Montha चक्रीवादळाचा धोका! मुंबईसह कोकण आणि उत्तर महाराष्ट्रात यलो अलर्ट (Photo Credit - X)
मुंबई: मुंबई शहर आणि उपनगरात रविवारी सकाळपासूनच ढगाळ वातावरण (Cloudy weather) निर्माण झाले होते. दुपारनंतर शहराच्या काही भागांमध्ये पावसाने हजेरी लावली. आता भारतीय हवामान विभागाने (IMD) मुंबई आणि आसपासच्या परिसरासाठी पावसाचा इशारा जारी केला असून, नागरिकांना गडगडाटी वादळ आणि जोरदार पावसासाठी सज्ज राहण्याचे आवाहन केले आहे. मुंबई, ठाणे आणि पालघर जिल्ह्यांसाठी ‘यलो अलर्ट’ जारी करण्यात आला आहे, ज्यामुळे या ठिकाणी विजांच्या कडकडाटासह जोरदार पाऊस होण्याची शक्यता आहे.
प्रादेशिक हवामान केंद्र, मुंबईने ट्विटमध्ये म्हटले आहे की, कोकण-गोवा आणि उत्तर मध्य महाराष्ट्रातील तुरळक ठिकाणी विजांच्या कडकडाटासह जोरदार पाऊस आणि ताशी ४०-५० किमी वेगाने सोसाट्याचे वारे वाहण्याची शक्यता आहे. यापूर्वी, पूर्व-मध्य अरबी समुद्रातील कमी दाबाचे क्षेत्र ताशी ७ किलोमीटर वेगाने पश्चिमेकडे सरकल्याचे वृत्त दिले होते.
Thunderstorm accompanied with lightning, heavy rainfall, gusty winds with speed reaching 40-50 Kmph very likely to occur at isolated places in the districts of Konkan-Goa and North Madhya Maharashtra. — Regional Meteorological Center,Mumbai (@RMC_Mumbai) October 26, 2025
दरम्यान, आंध्र प्रदेश, ओदिशा आणि तामिळनाडू ही राज्ये ‘मोंथा’ (Montha) चक्रीवादळाचा सामना करण्यासाठी सज्ज झाली आहेत. हे तीव्र चक्रीवादळ मंगळवारी पूर्व किनारपट्टीवर धडकण्याची शक्यता आहे. मंगळवारी उशिरा हे तीव्र चक्रीवादळ आंध्र प्रदेशातील काकिनाडा परिसरात धडकण्याची शक्यता असून, यावेळी वाऱ्याचा वेग ताशी ९०-१०० किमी (किंवा ११०० किमीपर्यंत) राहण्याची शक्यता आहे. ईशान्य मान्सूनचे वारे (Northeast Monsoon) देखील या भागात सक्रिय असल्याने आंध्र प्रदेशच्या किनारपट्टीसह यनम आणि रायलसीमा भागात जोरदार पाऊस पडण्याची शक्यता आहे.
A) #Deep_Depression over Southeast & adjoining southwest #Bay_of_Bengal
The deep depression over southeast Bay of Bengal moved west-northwestwards with a speed of 8 kmph during past 6 hours, and lay centred at 1730 hrs IST of today, the 26th October 2025, over southeast &… pic.twitter.com/Y83t16UxRt — India Meteorological Department (@Indiametdept) October 26, 2025
आंध्र प्रदेश सरकारने चक्रीवादळाच्या पूर्वतयारीसाठी मदत आणि आवश्यक वस्तूंच्या पुरवठ्याची कार्ययोजना तयार केली आहे. नागरी पुरवठा मंत्री एन. मनोहर यांनी सांगितले की, सार्वजनिक वितरण प्रणाली (PDS) च्या वस्तूंचा साठा, इंधनाची व्यवस्था, भात खरेदीची तयारी, मदत छावण्यांमध्ये अन्नपुरवठा आणि चक्रीवादळानंतर मदत वाटपाचा या कृती आराखड्यात समावेश आहे. अधिकृत आणि अद्ययावत माहितीसाठी नागरिकांनी IMD च्या अधिकृत वेबसाइटला भेट द्यावी.
.png "Videos"){kind=small}
