दिवाळीत मिठाई-खवा खरेदी करताय? थांबा! तुकाराम मुंढेंचा नागरिकांना सावधानतेचा इशारा; ६४ कोटींचा अन्नसाठा जप्त
मिठाई किंवा खवा खरेदी करताना नागरिकांनी आवश्यक तेवढीच खरेदी करावी. दोन ते तीन दिवसांपेक्षा अधिक काळ दुकानात ठेवलेली खवा मिठाई खरेदी करू नये. शक्यतो नामांकित आणि योग्य लेबल असलेल्या दुकानांमधूनच मिठाई खरेदी करावी. मिठाई किंवा खव्याच्या पाकिटावर उत्पादनाची तारीख नमूद आहे का, याची खात्री करावी. मिठाईमध्ये भेसळ असल्याचा संशय आल्यास किंवा काही तक्रार असल्यास नागरिकांनी FDA प्रशासनाला कळवावे. संबंधित तक्रारीवर योग्य ती कारवाई केली जाईल, असे मुंढे यांनी स्पष्ट केले.
मिठाई खरेदी करताना तिच्या रंगाकडे विशेष लक्ष देणे गरजेचे आहे. अतिशय भडक रंग किंवा जास्त प्रमाणात कृत्रिम रंग वापरलेली मिठाई खरेदी करणे टाळावे. तसेच सोन्या-चांदीचा वर्ख लावलेल्या मिठाईबाबतही सावधगिरी बाळगावी. चांदीचा वर्ख तपासताना तो हातात घेतल्यावर विरघळतो की त्याची फॉईल तयार होते, हे पाहावे. वर्खाची फॉईल तयार होत असल्यास तो अॅल्युमिनियमचा असू शकतो. त्यामुळे अशा मिठाईची खरेदी करताना विशेष काळजी घ्यावी, असे आवाहन मुंढे यांनी केले आहे.
सणासुदीच्या काळात नागरिकांना सुरक्षित आणि दर्जेदार अन्नपदार्थ मिळावेत, यासाठी FDA ने राज्यव्यापी तपासणी मोहीम हाती घेतली आहे. १ सप्टेंबर ते ३ नोव्हेंबर या कालावधीत राज्यभरातील ९,६६७ अन्न आस्थापनांची तपासणी करण्यात आली. यामध्ये ४,६०३ आस्थापनांना नोटिसा बजावण्यात आल्या असून ९५४ परवाने निलंबित करण्यात आले आहेत. या कारवाईत ६४ कोटी ४५ लाख रुपये किमतीचा अन्नसाठा जप्त करण्यात आला आहे. तसेच तपासणीसाठी ८,८३५ अन्न नमुने घेण्यात आले असून एकूण ३९८ टन अन्नसाठा जप्त केल्याची माहिती मुंढे यांनी दिली.
१५ ऑक्टोबर ते ३ नोव्हेंबर या दिवाळीच्या कालावधीत FDA ने विशेष तपासणी मोहीम राबवली. या काळात ३,३३२ अन्न आस्थापनांची तपासणी करण्यात आली. त्यापैकी १,५०१ आस्थापनांना नोटिसा देण्यात आल्या. नियमांचे उल्लंघन केल्याप्रकरणी ३२६ परवाने निलंबित करण्यात आले, तर १५ परवाने रद्द करण्यात आले. दिवाळीच्या पार्श्वभूमीवर परराज्यांतून महाराष्ट्रात आणल्या जाणाऱ्या खवा, मावा, दूध, पनीर, खाद्यतेल, खाद्यरंग आणि इतर खाद्यपदार्थांचीही तपासणी करण्यात आली आहे.
मिठाई किंवा इतर खाद्यपदार्थांमध्ये भेसळ असल्याचा संशय आल्यास नागरिकांनी अन्न व औषध प्रशासनाकडे तक्रार करावी. मिठाई विक्रेत्यांनीही स्वच्छता, अन्नाची गुणवत्ता आणि साठवणुकीच्या नियमांचे पालन करणे आवश्यक आहे. सणाचा आनंद घेताना आरोग्य धोक्यात येऊ नये, यासाठी नागरिकांनी मिठाई खरेदी करताना दक्ष राहावे, असे आवाहन तुकाराम मुंढे यांनी केले आहे.
Ans: नामांकित आणि लेबल असलेल्या दुकानांमधून मिठाई खरेदी करावी. मिठाईच्या पाकिटावर उत्पादनाची तारीख तपासावी. जास्त भडक रंग असलेली मिठाई टाळावी.
Ans: चांदीचा वर्ख हातात घेतल्यावर विरघळतो, तर अॅल्युमिनियम फॉईलची घडी किंवा फॉईल तयार होते. त्यामुळे वर्खाबाबत काळजी घेण्याचे आवाहन FDA आयुक्तांनी केले आहे.
Ans: १५ ऑक्टोबर ते ३ नोव्हेंबरदरम्यान ३,३३२ अन्न आस्थापनांची तपासणी करण्यात आली. १,५०१ आस्थापनांना नोटिसा बजावण्यात आल्या, तर ३२६ परवाने निलंबित आणि १५ परवाने रद्द करण्यात आले.
.png "Videos"){kind=small}
