फारोळा येथे बसविण्यात आलेल्या स्क्रोल व्हॉल्व्हमधून पाणी बाहेर आल्यानंतर ते बंद करून पाणी पुढे सोडण्यात आले. यावेळी सहाशे मिमी व्यासाचा एअरव्हॉल्व्ह बंद न केल्याने त्या ठिकाणी मोठ्या प्रमाणावर पाणी बाहेर पडले, जलवाहिनीतून येणाऱ्या प्रचंड दाबामुळे खड्ड्यात पाणी साचून लहान तळ्याचे स्वरूप निर्माण झाले. इतकेच नव्हे, तर संबंधित व्हॉल्व्हही पाण्याखाली गेला. या प्रकारामुळे महाराष्ट्र जीवन प्राधिकरण (मजीप्रा) व जीव्हीपीआर कंपनीच्या अधिकाऱ्यांमध्ये एकच धावपळ उडाली. पाणी उपसण्यासाठी तातडीने पंप यंत्रणा मागवून कार्यान्वित करण्यात आली.
मात्र, जलवाहिनीतून सतत येणाऱ्या पाण्यामुळे उपसा करतानाही खड्ड्यातील पाण्याची पातळी कमी होत नव्हती. सोमवारी दिवसभर प्रयत्न करूनही परिस्थिती नियंत्रणात येऊ शकली नाही. अखेर रात्री उशिरापर्यंत पाणी उपसा करून एअरव्हॉल्व्ह बंद करण्याचे काम सुरू होते. व्हॉल्व्ह पूर्णपणे बंद झाल्यानंतरच पुढील चाचणी सुरू करता येणार असल्याचे अधिकाऱ्यांनी स्पष्ट केले.
जायकवाडी ते नक्षत्रवाडी दरम्यान उभारण्यात येत असलेली ही जलवाहिनी सुमारे २८ किलोमीटर लांबीची असून, शहराच्या पाणीपुरवठ्यासाठी अत्यंत महत्त्वाची मानली जाते. २५०० मिमी व्यासाची ही पाइपलाइन मोठ्या प्रमाणात पाणी वाहून नेण्यास सक्षम आहे. सध्या अंतिम चाचण्यांचा टप्पा सुरू असून, किरकोळ तांत्रिक अडचणींमुळे कामात विलंब होत आहे. प्रकल्प पूर्ण क्षमतेने सुरू झाल्यानंतर शहरातील पाणीटंचाई मोठ्या प्रमाणात कमी होण्याची अपेक्षा आहे.
.png "Videos"){kind=small}
