Jalgaon News : मुक्ताईनगर हादरलं! भीषण अपघातात एकाचा जागीच मृत्यू; दुसरा गंभीर

Jalgaon News : जळगाव जिल्ह्यातील मुक्ताईनगर तालुक्यातील नायगाव फाट्याजवळ दुचाकी आणि सिमेंट काँक्रीट मिक्सर डंपर यांच्यात झालेल्या भीषण अपघातात अजंदे गावातील प्रल्हाद मधुकर हिवरे (४०) यांचा जागीच मृत्यू झाला, तर त्यांचे मित्र ईश्वर नामदेव पवार (३८) गंभीर जखमी झाले.

• जळगाव जिल्ह्यातील नायगाव फाट्याजवळ डंपर आणि दुचाकीच्या भीषण धडकेत प्रल्हाद हिवरे (४०) यांचा मृत्यू झाला.
• या अपघातात त्यांचे मित्र ईश्वर पवार (३८) गंभीर जखमी झाले असून त्यांच्यावर मुक्ताईनगर उपजिल्हा रुग्णालयात उपचार सुरू आहेत.
• दोघेही मलकापूरहून अजंदे गावाकडे दुचाकीने परतत असताना सिमेंट काँक्रीट मिक्सर डंपरने त्यांच्या दुचाकीला धडक दिली.
• मुक्ताईनगर पोलिसांनी घटनास्थळाची पाहणी करून फॉरेन्सिक पुरावे गोळा केले असून अपघाताचा पुढील तपास सुरू आहे.

नेमकं काय घडलं?

रावेर तालुक्यातील अजंदे गावचे प्रल्हाद मधुकर हिवरे वय 40 वर्षे आणि ईश्वर नामदेव पवार वय 38 वर्षे हे दोघे मित्र दुचाकीवरून मलकापूरहून अजंदे गावाकडे येत होते. त्यांची दुचाकी क्रमांक MH 19 DD 1858 होती.ते नायगाव फाट्याजवळ आले असता समोरून येणाऱ्या एका भरधाव डंपरने त्यांच्या गाडीला जोरात धडक दिली. हा डंपर सिमेंट काँक्रीट मिक्सरचा होता आणि त्याचा नंबर MH 19 CY 4617 असा आहे. हा डंपर BNA कंपनीचा असल्याचं सांगितलं जात आहे.

Jalgaon Crime: गणपतीच्या आगमनासाठी पूजेची तयारी सुरू होती, माय-लेक …

इंदूर-हैदराबाद महामार्ग क्रमांक 753 चे काम सध्या तिथे सुरु आहे आणि त्याच कामासाठी हा डंपर तिथे होता.धडक इतकी जोरात होती की प्रल्हाद हिवरे यांचा जागीच मृत्यू झाला. अपघात किती भीषण होता याचा अंदाज यावरून लावा की त्यांचं डोकं धडापासून वेगळं झालं होतं. हे दृश्य बघून तिथे असलेल्या लोकांच्या अंगावर काटा आला.तर त्यांच्यासोबत असलेले ईश्वर पवार हे गंभीर जखमी झाले आहेत. त्यांना लगेचच मुक्ताईनगरच्या उपजिल्हा रुग्णालयात नेण्यात आलं आहे. तिथे त्यांच्यावर उपचार सुरु आहेत. त्यांची प्रकृती चिंताजनक असल्याचं डॉक्टरांनी सांगितलं आहे.

पोलिस घटनास्थळी दाखल

अपघाताची बातमी कळताच मुक्ताईनगर पोलिसांनी तातडीने घटनास्थळी धाव घेतली. रस्त्यावर रक्त पडलं होतं आणि दुचाकीचा चक्काचूर झाला होता.पोलिसांनी घटनेचं गांभीर्य ओळखून फॉरेन्सिक टीमला पण बोलावलं. फॉरेन्सिक पथकाने घटनास्थळावरून पुरावे गोळा केले आहेत. हा अपघात नेमका कसा झाला? डंपर चालकाचा वेग जास्त होता का? की दुचाकीचालकाचं नियंत्रण सुटलं? याचा तपास पोलिस करत आहेत.रात्री उशिरापर्यंत मुक्ताईनगर पोलीस ठाण्यात या प्रकरणी गुन्हा दाखल करण्याचं काम सुरु होतं.

Jalgaon News: सणाचा उत्साह अन् सोन्याच्या दरवाढीचा झटका! जळगावात १ …

गावावर शोककळा

या अचानक घडलेल्या घटनेमुळे अजंदे गावावर दुःखाचा डोंगर कोसळला आहे. प्रल्हाद हिवरे हे गावात चांगले ओळखले जात होते. त्यांच्या जाण्याने कुटुंबावर मोठं संकट आलं आहे. घरात एकच आक्रोश सुरु आहे.स्थानिक लोकांनी सांगितलं की या महामार्गाचं काम सुरु असल्यापासून तिथे मोठ्या गाड्यांची वर्दळ वाढली आहे आणि अपघात पण वाढले आहेत. कंपनीच्या गाड्या भरधाव वेगाने चालवतात आणि त्याचा फटका सामान्य लोकांना बसतो. यावर पोलिसांनी लक्ष द्यावं अशी मागणी गावकऱ्यांनी केली आहे.सध्या पोलिस पुढील तपास करत आहेत आणि डंपर चालकाचा शोध घेत आहेत.