Adani Group Ganeshotsav: अंबानींनंतर अदानींचीही गणेशोत्सवात एन्ट्री! १०७ वर्षे जुन्या मंडळासोबत खास हातमिळवणी

Adani Group Ganeshotsav: मुंबईच्या प्रसिद्ध चिंचपोकळीच्या चिंतामणी गणेशोत्सव मंडळासोबत अदानी समूहाने औपचारिक भागीदारी केली आहे. शंभर वर्षांहून अधिक परंपरा असलेल्या या मंडळाच्या गणेशोत्सवात यंदा अदानी समूहाचा सहभाग पाहायला मिळणार आहे.

• चिंचपोकळीच्या चिंतामणीसोबत अदानी समूहाची भागीदारी
• मंडळाला १०० वर्षांहून अधिक वर्षांची परंपरा
• यंदाच्या गणेशोत्सवात अदानी समूहाचा सहभाग

Adani Group Partners with Chinchpokli Chintamani Ganeshotsav: मुंबईचा गणेशोत्सव म्हटलं की डोळ्यांसमोर गर्दी, ढोल-ताशांचा गजर, आकर्षक सजावट आणि बाप्पाच्या दर्शनासाठी लागलेल्या लांबच लांब रांगा दिसतात. या उत्सवाला मुंबईच्या संस्कृतीत वेगळंच स्थान आहे. दरवर्षी हजारो नव्हे, तर लाखो भाविक शहरातील प्रसिद्ध गणपतींच्या दर्शनासाठी येतात. त्यात चिंचपोकळीचा चिंतामणी हे नाव आवर्जून घेतलं जातं.

यंदाच्या गणेशोत्सवाआधी या मंडळाशी संबंधित एक महत्त्वाची बातमी समोर आली आहे. अदानी समूहाने चिंचपोकळीच्या चिंतामणी गणेशोत्सव मंडळासोबत औपचारिक भागीदारी केली आहे. त्यामुळे यंदाच्या मुंबईतील गणेशोत्सवात या उद्योग समूहाचा सहभाग पाहायला मिळणार आहे. Adani Group Ganeshotsav:

100 वर्षांहून जुनी परंपरा

चिंचपोकळीचा चिंतामणी हा केवळ एक प्रसिद्ध गणपती नाही, तर मुंबईच्या जुन्या उत्सव परंपरेचा एक भाग आहे. या मंडळाला शंभर वर्षांहून अधिक काळाचा इतिहास असल्याचं सांगितलं जातं. गिरणी कामगारांच्या वस्त्यांमध्ये गणेशोत्सवाची सुरुवात ज्या वातावरणात झाली, त्याच काळाशी या मंडळाची नाळ जोडलेली आहे.

त्या काळात उत्सव म्हणजे केवळ मोठी सजावट किंवा रोषणाई नव्हती. समाजातील लोकांनी एकत्र यावं, त्यांच्यात जागृती निर्माण व्हावी आणि शिक्षणाचा प्रसार व्हावा, हा त्यामागचा विचार होता. स्वातंत्र्याच्या चळवळीचा प्रभावही त्या काळातील तरुणांवर होता. त्यामुळे गणेशोत्सवाचा उपयोग लोकांना एकत्र आणण्यासाठी केला जात होता.

सुरुवातीच्या काळात मंडळासाठी मोठ्या रकमेची गरज नव्हती. परिसरातील लोकांकडून छोट्या छोट्या देणग्या गोळा करून उत्सव साजरा केला जायचा. साधेपणाने सुरू झालेला हा सोहळा पुढे मुंबईतील मोठ्या गणेशोत्सवांपैकी एक बनला.

यंदाची आगमन मिरवणूक कधी?

चिंचपोकळीच्या चिंतामणीची यंदाची आगमन यात्रा 29 ऑगस्ट रोजी होणार आहे. या मिरवणुकीला दरवर्षी मोठ्या प्रमाणावर भाविक आणि गणेशभक्त उपस्थित राहतात. बाप्पाच्या आगमनाचा दिवस मंडळाच्या कार्यकर्त्यांसाठी तसेच स्थानिक नागरिकांसाठी खास असतो. चिंचपोकळी, परळ आणि लालबाग हा परिसर पूर्वी गिरणी कामगारांच्या वस्त्यांसाठी ओळखला जायचा. त्या काळापासून गणेशोत्सवाने या भागातील लोकांना एकत्र ठेवण्याचं काम केलं. आज परिसर बदलला असला, तरी उत्सवाची भावना मात्र कायम आहे.

मोठ्या उद्योग समूहांचा गणेशोत्सवात सहभाग

मुंबईच्या गणेशोत्सवात मोठ्या उद्योग घराण्यांचा सहभाग नवीन नाही. अंबानी कुटुंबाचा लालबागच्या राजाशी असलेला संबंध गेल्या काही वर्षांपासून चर्चेत आहे. अनंत अंबानी यांना लालबागचा राजा सार्वजनिक गणेशोत्सव मंडळाच्या कार्यकारी समितीत प्रमुख सल्लागार म्हणून स्थान देण्यात आलं आहे. आता अदानी समूहाची चिंतामणी मंडळासोबत झालेली भागीदारीही लक्ष वेधून घेत आहे. त्यामुळे मुंबईच्या प्रसिद्ध गणेशोत्सवात मोठ्या उद्योग समूहांचा सहभाग आणखी ठळक झाला आहे.

FSSAI परवाना नसल्याची कबुली, दोन रुग्णालयांतील कॅन्टीन बंद; रुग्णांच्या सुरक्षेवर प्रश्नचिन्ह

जुनं मंडळ, नवा टप्पा

चिंचपोकळीच्या चिंतामणीचा उत्सव अनेक पिढ्यांनी पाहिला आहे. साध्या पद्धतीने सुरू झालेल्या या गणेशोत्सवाने काळानुसार अनेक बदल स्वीकारले. मात्र, भक्ती आणि परंपरेचा गाभा कायम राहिला.

अदानी समूहासोबत झालेली भागीदारी हा या मंडळाच्या प्रवासातील आणखी एक नवा टप्पा मानला जात आहे. यंदाच्या उत्सवात या भागीदारीचा नेमका कसा परिणाम दिसेल, याकडे अनेकांचे लक्ष असेल.

मोठी बातमी ! बोगस लाडक्या बहिणींचा 9605 कोटींवर डल्ला; राज्य सरकार आता ‘त्या’ महिलांकडून पैसे करणार वसूल?

मुंबईत गणेशोत्सव म्हणजे फक्त दहा दिवसांचा कार्यक्रम नाही. या काळात जुन्या आठवणी, श्रद्धा, माणसांचं नातं आणि शहराची ओळख एकत्र दिसते. चिंचपोकळीचा चिंतामणी त्याच परंपरेचं एक जिवंत उदाहरण आहे. त्यामुळे यंदाच्या आगमन यात्रेकडे भक्तांसोबतच मुंबईकरांचंही लक्ष लागलं आहे.