
Samruddhi Mahamarg: शासकीय वाहनावर अज्ञातांची दगडफेक; '११२' वर तीन वेळा कॉल करूनही २ तास मदत नाही, सुरक्षेवर गंभीर प्रश्नचिन्ह!
मिळालेल्या माहितीनुसार, वाशिम जिल्हा सामान्य रुग्णालयाचे कार्यालय अधीक्षक हिंमत राठोड हे आपल्या सहकाऱ्यांसह वाशिम येथून महत्त्वाची शासकीय कागदपत्रे घेऊन पुण्याला बैठकीसाठी निघाले होते. प्रवासादरम्यान छत्रपती संभाजीनगरजवळील सावंगी परिसरात चॅनेल क्रमांक ४२६ जवळ अज्ञात हल्लेखोरांनी त्यांच्या शासकीय वाहनाला लक्ष्य करत जोरदार दगडफेक केली. अचानक झालेल्या या हल्ल्यात वाहनाच्या समोरील काच फुटून मोठे नुकसान झाले. मात्र, चालकाने प्रसंगावधान राखत दाखवलेल्या सतर्कतेमुळे मोठा अनर्थ टळला आणि गाडीतील पाचही प्रवासी सुखरूप बचावले.
या थरारक घटनेनंतर कार्यालय अधीक्षक हिंमत राठोड यांनी पोलीस प्रशासनाच्या कार्यपद्धतीवर गंभीर प्रश्नचिन्ह उपस्थित केले आहेत. घटनेनंतर महामार्ग पोलिसांचे पथक २० मिनिटांत घटनास्थळी दाखल झाले. मात्र, आपत्कालीन मदतीसाठी असलेल्या ११२ क्रमांकावर तीन वेळा फोन करूनही कोणतीही मदत मिळाली नाही, असा खळबळजनक आरोप राठोड यांनी केला आहे. तब्बल दोन तास घटनास्थळी प्रतीक्षा करूनही संबंधित स्थानिक पोलिसांचे पथक मदतीसाठी पोहोचले नसल्याचे त्यांनी सांगितले.
अखेर पुढील तक्रार नोंदवण्याबाबत आवश्यक सूचना मिळाल्यानंतर राठोड व त्यांचे सहकारी शासकीय बैठकीसाठी पुण्याच्या दिशेने रवाना झाले. मात्र, ज्या महामार्गावरून दररोज हजारो नागरिक प्रवास करतात, तेथे थेट शासकीय वाहनावर दगडफेक होणे आणि आपत्कालीन यंत्रणेकडून वेळेत प्रतिसाद न मिळणे, यामुळे समृद्धी महामार्गावरील सुरक्षा व्यवस्थेचा बोजवारा उडाल्याची चर्चा सुरू झाली आहे.
Ans: वाशिम जिल्हा सामान्य रुग्णालयाचे कार्यालय अधीक्षक हिंमत राठोड हे सहकाऱ्यांसह पुण्याला जात असताना त्यांच्या शासकीय वाहनावर अज्ञातांनी दगडफेक केली.
Ans: ही घटना छत्रपती संभाजीनगरजवळील सावंगी परिसरात (चॅनेल क्रमांक ४२६) घडली. यात वाहनाची समोरील काच फुटली, मात्र चालकाच्या सतर्कतेमुळे गाडीतील पाचही जण सुखरूप बचावले.
Ans: महामार्ग पोलीस २० मिनिटांत पोहोचले, मात्र आपत्कालीन '११२' क्रमांकावर तीन वेळा कॉल करून आणि दोन तास प्रतीक्षा करूनही संबंधित पोलीस मदतीसाठी पोहोचले नसल्याचा आरोप त्यांनी केला आहे.