एका अक्षराच्या चुकीमुळे ‘या’ गावातील शेतकरी दिवाळी मदतीपासून वंचित; प्रशासनाचा भोंगळ कारभार उघड

महसूल प्रशासनाच्या ऑनलाइन प्रणालीतील केवळ एका अक्षराच्या चुकीमुळे गावातील शेकडो शेतकरी हक्काच्या ५ हजार रुपयांच्या दिवाळी मदतीपासून वंचित राहिले आहेत.

• ‘खरुस बु.’ ऐवजी ‘खरुस खु.’ नोंद
• एका अक्षरामुळे शेतकऱ्यांचे ५ हजार रुपये अडकले
• प्रशासनाचा भोंगळ कारभार उघड

उमरखेड : शासकीय अधिकाऱ्यांचा भोंगळ कारभार आणि तांत्रिक त्रुटींचा फटका उमरखेड तालुक्यातील खरुस बुद्रुक येथील शेतकऱ्यांना बसला आहे. महसूल प्रशासनाच्या ऑनलाइन प्रणालीतील केवळ एका अक्षराच्या चुकीमुळे गावातील शेकडो शेतकरी हक्काच्या ५ हजार रुपयांच्या दिवाळी मदतीपासून वंचित राहिले आहेत. दीड महिन्यापूर्वीच प्रशासनाच्या निदर्शनास ही बाब आणूनही दुरुस्ती न झाल्याने शेतकऱ्यांमध्ये संताप व्यक्त होत आहे.

 

उमरखेड तालुक्यात खरुस बुद्रुक आणि खरुस खुर्द अशी दोन स्वतंत्र गावे आहेत. मात्र, पीकपेरा नोंदणीच्या ऑनलाइन प्रणालीत ‘खरुस बु.’ ऐवजी ‘खरुस खु.’ असा चुकीचा उल्लेख आहे. त्यामुळे गावाचा नकाशा आणि शेतकऱ्यांची नावे ऑनलाइन दिसत नसल्याने पीकपेरा नोंदणी रखडली आहे. २१ ऑगस्ट २०२६ रोजी तहसीलदार आणि महसूल अधिकाऱ्यांना लेखी निवेदन देऊनही दीड महिन्यापासून दुरुस्ती करण्यात आलेली नाही.

मुख्यमंत्री देवेंद्र फडणवीस यांनी दिवाळीपूर्वी पात्र शेतकऱ्यांच्या खात्यात ५ हजार रुपये जमा करण्याची घोषणा केली होती. तालुक्यातील इतर गावांतील शेतकऱ्यांना मदत मिळाली; मात्र खरुस बुद्रुकमधील एकाही शेतकऱ्याच्या खात्यात रक्कम जमा झालेली नाही. प्रशासनाच्या एका चुकीची शिक्षा गोरगरीब आणि अल्पभूधारक शेतकऱ्यांनी का भोगायची, असा संतप्त सवाल ग्रामस्थ करीत आहेत. तालुक्याचे राजकीय दैवत मानले जाणारे नारायणराव पाटील वानखेडे यांचे हे गाव आहे. मतखंड परिसरातील प्रमुख गावातील शेतकऱ्यांची अशी प्रशासकीय हेळसांड होत असेल, तर सामान्य जनतेच्या समस्यांकडे प्रशासन किती गांभीर्याने पाहत असेल, असा प्रश्न उपस्थित होत आहे. संबंधित अधिकाऱ्यांनी तातडीने त्रुटी दूर करून शेतकऱ्यांना मदत मिळवून द्यावी, अशी मागणी होत आहे.

दोन वेगवेगळ्या गावांची गल्लत होणे ही साधी चूक नाही, हा शेतकऱ्यांच्या हक्कावर गदा आणणारा प्रकार आहे. प्रशासनाने गांभीर्याने दखल घेऊन तातडीने मदत मिळवून द्यावी. – अवधूत वानखेडे, शेतकरी

संतप्त शेतकऱ्यांचा प्रशासनाविरोधात एल्गार

प्रगतीशील शेतकरी बालाजीराव वानखेडे यांच्यासह गावातील सर्व शेतकऱ्यांनी या भोंगळ कारभाराचा तीव्र निषेध केला आहे. ही चूक नेमकी कोणाच्या स्तरावर झाली याची चौकशी करून खरुस बुद्रुकची स्वतंत्र ऑनलाइन नोंद करावी आणि वंचित राहिलेल्या प्रत्येक शेतकऱ्याच्य खात्यात तात्काळ पाच हजार रुपये जमा करावेत, अशी मागणी करण्यात आली आहे. अन्यथा प्रशासनाविरोधात तीव्र आंदोलन छेडण्याचा पवित्रा शेतकऱ्यांनी घेतला आहे.

गावाचे नाव खरुस बुद्रूक असताना ऑनलाइन खरुस खुर्द दाखवले जात आहे. दीड महिन्यापूर्वी सांगूनही दुरुस्ती झाली नाही. एका अक्षराच्या चुकीमुळे आमच्या गावातील शेतकऱ्यांचे मोठे नुकसान होत असून, ही अत्यंत गंभीर बाब आहे. – बालाजी वानखेडे (माजी सरपंच, खरुस बु.)

हे सुद्धा वाचा : राष्ट्रीय स्पर्धेत बारामतीच्या मुलींची दमदार कामगिरी! कुस्ती आणि बुद्धिबळात घवघवीत यश; सुनेत्रा पवारांकडून कौतुक

मी अल्पभूधारक शेतकरी आहे. दिवाळी मदतीची आम्हाला नितांत गरज होती. पण प्रशासनाच्या चुकीमुळे आम्ही लाभापासून वंचित राहिलो आहोत. ही चूक तत्काळ दुरुस्त करावी. – रामा पावडे (अल्पभूधारक शेतकरी, खरूस बु.)