सिल्लोडच्या ९२ हजार डिजिटल सातबारांना पूर्ण कायदेशीर मान्यता; शेतकऱ्यांचा तलाठी कार्यालयातील हेलपाटा थांबणार

Digital 7/12 in Sillod: राज्य सरकारने सिल्लोड तालुक्यातील ९२ हजार डिजिटल ७/१२ उताऱ्यांना पूर्ण कायदेशीर मान्यता दिली आहे. यामुळे शेतकऱ्यांचा तलाठी कार्यालयातील फेरा थांबणार असून डिजिटल स्वाक्षरी असले.

 

 

• सिल्लोड तालुक्यात ९२ हजार शेतकऱ्यांचा समावेश
• वेळ, पैसा वाचण्यास होईल मदत
• डिजिटल सातबारांना मिळणार कायद्याचे पूर्ण संरक्षण!

Sillod Digital 7/12 Marathi News: राज्य सरकारने घेतलेल्या एका महत्त्वपूर्ण निर्णयामुळे सिल्लोड तालुक्यातील शेतकरी आणि भूमिपुत्रांना मोठा दिलासा मिळाला आहे. डिजिटल ७/१२, ८-अ आणि फेरफार उताऱ्यांना आता पूर्ण कायदेशीर मान्यता मिळाली आहे. या निर्णयामुळे सिल्लोड तालुक्यातील ९२ हजार डिजिटल सातबारांना कायद्याचे पूर्ण संरक्षण मिळाले आहे.

तलाठ्याच्या सहीची गरज संपली

सिल्लोड तालुक्यात एकूण खातेदारांची संख्या ९२,८४९ एवढी आहे. दोन गटात जमिनी असलेल्या शेतकऱ्यास एकच खातेदार मानल्यास ही संख्या ८२,२३५ होते. या सर्व सातबारांना डिजिटल स्वाक्षरी (Digital Signature) देण्यात आली आहे. या निर्णयामुळे आता तलाठ्याच्या सही-शिक्क्याची गरज संपुष्टात आली असून, शेतकऱ्यांना केवळ १५ रुपयांमध्ये अधिकृत उतारा ऑनलाइन उपलब्ध होणार आहे. डिजिटल स्वाक्षरी, क्यूआर कोड आणि १६ अंकी पडताळणी क्रमांक असलेले ७/१२, ८-अ व फेरफार उतारे आता पूर्णपणे वैध ठरले आहेत.

सर्व शासकीय कामांसाठी स्वीकार्य

हा निर्णय सिल्लोड तालुक्यातील शेतकऱ्यांसाठी विशेषतः फायदेशीर ठरणार आहे, कारण आतापर्यंत सातबाराची नक्कल मिळवणे ही एक मोठी डोकेदुखी ठरत होती. एका तलाठ्याकडे अनेक गावांचा पदभार असल्यामुळे अनेक तलाठी सजांमध्ये ‘झिरो तलाठ्यां’ची नियुक्ती केली जात होती.

हे डिजिटल दस्तऐवज सर्व सरकारी, निमसरकारी, बँकिंग आणि न्यायालयीन कामांसाठी पूर्णपणे स्वीकार्य असतील. उदाहरणार्थ, बँकेत कर्ज मिळवण्यासाठी, सरकारी योजनांसाठी अर्ज करताना किंवा न्यायालयीन खटल्यांमध्ये हे डिजिटल सातबारे सादर करता येतील. डिजिटल स्वाक्षरीमुळे दस्तऐवजांची सुरक्षा वाढेल आणि त्यामध्ये कोणत्याही प्रकारची छेडछाड होणार नाही.

जिल्हा प्रशासनाच्या माहितीनुसार, सिल्लोड तालुक्यातील ४० टक्के सातबारे सध्या डिजिटल स्वरूपात उपलब्ध आहेत. उर्वरित सर्व्हे क्रमांकांसाठीही लवकरच डिजिटलीकरणाची प्रक्रिया गतिमान होण्याची अपेक्षा आहे. पारंपरिक सातबऱ्यांमध्ये होणाऱ्या त्रुटी आणि विलंब यामुळे टाळता येईल.

