Sanjay Shirsat: बाळासाहेबांचे प्रेम कोणत्याही राजकारण्याकडून मिळणार नाही; शिवसेनाप्रमुखांच्या स्मृतीदिनी संजय शिरसाट भावूक

Sanjay Shirsat Balasaheb Thackeray: शिवसेनाप्रमुखांची आठवण येत नाही असा एकही दिवस आपला जात नाही, मंत्री शिरसाट म्हणाले, "आम्ही आज ज्या पदावर आहोत, त्याचे श्रेय शिवसेनाप्रमुख बाळासाहेब ठाकरेंनाच आहे.

• बाळासाहेब असते तर शिवसेना फुटली नसती
• थोड्या सत्तेसाठी केलेल्या राजकारणाने तुम्ही कुठे गेलात?
• शिवसेनाप्रमुखांच्या स्मृतीदिनी संजय शिरसाट भावूक

छत्रपती संभाजीनगर: शिवसेनाप्रमुख बाळासाहेब ठाकरे (Balasaheb Thackeray) यांच्या स्मृतिदिनानिमित्त जिल्ह्याचे पालकमंत्री संजय शिरसाट (Sanjay Shirsat) यांनी अत्यंत भावूक मत व्यक्त केले. शिवसेनाप्रमुखांची आठवण येत नाही असा एकही दिवस आपला जात नाही, असे त्यांनी स्पष्ट केले. मंत्री शिरसाट म्हणाले, “आम्ही आज ज्या पदावर आहोत, त्याचे श्रेय शिवसेनाप्रमुख बाळासाहेब ठाकरेंनाच आहे. त्यांनी आम्हाला दिलेले प्रेम आजचा कोणीही राजकारणी देऊ शकत नाही. मुलासारखा सांभाळ करणारा नेता अशी त्यांची ख्याती होती. देशातील कोणताही नेता त्यांच्या विरोधात चकार शब्द काढत नाही. आज जर ते असते, तर देशात वेगळीच क्रांती झाली असती आणि हिंदुत्वाचा भगवा आणखी डौलाने फडकला असता.”

शिवसेनाप्रमुखांशिवाय दुःख वाटते

बाळासाहेब ठाकरे आज हयात असते तर शिवसेना फुटलीच नसती, असे मत शिरसाट यांनी व्यक्त केले. “त्यांचा शब्द अखेरचा शब्द असायचा. त्यामुळे कोणताही कार्यकर्ता त्यापुढे जाऊच शकत नव्हता. शिवसेनाप्रमुख आज नाही याचे दुःख वाटते. ते आज हवे होते. त्यांनी दिलेल्या मार्गावरच आम्ही चालण्याचा प्रयत्न करत आहोत,” असे मंत्री शिरसाट म्हणाले.

हे देखील वाचा: Maharashtra Politics: नगराध्यक्षपदासाठी उमेदवारी जाहीर झाली अन्…; राष्ट्रवादी कॉँग्रेसमध्ये एकच खळबळ

सत्ता गमावल्याबद्दल ‘उबाठा’वर टीका

शिवसेना फुटल्याच्या मुद्द्यावर बोलताना त्यांनी उद्धव बाळासाहेब ठाकरे गटावर टीका केली. “थोड्याशा सत्तेसाठी तुम्ही (उबाठा) केलेले राजकारण तुम्हाला कुठे घेऊन गेले, ही भावना प्रत्येक शिवसैनिकाच्या मनात आहे. आज काँग्रेस, राष्ट्रवादी काँग्रेस त्यांच्यासोबत नाहीत. मात्र, आता या निर्णयापासून माघार नाही, हीच भूमिका शिवसेनेची (शिंदे गट) आहे.”

स्थानिक पातळीवर महायुतीचा निर्णय

आगामी नगरपालिका आणि नगरपंचायत निवडणुकांबाबत बोलताना शिरसाट यांनी महायुतीच्या निर्णयाबद्दल माहिती दिली. “स्थानिक स्तरावर निर्णय घ्यावा, असा तिन्ही नेत्यांचा (शिंदे-फडणवीस-पवार) वरिष्ठ स्तरावर निर्णय झालेला आहे. संभाजीनगरमध्ये शिवसेनेची ताकद जास्त आहे. सहा शिवसेनेचे तर भाजपचे तीन आमदार आहेत. त्यामुळे शक्यतो आमदारांच्या पातळीवर निर्णय घ्यावा,” असे त्यांनी सांगितले. शिरसाट यांनी आवाहन केले की, “युती होत नसले तर समोरचा आपला शत्रू आहे असे समजून निवडणूक लढवू नये. मैत्रीपूर्ण लढत देऊन नगरपालिकांवर महायुतीचा भगवा फडकावा.”

हे देखील वाचा: Chhatrapati Sambhajinagar Crime: वाळूजमध्ये अवैध गॅस रिफिलिंगचा भांडाफोड; सिलेंडरसह १.१६ लाखांचा मुद्देमाल जप्त