Jalgaon News: उपवर्गीकरणाविरोधात मुक्ताईनगरात ‘एल्गार’! सकल बौद्ध समाजाचा विराट मोर्चा

Jalgaon News: जळगाव जिल्ह्यातील मुक्ताईनगर येथे अनुसूचित जातींच्या आरक्षणातील प्रस्तावित उपवर्गीकरणाला विरोध करण्यासाठी सकल बौद्ध समाजाच्या वतीने शुक्रवारी ४ सप्टेंबर रोजी विराट मोर्चा काढण्यात आला.

• उपवर्गीकरणाविरोधात मुक्ताईनगरात विराट मोर्चा
• हजारो नागरिकांचा मोर्चात सहभाग
• चोख बंदोबस्तात आंदोलन शांततेत पार

 

Muktainagar Reservation Protest 2026: जळगावच्या मुक्ताईनगर येथे ४अनुसूचित जातींच्या आरक्षणातील प्रस्तावित उपवर्गीकरणाला विरोध करण्यासाठी मुक्ताईनगर तालुक्यातील सकल बौद्ध समाजाच्या वतीने शुक्रवारी (४ सप्टेंबर) शहरात हजारोंच्या संख्येने विराट मोर्चा काढण्यात आला. महिला, पुरुष, युवक-युवती तसेच अबालवृद्ध मोठ्या संख्येने सहभागी झाल्याने शहरातील वातावरण निळे झाले होते.

‘आरक्षण उपवर्गीकरण रद्द करा’, ‘डॉ. बाबासाहेब आंबेडकरांचा विजय असो’ अशा घोषणांनी परिसर दुमदुमून गेला. कृउबा समिती, बोदवड रोड येथून दुपारी बारा वाजता मोर्चाला सुरुवात झाली. बोदवड चौफुली, बसस्थानकमार्गे मोर्चा परिवर्तन चौकात पोहोचला. सहभागी समाजबांधवांनी पांढरे वस्त्र परिधान करून गळ्यात निळे रुमाल आणि हातात निळे ध्वज घेतले होते. त्यामुळे संपूर्ण मोर्चा निळ्या रंगात न्हाऊन निघाल्याचे चित्र दिसत होते. परिवर्तन चौकात महापुरुषांना अभिवादन करण्यात आले. Jalgaon News:

चोख पोलिस बंदोबस्त तैनात; वाहतूकही सुरळीत

मोर्चाच्या पार्श्वभूमीवर पोलिस निरीक्षक आशिष अडसूळ यांच्या मार्गदर्शनाखाली शहरात चोख पोलीस बंदोबस्ता तैनात करण्यात आला होता. मोर्चादरम्यान कुठेही कायदा वा सुव्यवस्थेचा प्रश्न निर्माण झाला नाही. पोलिसांनी वाहतुकीचे योग्य नियोजन केल्यामुळे मोर्चाच्या मार्गावर मोठ्या प्रमाणात वाहतूक कोंडीही झाली नाही. त्यामुळे मोचा शांततेत व शिस्तबद्ध वातावरणात पार पडला.

सुनील पवारांचे मार्गदर्शन अन् पथनाट्य

मौर्चानंतर परिवर्तन चौकात झालेल्या सभेत मालेगाव येथून आलेले प्रमुख वक्ते सुनील पवार यांनी अनुसूचित जातींच्या आरक्षणातील उपवर्गीकरणाच्या विषयावर सविस्तर मार्गदर्शन केले. उपवर्गीकरणाच्या प्रक्रियेमुळे अनुसूचित जातींमधील विविध घटकांच्या संविधानिक आरक्षणाच्या हक्कांवर संभाव्य परिणाम, सामाजिक व शैक्षणिक परिणाम तसेच या प्रश्नाकडे गांभीर्याने पाहण्याची गरज याबाबत त्यांनी उपस्थितांना संबोधित कैले.

पवार यांच्या मार्गदर्शनानंतर युवक-युवतीनी पथनाट्याच्या माध्यमातून आरक्षणाचा प्रश्न आणि सामाजिक वास्तव प्रभावीपणे मांडले, पथनाट्याला उपस्थित समाजबांधवांनी उत्स्फूर्त प्रतिसाद दिला.

Mira Bhayandar News: प्रवाशांच्या मागणीचा फॉर्म्युला ठरला फायदेशीर; एसटीच्या उत्पन्नात ६६ कोटींची वाढ, तोटा भरून निघण्याची आशा

मुख्यमंत्र्यांना तहसीलदारांमार्फत निवेदन

• मोर्चाच्या वतीने तहसीलदार गिरीश वखारे यांच्याकडे निवेदन देण्यात आले. यावेळी पोलिस निरीक्षक आशिष अडसूळ उपस्थित होते. निवेदन तहसीलदारांमार्फत मुख्यमंत्र्यांकडे पाठविण्याची मागणी करण्यात आली.

 

• निवेदनात अनुसूचित जातीच्या आरक्षणातील उपवर्गीकरणाची प्रस्तावित प्रक्रिया तात्काळ स्थगित करून रद्द करावी, उपवर्गीकरणाचा विविध घटकांवर होणाऱ्या सामाजिक, शैक्षणिक व प्रशासकीय परिणामांचा सखोल अभ्यास करावा आणि अनुसूचित जातीव्या संविधानिक आरक्षणाच्या हक्काला बाधा येईल, अशी कोणतीही कार्यवाही करू नये, अशी प्रमुख मागणी करण्यात आली.

Mumbai News: एकल वापराच्या प्लास्टिकबाबत पालिका ॲक्शन मोडवर! कठोर कारवाईचे विधी समिती अध्यक्षांचे निर्देश

• यासोबतच अनुसूचित जातींच्या सर्वांगीण विकासासाठी शासनाच्या कल्याणकारी योजनांची प्रभावी अंमलबजावणी करावी, यांच्यासह विविध अशा मागण्या निवेदनाद्वारे करण्यात आल्या.