गुरुवार, 3 सप्टेंबर 2026
चला, कोकण आपलाच असा...! गणेशोत्सवात कोकणवासीयांना रेल्वेची भेट; CSMT-सावंतवाडी एक्स्प्रेसचा आज शुभारंभ
या एक्स्प्रेसला 3 सप्टेंबर 2026 रोजी CSMT येथून या नव्या रेल्वे सेवेचा शुभारंभ होणार आहे. मुख्यमंत्री देवेंद्र फडणवीस, केंद्रीय वाणिज्य आणि उद्योग मंत्री पीयूष गोयल आणि केंद्रीय रेल्वेमंत्री अश्विनी वैष्णव ट्रेनला हिरवा झेंडा दाखवणार आहेत. उद्घाटनाच्या दिवशी ट्रेन क्रमांक 01001 दुपारी 12.50 वाजता CSMT येथून रवाना होईल आणि दुसऱ्या दिवशी रात्री 2 वाजता सावंतवाडी रोड स्थानकात दाखल होईल. उद्घाटन सोहळ्याला उपमुख्यमंत्री एकनाथ शिंदे, उपमुख्यमंत्री सुनेत्रा पवार व्हिडिओ प्रसारणाद्वारे, विधानसभा अध्यक्ष राहुल नार्वेकर, मंत्री नितेश राणे, मुंबईच्या महापौर रितू तावडे, खासदार मिलिंद देवरा यांच्यासह विविध मान्यवर उपस्थिती असणार आहे.
ही ट्रेन CSMT येथून निघाल्यानंतर दादर, ठाणे, पनवेल, पेण, रोहा, माणगाव, वीर, खेड, चिपळूण, सावर्डा, आरवली रोड, संगमेश्वर रोड, रत्नागिरी, आडवली, विलवडे, राजापूर रोड, वैभववाडी रोड, नांदगाव रोड, कणकवली, सिंधुदुर्ग आणि कुडाळ या स्थानकांवर थांबून सावंतवाडी रोड येथे पोहोचणार आहे. यामुळे मुंबई, ठाणे आणि नवी मुंबई परिसरातून रत्नागिरी व सिंधुदुर्ग जिल्ह्यात जाणाऱ्या प्रवाशांना थेट रेल्वे सेवेचा आणखी एक पर्याय उपलब्ध होणार आहे.
प्रवाशांच्या विविध गरजा लक्षात घेऊन ट्रेनमध्ये एसीपासून जनरल डब्यांपर्यंत वेगवेगळ्या श्रेणींची सुविधा असणार आहे. ट्रेनमध्ये 1 AC First Class, 2 AC 2-Tier, 3 AC 3-Tier, 4 Sleeper Class आणि 4 General Second Class कोच असतील. याशिवाय Second Seating-cum-Guard Brake Van आणि Generator Vanचाही समावेश असेल.
नवीन डेली एक्स्प्रेसचा सर्वाधिक फायदा सिंधुदुर्ग जिल्ह्यातील कणकवली, सिंधुदुर्ग, कुडाळ आणि सावंतवाडी परिसरातील प्रवाशांना होण्याची अपेक्षा आहे. मुंबई आणि दक्षिण कोकणादरम्यान दररोज प्रवास करणारे प्रवासी, व्यापारी आणि पर्यटकांना थेट कनेक्टिव्हिटी मिळणार आहे. नियमित सेवा सुरू झाल्यानंतर मुंबईहून कोकणात जाणाऱ्या इतर गाड्यांवरील प्रवाशांचा ताण काही प्रमाणात कमी होण्यासही मदत होऊ शकते.
नव्या रेल्वे सेवेमुळे दक्षिण कोकणातील पर्यटनालाही फायदा होण्याची अपेक्षा आहे. सावंतवाडी परिसरासह आंबोली, तारकर्ली आणि गोवा सीमेलगतच्या पर्यटनस्थळांकडे जाणाऱ्या पर्यटकांना आणखी एक रेल्वे पर्याय उपलब्ध होणार आहे. विशेषतः मुंबईतून सिंधुदुर्गला जाणाऱ्या पर्यटकांसाठी नियमित रेल्वे कनेक्टिव्हिटी वाढल्यामुळे स्थानिक पर्यटन, हॉटेल व्यवसाय आणि इतर पूरक व्यवसायांना चालना मिळण्याची शक्यता आहे.
उद्घाटन विशेष ट्रेननंतर CSMT-सावंतवाडी रोड डेली एक्स्प्रेसची नियमित सेवा सुरू होणार आहे. मात्र, Regular Service चे संपूर्ण वेळापत्रक, ट्रेन क्रमांक आणि इतर तपशील रेल्वेकडून स्वतंत्रपणे अधिसूचित केले जाणार आहेत. नवीन डेली एक्स्प्रेसमुळे मुंबई आणि कोकणातील रेल्वे कनेक्टिव्हिटी आणखी मजबूत होणार असून, प्रवासी सुविधांसोबतच दक्षिण कोकणातील पर्यटन आणि स्थानिक अर्थव्यवस्थेलाही चालना मिळण्याची अपेक्षा आहे.
