Pune Accident: पुण्यात पुन्हा ‘ड्रंक अँड ड्राइव्ह’; भर वस्तीत 12 जणांना उडवले, सदाशिव पेठेतील घटना

शनिवारी सायंकाळी पावणे सहाच्या सुमारास सदाशिव पेठेतील निबाळकर सायकल मार्ट शेजारील साई हॉटेलच्या चहाच्या टपरीवर हे सर्व चहा पीत उभारलेले होते.

पुणे/अक्षय फाटक: पुण्यातून एक मोठी बातमी समोर येत आहे. पुण्याच्या मध्यवर्ती भागात असणाऱ्या भावे शाळेजवळ एका कारने 12 जणांना उडवले आहे. घटनेची माहिती मिळताच विश्रामबाग पोलिस ठाण्याचे अधिकारी घटनास्थळी दाखल झाले आहेत. एक ठिकाणी चहा पिण्यासाठी आले असताना या 12 विद्यार्थ्याना भरधाव कारने उडवल्याची घटना घडली आहे. यामध्ये 2 विद्यार्थी स्पर्धा परीक्षेचे अभ्यास करणारे आहेत.

कल्याणीनगरमधील ‘ड्रंक अँड ड्राइव्ह’ म्हणून ओळखला जाणारा पोर्षे अपघातानंतर आता पुण्याच्या मध्यभागात ड्रंक अँड ड्राइव्हचे प्रकरण घडले असून, एका मद्यपी चालकाने भरधाव वेगात चहाच्या टपरीवर थांबलेल्या तरुण-तरुणी अश्या तबल १२ जणांना उडवल्याची खळबळजनक घटना घडली. हा भीषण अपघात सायंकाळी पावणे सहाच्या सुमारास घडला. यातील दोघे गंभीर जखमी असून, इतरांवर प्राथमिक उपचारकरून सोडण्यात आले. याप्रकरणी पोलिसांनी चालक आणि त्याच्या शेजारी बसलेल्या मित्राला पकडले आहे.

याप्रकरणी पोलिसांनी कारचालक जयराम शिवाजी मुळे (वय २७) याच्यासह गाडीत बसलेला मित्र राहुल गोसावी या दोघांना ताब्यात घेतले आहे. त्यांची ससून रुग्णालयात वैद्यकीय तपासणी करण्यास नेण्यात आले असल्याची माहिती पोलिसांनी दिली.

याअपघातात अविनाश दादासाहेब फाळके (वय ३०, रा. माळशिरस सोलापूर), प्रथमेश पांडुरंग पतंगे (वय २६), संदीप सुनील खोपडे (२८), सोनाली सुधाकर घोळवे (वय ३०), मंगेश आत्माराम सुरवसे (३३) तसेच अमित अशोक गांधी (वय ४५) समीर श्रीपाद भाकलीकर (वय ४५), सोमनाथ केशव मेरुकर (वय २८) प्रशांत ब्रह्मदेव बंडगर (वय३०) अशी जखमी झालेल्याची नावे असून, इतर तिघांची नावे समजू शकलेले नाही. दरम्यान यातील दोघांना रुग्णालयात उपचारासाठी दाखल करण्यात आले आहे. त्यांच्यावर उपचार सुरू असून, त्यांची प्रकृती स्थिर असल्याचे सांगण्यात आले. तर या 9 जणांना प्राथमिक उपचार करून घरी सोडण्यात आले आहे.

माहितीनुसार, शनिवारी सायंकाळी पावणे सहाच्या सुमारास सदाशिव पेठेतील निबाळकर सायकल मार्ट शेजारील साई हॉटेलच्या चहाच्या टपरीवर हे सर्व चहा पीत उभारलेले होते. चहा पीत असताना आरोपी जयराम हा मद्याच्या नशेत भरधाव कार घेऊन जात होता. त्यावेळी त्याचे कारवरील नियंत्रण सुटले आणि त्याने चहा पिणाऱ्या या 12 जणांना उडवले. कारचा वेग इतका होता की त्याने उडवत पुढे जाऊन गाडी एका भीतीला उडवले. त्यानंतर नागरिकांनी या चालकाला पकडले तसेच जखमीना रुग्णालयात दाखल केले. या घटनेची माहिती मिळताच विश्रामबाग पोलिसांनी येथे धाव घेतली. चालक जयराम याला ताब्यात घेतले.