कराडच्या बापूजी साळुंखे महाविद्यालयात प्रकल्प कार्य व प्रत्यक्ष कार्य प्रशिक्षण कार्यशाळा उत्साहात
श्री स्वामी विवेकानंद शिक्षण संस्था, कोल्हापूर संचलित शिक्षणमहर्षी बापूजी साळुंखे महाविद्यालय, कराड येथे 5 ऑक्टोबर 2026 रोजी नवीन शैक्षणिक धोरण 2020 नुसार ‘प्रकल्प कार्य व प्रत्यक्ष कार्य प्रशिक्षण’ या विषयावर कार्यशाळेचे आयोजन करण्यात आले होते. महाविद्यालयाचे प्राचार्य प्रो. डॉ. सतीश घाटगे यांच्या अध्यक्षतेखाली ही कार्यशाळा उत्साहात पार पडली.
प्रा. डॉ. ए. के. पाटील म्हणाले की, केवळ वर्गात बसून आपल्या आजूबाजूच्या पर्यावरणात आणि समाजात काय घडत आहे, याची पूर्ण जाणीव विद्यार्थ्यांना होऊ शकत नाही. प्रत्यक्ष प्रकल्प कार्यातून वस्तुस्थिती समजते. पर्यावरणात प्रत्यक्ष गेल्याशिवाय तेथील समस्या समजत नाहीत, तसेच समाजात प्रत्यक्ष काम केल्याशिवाय समाजाच्या वेदना आणि समस्या जाणून घेता येत नाहीत. त्यामुळे अभ्यासक्रमातील एखादी समस्या निवडून विद्यार्थ्यांनी प्रकल्प कार्य करणे आवश्यक आहेत.
प्रत्यक्ष कार्य प्रशिक्षणाच्या माध्यमातून विद्यार्थ्यांना विविध क्षेत्रांतील कामकाजाचा अनुभव मिळतो. औद्योगिक क्षेत्र, बँका, पतसंस्था, वीटभट्टी तसेच इतर विविध व्यवसाय व कार्यक्षेत्रांना भेट देऊन विद्यार्थी तेथील कामकाज समजून घेतात. भविष्यातील रोजगारासाठी आवश्यक कौशल्ये विकसित करण्यास या प्रशिक्षणाचा मोठा फायदा होतो, असेही त्यांनी सांगितले.
अध्यक्षीय मार्गदर्शन करताना प्राचार्य प्रो. डॉ. सतीश घाटगे यांनी नवीन शैक्षणिक धोरण 2020 हे शैक्षणिक क्षेत्रात क्रांती घडवणारे धोरण असल्याचे सांगितले. आधुनिक काळातील आव्हानांना सामोरे जाताना विद्यार्थी स्वयंपूर्ण व्हावा, या उद्देशाने या धोरणानुसार अभ्यासक्रमाची रचना करण्यात आली आहे. विद्यार्थ्यांनी अभ्यासक्रमातील प्रत्येक बाबीकडे गांभीर्याने लक्ष देऊन ती आत्मसात करणे गरजेचे असल्याचे त्यांनी नमूद केले.
कार्यक्रमाचे प्रास्ताविक परीक्षा विभाग प्रमुख प्रा. सुरेश काकडे यांनी केले. प्रमुख पाहुण्यांचा परिचय डॉ. मारुती सूर्यवंशी यांनी करून दिला. आभार प्रा. विश्वनाथ सुतार यांनी मानले, तर सूत्रसंचालन प्रा. ज्योती धर्माधिकारी यांनी केले. आय.क्यू.एस.सी. समन्वयक प्रा. रत्नाकर कोळी यांच्यासह महाविद्यालयातील सर्व गुरुदेव कार्यकर्ते उपस्थित होते. बी.ए. भाग 3 आणि बी.कॉम. भाग 3 मधील बहुसंख्य विद्यार्थी-विद्यार्थिनींनी कार्यशाळेत सहभाग घेतला.
.png "Videos"){kind=small}