हे देखील वाचा: Digital 7/12 ला कायदेशीर मान्यता; महसूल मंत्री चंद्रशेखर बावनकुळे यांचा मोठा निर्णय

जमीन व्यवहार अधिक पारदर्शक, जलद होतील

• या निर्णयाचे स्वागत सिल्लोड तालुक्यातील शेतकरी संघटनांनी केले असून, त्यांचा असा विश्वास आहे की यामुळे ग्रामीण भागातील भूमी व्यवहार अधिक पारदर्शक आणि जलद होईल. जिल्हा प्रशासनानेही या प्रक्रियेची अंमलबजावणी तात्काळ सुरू करण्याचे निर्देश दिले आहेत.
• सिल्लोडसारख्या तालुक्यात, जेथे शेती हा मुख्य व्यवसाय आहे, डिजिटल सातबारांची व्याप्ती वाढवून शेतकऱ्यांना अधिक सक्षम बनवण्यासाठी प्रयत्न सुरू आहेत.
• या निर्णयामुळे सिल्लोड तालुक्यातील डिजिटल सातबारांची संख्या लवकरच वाढेल आणि तालुका पूर्णपणे डिजिटल सातबारा प्रणालीकडे वाटचाल करेल, अशी आशा आहे. शेतक-यांनी आपल्या जवळच्या तलाठी यांच्याशी संपर्क साधून डिजिटल सातबारा मिळवण्याचा लाभघ्यावा, असे आवाहन प्रशासनाने केले आहे.

डिजिटल ७/१२ उतारा मिळवण्याची सोपी प्रक्रिया

पायरी १: संकेतस्थळाला भेट द्या

तुमच्या कॉम्प्युटर किंवा मोबाईलवर ‘महाभूलेख’ (Mahabhulekh) किंवा ‘डिजिटल सातबारा’ या संकेतस्थळाला भेट द्या:

(संकेतस्थळ: https://digitalsatbara.mahabhumi.gov.in/)

पायरी २: लॉगिन आणि ठिकाण निवडा

• संकेतस्थळावर ‘डिजिटल स्वाक्षरी सातबारा’ हा पर्याय निवडा.
• येथे तुमचा लॉगिन आयडी आणि पासवर्ड टाकून लॉगिन करा. (नोंदणी केली नसल्यास ‘नवीन वापरकर्ता नोंदणी’ करून घ्यावी.)
• लॉगिन झाल्यावर, तुम्हाला ज्या जमिनीचा सातबारा हवा आहे, तो जिल्हा (District), तालुका (Taluka) आणि गाव (Village) निवडावा लागेल.

पायरी ३: सातबारा शोधून निवडा

गाव निवडल्यानंतर, तुमचा सातबारा उतारा शोधण्यासाठी खालीलपैकी कोणताही एक पर्याय निवडा:

• सर्वे नंबर / गट नंबर: जमिनीचा गट क्रमांक किंवा सर्वे नंबर टाका.
• नावानुसार शोध: खातेदाराचे पहिले नाव, मधले नाव, आडनाव किंवा संपूर्ण नाव टाका.

योग्य पर्याय निवडून शोध (Search) बटणावर क्लिक करा.

पायरी ४: शुल्क भरा (पेमेंट)

• तुमच्या जमिनीचा सातबारा क्रमांक दिसल्यावर त्यावर क्लिक करा.
• डिजिटल सातबारा उताऱ्यासाठी ₹१५ इतके शुल्क भरावे लागते.
• ‘पेमेंट’ (Payment) पर्यायावर क्लिक करून डेबिट कार्ड/क्रेडिट कार्ड/UPI/नेट बँकिंगद्वारे हे शुल्क भरा.

पायरी ५: सातबारा डाउनलोड करा

• शुल्क भरल्यानंतर, तुमच्या स्क्रीनवर डिजिटल स्वाक्षरी केलेला (Digitally Signed) सातबारा उतारा उपलब्ध होईल.
• तुम्ही तो PDF फॉरमॅट मध्ये डाउनलोड करू शकता.
• या उताऱ्यावर क्यूआर कोड (QR Code) असतो, जो त्याची सत्यता पडताळण्यासाठी वापरला जातो.

या सोप्या प्रक्रियेने तुम्ही कोणत्याही सरकारी कार्यालयात न जाता तुमचा वैध आणि अधिकृत डिजिटल सातबारा उतारा प्राप्त करू शकता.

हे देखील वाचा: Maharashtra Local Body Election: सिल्लोड नगरपरिषद निवडणुकीत यंदा ५४,८०८ मतदार; १० हजार मतांच्या वाढीमुळे राजकीय समीकरणे बदलणार