मुंबईत १० टक्के पाणी कपात असताना टँकरला पाणी मिळते कुठून? टँकर लॉबीला कोणाचा आशिर्वाद? अतुल लोंढेंचा सवाल

मुंबईतील टँकर लॉबीवर बोलताना काँग्रेसचे वरिष्ठ प्रवक्ते अतुल लोंढे यांनी सवाल उपस्थित केले आहेत. मुंबईत १० टक्के पाणी कपात असताना टँकरला पाणी मिळते कुठून? टँकर लॉबीला कोणाचा आशिर्वाद? असा सवाल लोंढे यांनी विचारला आहे.

• मुंबईत १० टक्के पाणी कपात असताना टँकरला पाणी मिळते कुठून?
• टँकर लॉबीला कोणाचा आशिर्वाद?
• काँग्रेसचे प्रवक्ते अतुल लोंढेंचा सवाल

मुंबई : मुंबईतून एक मोठी बातमी समोर आली आहे. महाराष्ट्र प्रदेश काँग्रेस कमिटीचे वरिष्ठ प्रवक्ते अतुल लोंढे यांनी टँकर लॉबीवरुन सवाल उपस्थित केले आहेत. मुंबईतील काही सोसायट्यांना दहा टक्के पाणी कपातीचा फटका बसत आहे आणि या सोसायटीमधील नागरिकांना पाण्याचे टँकर बोलावावे लागतात. एखाद्या भागात विकास झाला नसेल, पाण्याची पाइपलाइन पोहोचली नसेल, पाण्याचे डेडिकेटेड स्त्रोत नसतील, तर टँकरने पाणी पुरवठा करणे हे समजू शकते परंतु पाणी कपात असताना या टँकरला पाणी कोठून मिळते, या टँकर लॉबीचे मालक कोण व त्यांना कोणाचा आशिर्वाद आहे, असा प्रश्न महाराष्ट्र प्रदेश काँग्रेस कमिटीचे वरिष्ठ प्रवक्ते अतुल लोंढे यांनी विचारला आहे.

मुंबईतील टँकर लॉबीवर बोलताना काँग्रेसचे वरिष्ठ प्रवक्ते अतुल लोंढे पुढे म्हणाले की, पाणी टंचाई असतानाही टँकरमधून पाणी पुरवठा केला जातोच कसा या टँकरला पाणी मिळते कोठून? म्हणूनच तर शंका बळावते की टँकर लॉबी कोण आहे? या टँकर लॉबीचे मालक कोण आहेत? काही नगरसेवक आहेत का? नगरसेवकांच्या जवळचे कॉन्ट्रॅक्टर किंवा त्यांचे नातेवाईक आहेत का? हे सत्य पुढे आले पाहिजे, अशी मागणी अतुल लोंढे यांनी केली आहे.

हे सुद्धा वाचा : ‘भावेश मोरेशी वाद का घालतो ?’ म्हणत तरुणावर हल्ला; डोक्यावर तीक्ष्ण शस्त्राने वार; पुण्यातील घटनेनं खळबळ

सरकार चौकशी वगैरे काही करत नाहीच पण निदान सत्य तरी पुढे आणा की हे टँकर कोणाचे आहेत आणि ते टँकरचे ज्यांचे आहेत, त्यांचे आणि नगरसेवकांचे लागेबांधे काय आहेत? मुंबईकरांना याचे उत्तर हवे आहे. मुंबई महानगरपालिका प्रशासन, बीएमसी आयुक्त व राज्य सरकार यांनी या टँकर लॉबीवर सविस्तर खुलासा करावा, असेही काँग्रेसचे वरिष्ठ प्रवक्ते अतुल लोंढे म्हणाले. लोढे यांच्या प्रश्नांवर मुंबई महानगरपालिका प्रशासन, बीएमसी आयुक्त व राज्य सरकार काय उत्तर देणार हेही पाहणं महत्वाच ठरणार आहे.

हे सुद्धा वाचा : वराळेत जुन्या भांडणाच्या रागातून तरुणावर हल्ला, कोयत्याने सपासप वार करुन संपवलं; आठ जणांवर गुन्हा दाखल