यकृत दानाने बहिणीने दिले भावाला जीवदान

भावाचा जीव वाचविण्यासाठी बहीण माधुरी काळे हिने क्षणार्धात यकृताचा भाग देण्याची तयारी दाखविली आणि भावाला यकृताचा ६५ टक्के भाग देत जीवदान दिले.

कल्याण : महाराष्ट्र पोलीस विभागाचा खेळाडू असलेल्या भावाचे यकृत खराब झाल्याने दुसऱ्याच्या यकृताचा भाग बसवूनच त्याला जीवदान देणे शक्य असल्याचे निदान डॉक्टरांनी केले. यानंतर भावाचा जीव वाचविण्यासाठी बहीण माधुरी काळे हिने क्षणार्धात यकृताचा भाग देण्याची तयारी दाखविली आणि भावाला यकृताचा ६५ टक्के भाग देत जीवदान दिले. मुलुंडच्या फोर्टीज रुग्णालयात ही किचकट शस्त्रक्रिया यशस्वीपणे पार पडली.

अभिजीत भाबल आणि माधुरी काळे ही दोन सख्खी भावंडे, माधुरी शिक्षिका आणि कल्याण डोंबिवली महापालिकेची नगरसेविका तर अभिजीत महाराष्ट्र पोलीसचा खेळाडू. काही दिवसांपूर्वी अभिजीतचे लिव्हर खराब झाल्याने ते बदलण्याची गरज असल्याचे निदान डॉक्टरांनी केले. त्याचा जीव वाचविण्यासाठी आपण यकृत देण्यास तयार असल्याचे माधुरी हिने स्वतः हून सांगितले. यानंतर आवश्यक चाचण्या करून ती डोनर होऊ शकते यावर डॉक्टरांनी शिक्कामोर्तब करताच माधुरीने न डगमगता वैद्यकीय परीक्षणासह शस्त्रक्रिये पर्यंतच्या सर्व कठीण परीक्षांना हसत हसत सामोरे जात माधुरीने आपल्या यकृताचा ६५ टक्के भाग दिला.

यावरून भाऊ बहीण हे नाते एकमेकांच्या काळजाचा तुकडा असल्याचे दाखवून दिले. २ डिसेबर रोजी ही शस्त्रक्रिया यशस्वीपणे पार पडली असून दोघांचीही प्रकृती स्थिर असल्याचे डॉक्टरांनी सांगितले. सामाजिक, राजकीय आणि कौटुंबिक नात्यांना तितक्याच खंबीरपणे सांभाळणाऱ्या माधुरीचे सर्वत्र कौतुक होत आहे.