची बुकिंग करत आहेत. काहींना तातडीची गरज नसतानाही अतिरिक्त सिलिंडरची बुकिंग केल्याने गॅस एजन्सींवर ताण वाढला आहे. अनेक ठिकाणी एजन्सीबाहेर गर्दी व गोंधळाची स्थिती निर्माण झाली असून, काही जणांकडून सिलिंडरचा साठा करून जास्त दराने विक्री केली जात असल्याचेही समोर आले आहे. काही व्यावसायिक प्रतिष्ठाने नागरिकांकडून घरगुती सिलिंडर खरेदी करून त्याचा वापर करत असल्याचीही माहिती मिळत आहे.
विशेष पथके कार्यरत
गॅस सिलेंडरच्या काळाबाजारावर आळा घालण्यासाठी जिल्हा प्रशासनाने कडक पावले उचलली आहेत. प्रत्येक तहसीलमध्ये एक तपास पथक नियुक्त करण्यात आले असून, जिल्हास्तरावर दोन विशेष पथके कार्यरत करण्यात आली आहेत.
तपास पथकाकडून पडताळणी सुरु
तपास पथके गॅस एजन्सींमधील उपलब्ध साठा तसेच ग्राहकांची प्रत्यक्ष मागणी याची पडताळणी करत आहेत. ज्या ठिकाणी गॅस सिलेंडरचा वापर संशयास्पदरीत्या अधिक दिसून येईल, त्या ठिकाणी छापे टाकण्यात येणार आहेत. नागरिकांनी अफवांवर विश्वास न ठेवता अनावश्यक सिलिंडर बुकिंग टाळावे.
– महेश सुधालकर, जिल्हा पुरवठा अधिकारी
.png "Videos"){kind=small}
