Nanded News : मुक व्हिडीओतून शिंदेंचा ‘मास्टरस्ट्रोक’; नांदेडच्या राजकारणात जोरदार रंगली चर्चा

नगरसेविका मीनल पाटील यांनी नुकताच उपमुख्यमंत्री एकनाथ शिंदे यांच्या उपस्थितीत शिवसेनेत प्रवेश केला. मात्र, या प्रवेशावेळी घडलेल्या 'आवाज नसलेल्या' व्हिडिओनेच राजकीय चर्चेला तोंड फोडले आहे.

Nanded News : नांदेड : नांदेड महानगरपालिकेच्या राजकारणात सध्या एक ‘मूक व्हिडिओ’ प्रचंड गाजत असून, त्यातून उलगडणाऱ्या राजकीय संकेतांनी सत्ताधाऱ्यांच्या गोटात खळबळ उडवली आहे. शिवसेनेची उमेदवारी नाकारल्यानंतर अपक्ष म्हणून प्रभाग क्रमांक ३ मधून विजय मिळवणाऱ्या नगरसेविका मीनल पाटील यांनी नुकताच उपमुख्यमंत्री एकनाथ शिंदे (DCM Eknath Shinde) यांच्या उपस्थितीत शिवसेनेत प्रवेश केला. मात्र, या प्रवेशावेळी घडलेल्या ‘आवाज नसलेल्या’ व्हिडिओनेच राजकीय चर्चेला तोंड फोडले आहे. या प्रवेशाच्या वेळी नांदेड जिल्ह्यातील शिवसेनेचे आमदार उपस्थित असल्याचे समजते.

 

या व्हिडिओमध्ये उपमुख्यमंत्री शिंदे, आमदार बालाजी कल्याणकर, गजानन पाटील आणि नगरसेविका मीनल पाटील यांच्यात झालेला संवाद दिसत आहे. पण आवाज नसल्यामुळे नेमका ‘कानमंत्र’ काय दिला, यावरून राजकीय वर्तुळात तर्क-वितर्काना उधाण आले आहे. मात्र, विश्वसनीय सूत्रांच्या माहितीनुसार, “नकारात्मकता बाजूला ठेवा आणि पक्षासाठी एकदिलाने काम करा,” असा स्पष्ट संदेश उपमुख्यमंत्री शिंदे यांनी दिल्याचे बोलले जात आहे.

हे देखील वाचा : महाराष्ट्रात पुन्हा गुवाहटी वारी होणार? 50 आमदार भाजपमध्ये जाणार,बड्या नेत्याचा दावा

नांदेड उत्तरमध्ये राजकीय हालचालींना वेग

विशेष म्हणजे, मनपा निवडणुकीत आमदार कल्याणकर यांनी गजानन पाटील यांना उघड विरोध केला होता. अशा परिस्थितीत उपमुख्यमंत्री एकनाथ शिंदे स्वतः गजानन पाटील यांच्या भेटीला गेले आणि त्याच ठिकाणी आमदार बालाजी कल्याणकर यांची उपस्थिती लागली. यामुळे या भेटीला अधिकच राजकीय वजन प्राप्त झाले आहे. त्या क्षणी चारही नेत्यांच्या चेहऱ्यावरचे हावभाव, देहबोली आणि एकमेकांकडे पाहण्याची शैली यावरून अनेक अर्थ काढले जात आहेत.

दरम्यान, शिवसेनेचे युवा नेते गजानन पाटील यांनी या भेटीबाबत फारसे उघडपणे बोलणे टाळले असले, तरी “काही महत्त्वाच्या घडामोडी झाल्या.” एवढाच ओझरता उल्लेख त्यांनी केला आहे. यामुळे या भेटीभोवतीचे गूढ अधिकच गडद झाले आहे, मीनल पाटील यांनी नगरसेविका म्हणून राजकारणात दमदार एन्ट्री केली असली, तरी त्यांचे लक्ष्य केवळ मनपापर्यंत मर्यादित नसल्याचे स्पष्ट दिसत आहे. त्यांची उद्दिष्ट विधानसभा आहे ते नांदेड उत्तरच्या मतदारांना हळूहळू कळायला सुरुवात झाली आहे. ‘मिशन २०२९ उत्तर विधानसभा मतदार संघ डोळ्यासमोर ठेवून त्यांनी सुरू केलेली राजकीय भ्रमंती सध्या नांदेड उत्तर मतदारसंघात चर्चेचा विषय ठरत आहे. एका ‘मूक व्हिडिओ’ने नांदेडच्या राजकारणात मोठा आवाज निर्माण केला आहे.

हे देखील वाचा : तो आक्षेपार्ह व्हिडिओ अन् पक्षाची झाली थू-थू; सुनेत्रा पवारांचा थेट झिरवळांना फोन

शहर वाहतूक शाखा वजिराबादची कारवाई

नांदेड शहरातील वाढत्या वाहतूक समस्येवर नियंत्रण आणण्यासाठी शहर वाहतूक शाखा वजिराबादने अवैध प्रवासी वाहतूक, विना परवाना/परमिट वाहने, अनधिकृत फळगाडे व हातगाड्यांवर धडक कारवाई करत एकूण २०१ केसेस दाखल केल्या असून २ लाख ३१ हजार ५०० रुपयांचा दंड वसूल करण्यात आला आहे. पोलिस अधीक्षक अबिनाश कुमार यांच्या आदेशानुसार शहरात वाढत असलेल्या ट्राफिक समस्येवर नियंत्रण ठेवण्यासाठी विशेष मोहीम राबविण्यात आली. या मोहिमेत
विना परवाना चालणारी वाहने, अवैध प्रवासी वाहतूक, भरधाव वेग, फटाका बुलेट, वाहन चालवताना मोबाईलचा वापर, तसेच रस्त्यावर अनधिकृतपणे उभे केलेले फळगाडे व हातगाड्यांवर कारवाई करण्यात आली. ३१ मार्च रोजी सहायक पोलीस निरीक्षक भागवत नागरगोजे व त्यांच्या पथकाने रेल्वे स्टेशन रोड, महावीर चौक, कलामंदिर परिसर, वर्कशॉप, राज कॉर्नर व छत्रपती चौक येथे विशेष तपासणी मोहीम राबवली. ऑटोचालकांना गणवेश परिधान करण्याच्या सूचना देण्यात आल्या. वाहतुकीस अडथळा निर्माण करणारी वाहने, ट्रिपल सीट प्रवास, परवाना नसलेली वाहने व रस्त्यावरचे अतिक्रमण यावर कठोर कारवाई करण्यात आली.