पुणे : म्हाडाच्या (MHADA) पुणे मंडळाने पाच हजार घरांची सोडत काढण्याचा निर्णय घेतला असून, या सोडतीची (Draw for Homes) जाहिरात ऑगस्ट महिन्याच्या शेवटच्या आठवड्यात प्रसिद्ध करण्यात येणार आहे. जाहिरात प्रसिद्ध झाल्यानंतर तात्काळ अर्ज विक्री स्वीकृतीच्या – प्रक्रियेला सुरुवात करण्यात येणार आहे. तसेच ऑक्टोबरमध्ये या घरांसाठी सोडत काढण्यात येणार आहे. दरम्यान, या वर्षातील ही दुसरी सोडत आहे.
म्हाडाच्या मुंबई मंडळाच्या 4082 घरांच्या सोडतीचा निकाल नुकताच जाहीर करण्यात आला आहे. मुख्यमंत्री एकनाथ शिंदे यांनी लवकरच कोकण, पुणे आणि औरंगाबाद मंडळांतील घरांसाठी सोडत काढण्यात येईल, असे जाहीर केले. त्यानुसार पुणे मंडळातील पाच हजार घरांसाठी ऑक्टोबरमध्ये सोडत काढण्याचा निर्णय घेण्यात आल्याची माहिती मंडळाचे मुख्य अधिकारी अशोक पाटील यांनी दिली.
म्हाडा या सोडतीच्या जाहिरातीची तयारी पूर्ण झाली असून, 25 ऑगस्ट रोजी जाहिरात प्रसिद्ध करण्यात येणार आहे, असेही त्यांनी सांगितले. जाहिरात प्रसिद्ध होताच 25 ऑगस्टपासूनच अर्ज विक्री – स्वीकृतीला सुरुवात करण्यात येणार आहे. या सोडतीत अत्यल्प, अल्प, माध्यम आणि उच्च अशा सर्व उत्पन्न गटातील घरांचा समावेश आहे. त्याचबरोबर पुणे, सांगली, सोलापूर आणि कोल्हापूर येथील घरांसाठीही सोडत काढण्यात येणार आहे.
कोकण विभागासाठी 4500 घरांची सोडत
म्हाडाच्या मुंबई मंडळाच्या माध्यमातून काढलेल्या 4082 घरांच्या लॉटरी सोडतीनंतर आता म्हाडा कोकण मंडळाच्या वतीने तब्बल 4500 घरांची लॉटरी लवकरच काढली जाईल, अशी घोषणा नुकतीच करण्यात आली. घराचा ताबा मिळण्यासाठी दीड वर्षाचा कालावधी लागायचा तिथे आता साडेचार महिन्यांपेक्षा कमी कालावधी लागण्याची शक्यता आहे. त्यामुळे या लॉटरीनंतर कोकण मंडळाच्या वतीने 4500 घरांची लॉटरी सोडत काढण्यात येईल, असेही जाहीर केले.
.png "Videos"){kind=small}
