दिवाळी हंगामाच्या पार्श्वभूमीवर महाबळेश्वर खड्डेमुक्त; रस्त्यांच्या कामांची नगराध्यक्ष सुनील शिंदे यांच्याकडून प्रत्यक्ष पाहणी

यंदाच्या मान्सूनमध्ये महाबळेश्वर परिसरात झालेल्या मुसळधार पावसामुळे शहरातील मुख्य व अंतर्गत रस्त्यांची मोठी दुरवस्था झाली होती. काही भागांतील रस्ते वाहून गेले होते, तर प्रमुख मार्गांवर जागोजागी मोठमोठे खड्डे पडले होते.

• दिवाळी हंगामापूर्वी महाबळेश्वर खड्डेमुक्त
• नगरपालिकेकडून रस्ते दुरुस्तीची युद्धपातळीवर कामे
• नगराध्यक्ष सुनील शिंदे यांच्याकडून प्रत्यक्ष पाहणी

महाबळेश्वर : प्रसिद्ध पर्यटन स्थळ असलेल्या महाबळेश्वर शहरात आगामी दिवाळी हंगामात होणारी पर्यटकांची प्रचंड गर्दी लक्षात घेऊन नगरपालिकेने रस्ते दुरुस्ती व सुशोभीकरणाचे काम युद्धपातळीवर हाती घेतले आहे. पालिकेच्या या धडक कारवाईमुळे महाबळेश्वर शहर आता पूर्णपणे खड्डेमुक्त झाले असून पर्यटकांच्या स्वागतासाठी रस्ते सुसज्ज होत आहेत.

यंदाच्या मान्सूनमध्ये महाबळेश्वर परिसरात झालेल्या मुसळधार पावसामुळे शहरातील मुख्य व अंतर्गत रस्त्यांची मोठी दुरवस्था झाली होती. काही भागांतील रस्ते वाहून गेले होते, तर प्रमुख मार्गांवर जागोजागी मोठमोठे खड्डे पडले होते. रस्त्यांच्या या बिकट अवस्थेमुळे पर्यटनावर आणि स्थानिक वाहतुकीवर विपरीत परिणाम होण्याची शक्यता निर्माण झाली होती. पर्यटकांची गैरसोय टाळण्यासाठी आणि महाबळेश्वरच्या पर्यटनाला फटका बसू नये यासाठी नगराध्यक्ष सुनील शिंदे यांनी तातडीने बैठक घेऊन संपूर्ण शहरातील रस्ते दुरुस्त करण्याचा खंबीर निर्णय घेतला.

रस्ते दुरुस्तीच्या या मोहिमेत शहरातील प्रमुख व्यापारी केंद्र असलेल्या ‘महात्मा गांधी रस्त्या’च्या कामाला विशेष प्राधान्य देण्यात आले. यापूर्वी हा रस्ता अर्धा सिमेंटचा व अर्धा डांबरी अशा स्वरूपात होता. पालिकेने या रस्त्याचा कायापालट करत संपूर्ण रस्ता सिमेंट काँक्रीटचा करण्याचा निर्णय घेतला. त्यानुसार ठेकेदार नीरज आगवेकर यांच्याशी सविस्तर चर्चा करून प्रत्यक्ष कामाला तातडीने सुरुवात करण्यात आली. रस्त्यासोबतच पावसाचे पाणी योग्य रीतीने वाहून जाण्यासाठी याच मार्गावर अत्याधुनिक काँक्रीटचे तयार गटारे (Pre-cast Concrete Gutters) बसविण्याचे कामही युद्धपातळीवर सुरू करण्यात आले आहे.

शहरात सुरू असलेल्या या सर्व विकासकामांची व रस्ते दुरुस्तीची प्रत्यक्ष पाहणी नुकतीच नगराध्यक्ष सुनील शिंदे व त्यांच्या सहकारी नगरसेवकांनी केली. या पाहणी दौऱ्यात नगराध्यक्ष सुनील शिंदे यांच्यासोबत नगरसेवक ॲड. संजय जंगम, अफजल सुतार, अशोक शिंदे तसेच मुख्याधिकारी योगेश पाटील हे प्रामुख्याने उपस्थित होते. पाहणीदरम्यान मुख्याधिकारी योगेश पाटील यांनी नगराध्यक्षांना शहरातील रस्ते, गटारे व सुरु असलेल्या इतर कामांची सविस्तर माहिती दिली.

पाहणीदरम्यान रस्त्यांच्या कामाची पाहणी करताना नगराध्यक्ष सुनील शिंदे यांनी संबंधित ठेकेदार व अधिकाऱ्यांना स्पष्ट शब्दांत ताकीद दिली. “रस्त्यांच्या कामाच्या दर्जाबाबत (Quality) कोणतीही तडजोड खपवून घेतली जाणार नाही. दिवाळीचा पर्यटन हंगाम सुरू होण्यापूर्वी ही सर्व कामे अत्यंत दर्जेदार पद्धतीने आणि वेळेत पूर्ण झाली पाहिजेत,” अशा कडक सूचना त्यांनी यावेळी दिल्या.

नगराध्यक्ष सुनील शिंदे हे केवळ बंदिस्त कार्यालयात न बसता रोज प्रत्यक्ष ‘फिल्ड’वर उतरून कामांची पाहणी करतात, त्रुटी लक्षात आणून देतात आणि तातडीने सूचना करून कामे पूर्ण करून घेतात. लोकप्रतिनिधी आणि प्रशासन यांच्या या सक्रिय व तत्पर कार्यपद्धतीमुळे महाबळेश्वरमधील स्थानिक नागरिक, व्यापारी आणि पर्यटन व्यावसायिक अत्यंत समाधानी असून ते नगराध्यक्ष, नगरसेवक व पालिकेच्या संपूर्ण टीमचे मनःपूर्वक कौतुक करत आहेत. रस्ते दुरुस्त झाल्यामुळे यंदाचा दिवाळी हंगाम पर्यटक आणि स्थानिक व्यापारी दोघांसाठीही आनंददायी ठरणार आहे.

FAQ

1. महाबळेश्वर शहरात रस्त्यांची कामे का हाती घेण्यात आली?
दिवाळीच्या सुट्यांमध्ये महाबळेश्वरमध्ये मोठ्या संख्येने पर्यटक येण्याची शक्यता आहे. पर्यटकांची गैरसोय होऊ नये आणि पर्यटनाला फटका बसू नये यासाठी रस्ते दुरुस्तीची कामे हाती घेण्यात आली.

2. महाबळेश्वरमधील रस्त्यांची अवस्था का खराब झाली होती?
यंदाच्या मान्सूनमध्ये झालेल्या मुसळधार पावसामुळे शहरातील मुख्य आणि अंतर्गत रस्त्यांची मोठी दुरवस्था झाली होती. काही ठिकाणी रस्ते वाहून गेले, तर अनेक मार्गांवर मोठमोठे खड्डे पडले होते.

3. रस्त्यांच्या कामांची पाहणी कोणी केली?
महाबळेश्वरचे नगराध्यक्ष सुनील शिंदे यांनी रस्ते दुरुस्ती आणि सुशोभीकरणाच्या कामांची प्रत्यक्ष पाहणी केली.