दिंडोरी तालुक्यात घराची भिंत कोसळून आजोबांसह नातू ठार ; आजीला वाचवण्यात यश

दिंडाेरी तालुक्यातील नळवाडपाडा येथे एका घराची भिंत काेसळून आजाेबा आणि नातवाचा दुर्दैवी मृत्यू झाला. दुर्घटनेनंतर प्रशासन आणि स्थानिकांच्या मदतीने आजीला वाचवण्यात यश आले आहे.

वणी : दिंडाेरी तालुक्यातील नळवाडपाडा येथे एका घराची भिंत काेसळून आजाेबा आणि नातवाचा दुर्दैवी मृत्यू झाला. दुर्घटनेनंतर प्रशासन आणि स्थानिकांच्या मदतीने आजीला वाचवण्यात यश आले आहे. नळवाडपाडा शिवारातील वस्तीवर एका बंद कंपनीच्या जुन्या खोलीत झोपलेले गुलाब वामन खरे (आजोबा) विठाबाई गुलाब खरे, निशांत विशाल खरे (नातू) हे खोलीचे छत कोसळून दाबले गेले. यात आजोबा गुलाब खरे व निशांत खरे यांचा जागीच दुर्दैवी मृत्यू झाला तर आजीला सुखरूप बाहेर काढण्यात यश आले आहे.

पावसाळा सुरू झाल्यापासून रूसलेल्या पावसाने अखेर गुरुवारी (दि. ८) पहाटेपासून जाेरदार हजेरी लावली आहे. नळवाडपाडा शिवारातील इंडो फ्रेंच कंपनीच्या जुन्या काही खोल्या आहेत. त्या शेजारी गुलाब वामन खरे यांचे घर आहे खरे हे रात्री नेहमी या खोलीत पत्नी व नातू समवेत राहत होते. गुरुवारी मध्यरात्रीच्या सुमारास तिघे झोपलेले असताना अचानक सदर खोलीचे छत कोसळत त्याखाली ते दाबले गेले शेजारी त्यांचे मुलाला आवाज येताच त्यांनी तेथे बघितले असता त्यांना आई, वडील, मुलगा छताखाली दाबल्याचे दिसून आले. त्यांनी तातडीने सरपंच हिरामण गावित व ग्रामस्थांना कळवले सरपंच यांनी तातडीने सर्कल तलाठी यांना कळवत मदत मागवली. जेसीबी आणणार आले.

ग्रामस्थांनी घटनास्थळी धाव घेत मदतकार्य सुरू केले पहाटे चारच्या सुमारास सरपंच हिरामण गावित, शिपाई बाळू गवळी व ग्रामस्थांनी आत जात तिघांना बाहेर काढले त्यात आजोबा व नातू मयत झाले होते; तर जखमी आजी विठाबाई यांना सुखरूप बाहेर काढत त्यांना दवाखान्यात नेले. सर्कल अमोल ढमके, तलाठी गिरीश बोंबले, ग्रामसेविका ललिता खांडवी यांनी तातडीने घटनास्थळी धाव घेटली. ग्रामस्थांनी पावसात मदतकार्य करत आजीचे प्राण वाचवले.