पुणे : ड्रग्ज माफिया ललित पाटील पुन्हा येरवडा कारागृहात दाखल झाला आहे. पोलीस कोठडीची मुदत संपल्यानंतर त्याला विशेष न्यायाधीश व्ही. आर. कचरे यांच्या न्यायालयात हजर केले असता न्यायालयाने पाटीलसह जिशान शेख, शिवाजी शिंदे व राहुल पंडित यांना न्यायालयीन कोठडी सुनावली. ललितचा भाऊ भूषण पाटील, हरीश पंत, अरविंदकुमार लोहारे आणि इब्राहम शेख यांच्या पोलीस कोठडीत २९ नोव्हेंबरपर्यंत वाढ करण्यात आली आहे.
ससून रुग्णालयातून चालविल्या जाणाऱ्या ड्रग्ज रॅकेटचा पुणे पोलिसांच्या गुन्हे शाखेने पर्दाफाश केला होता. याप्रकरणी पोलिसांनी ड्रग्ज तस्कर ललित पाटीलसह १४ जणांना अटक केली. याटोळीवर साथीदारांवर महाराष्ट्र संघटित गुन्हेगारी नियंत्रण कायद्यान्वये (मोक्का) कारवाई केली.
ललितसह आठ साथीदारांच्या पोलीस कोठडीची मुदत शुक्रवारी संपली. त्यांना विशेष न्यायालयात गुन्हे शाखेने हजर केले. अमली पदार्थनिर्मिती, विक्री, वितरणात ललित व अरविंद लोहरे मुख्य सूत्रधार असल्याचे उघड झाले. अमली पदार्थ तस्करीत आणखी काहींचा समावेश आहे का, या दृष्टीने तपास करायचा आहे. त्यामुळे आरोपींच्या पोलीस कोठडीत वाढ करण्याची विनंती विशेष सरकारी वकील ॲड. विलास पटारे यांनी युक्तिवादात केली. पोलिसांनी कोठडी मिळवण्यासाठी न्यायालयात सादर केलेले मुद्दे नवीन नाहीत. आरोपींना त्रास देण्यासाठी पोलीस कोठडी वाढवून देण्याची मागणी करत असल्याचे बचाव पक्षाच्या वकिलांनी न्यायालयात सांगितले.
आरोपींचे तपासात असहकार्य
टोळीतील हरीश पंत, अरविंद लोहरे, इब्राहिम शेखच्या मोबाइल संपर्काचे तांत्रिक विश्लेषण केले असून, विश्लेषणातून महत्त्वाची माहिती मिळाली आहे. आरोपी तपासात असहकार्य करत नसल्याने त्यांची पोलीस कोठडी वाढवून द्यावी, अशी विनंती पोलिसांनी न्यायालयात केली. आरोपींच्या बँक खात्याची माहिती पोलिसांना मिळाली आहे. बँक व्यवहारांची चौकशी करायची आहे. आरोपी इब्राहिम शेख नागपूर येथील अमली पदार्थ तस्करीच्या प्रकरणात फरार असल्याचे पोलिसांनी न्यायालयात सांगितले.
.png "Videos"){kind=small}
