सोमवार, 21 सप्टेंबर 2026
बाप्पाच्या विसर्जनानंतर विद्यार्थ्यांनी उचलला स्वच्छतेचा विडा; गिरगाव चौपाटीवर राबवली मोहीम
गौरी-गणपती विसर्जनासाठी गिरगाव चौपाटीवर मोठ्या संख्येने भाविक येतात. विसर्जनानंतर किनाऱ्यावर फुले, हार, निर्माल्य आणि इतर प्रकारचा कचरा मोठ्या प्रमाणावर जमा होत असतो. अशा परिस्थितीत समुद्रकिनारा स्वच्छ ठेवण्यासाठी विद्यार्थ्यांनी प्रत्यक्ष मैदानात उतरून स्वच्छतेचा संदेश दिला.
या मोहिमेत विद्यार्थ्यांनी किनाऱ्यावरील कचरा गोळा करत परिसर स्वच्छ करण्यासाठी हातभार लावला. केवळ वर्गात पर्यावरण संवर्धनाचे धडे घेण्याऐवजी प्रत्यक्ष कृतीतून सामाजिक आणि पर्यावरणीय जबाबदारी समजून घेण्याची संधी या उपक्रमातून विद्यार्थ्यांना मिळाली.
गणेशोत्सवाच्या काळात पर्यावरणपूरक उत्सवाचे महत्त्व सातत्याने अधोरेखित केले जाते. मात्र विसर्जनानंतर समुद्रकिनारे स्वच्छ ठेवणे आणि सार्वजनिक ठिकाणी कचरा न टाकणे हीदेखील नागरिकांची महत्त्वाची जबाबदारी आहे. विद्यार्थ्यांनी केलेल्या या प्रयत्नातून हाच संदेश मुंबईकरांना देण्यात आला.
CMCA च्या पुढाकारातून राबविण्यात आलेल्या या मोहिमेमुळे विद्यार्थ्यांमध्ये स्वच्छता, नागरिक कर्तव्य आणि पर्यावरण संरक्षणाबाबत जागरूकता निर्माण होण्यास मदत झाली. गणेशोत्सवाचा आनंद साजरा करतानाच निसर्ग आणि शहराची स्वच्छता जपण्याची जबाबदारी प्रत्येकाची असल्याचा संदेश या उपक्रमातून देण्यात आला.
मुंबईतील गणेशोत्सव म्हटले की गिरगाव चौपाटीवरील गणेश विसर्जन हे प्रमुख आकर्षण मानले जाते. गणेशोत्सवाच्या विविध दिवशी घरगुती तसेच सार्वजनिक गणेशमूर्तींचे येथे विसर्जन केले जाते. विशेषतः गौरी-गणपती आणि अनंत चतुर्दशीच्या दिवशी गिरगाव चौपाटी परिसरात भाविकांची मोठी गर्दी पाहायला मिळते.
मुंबईच्या विविध भागांतून गणेशमूर्ती विसर्जनासाठी गिरगाव चौपाटीकडे आणल्या जातात. ढोल-ताशांचा गजर, गुलालाची उधळण आणि *‘गणपती बाप्पा मोरया, पुढच्या वर्षी लवकर या’*च्या जयघोषात भाविक आपल्या लाडक्या बाप्पाला निरोप देतात. अनेक प्रसिद्ध सार्वजनिक गणेशोत्सव मंडळांच्या विसर्जन मिरवणुकांचा मार्गही दक्षिण मुंबईतून गिरगाव चौपाटीकडे जातो.
Anant Chaturdashi 2026: अनंत चतुर्दशीच्या दिवशी १४ गाठींचा अनंत धागा बांधण्याचे काय आहे महत्त्व
