“माघार घ्या, नाहीतर सरकारी रोष सहन करा!” इंडियन मेडिकल असोसिएशन माजी अध्यक्ष व सभासदांनी तयार केलेल्या पॅनलमधील उमेदवारांना धमकी
मुंबई : महाराष्ट्र वैद्यकीय परिषद निवडणुकीच्या पार्श्वभूमीवर राजकीय हस्तक्षेप आणि दबावाच्या गंभीर आरोपांनी वैद्यकीय क्षेत्रात खळबळ उडाली आहे. २६ एप्रिल रोजी होणाऱ्या निवडणुकीत माजी अध्यक्ष व सभासदांनी तयार केलेल्या पॅनलमधील उमेदवारांना धमकीचे फोन येत असल्याचा आरोप डॉ. सुहास पिंगळे यांनी केला आहे. भारतीय वैद्यक संघटना म्हणजेच आयएमएचे महाराष्ट्राचे माजी अध्यक्ष डॉ. पिंगळे यांनी दिलेल्या माहितीनुसार, ‘माघार घ्या… आमच्याकडे या… अन्यथा सरकारी रोष ओढवून घ्याल,’ अशा आशयाचे फोन उमेदवारांना येत आहेत. या प्रकारामुळे निवडणूक प्रक्रियेवर गंभीर प्रश्नचिन्ह निर्माण झाले असून, वैद्यकीय स्वायत्ततेवर गदा येत असल्याची चिंता व्यक्त होत आहे.
या दबावामुळे संबंधित पॅनलमधील एका उमेदवाराने माघार घेतल्याची माहितीही समोर आली आहे. उर्वरित उमेदवारांवरही अशाच प्रकारचा दबाव टाकण्यात आल्याचे सांगितले जात असून, मात्र उरलेले सदस्य निवडणूक लढवण्यावर ठाम असल्याचे डॉ. पिंगळे यांनी स्पष्ट केले. ‘लढा अद्याप संपलेला नाही,’ असा संदेश त्यांनी दिला. दरम्यान, या घडामोडींमुळे वैद्यकीय क्षेत्रात संतापाची लाट उसळली आहे. ‘ही केवळ निवडणूक नसून वैद्यकीय स्वायत्तता टिकवण्याची लढाई आहे,’ असे मतही डॉ. पिंगळे यांनी व्यक्त केले. दबाव, दडपशाही आणि भीतीचे राजकारण लोकशाही प्रक्रियेला घातक असल्याची टीका त्यांनी केली. या पार्श्वभूमीवर एमएमसी निवडणूक अधिकच चुरशीची होण्याची शक्यता असून, डॉक्टरांनी सजग राहून मतदानातून उत्तर द्यावे, असे आवाहनही करण्यात येत आहे.
दरम्यान, इंडियन मेडिकल असोसिएशन (IMA)च्या अंतर्गत निवडणुकांदरम्यान गंभीर वाद निर्माण झाला आहे. माजी अध्यक्ष व काही सभासदांनी तयार केलेल्या पॅनलमधील उमेदवारांना माघार घेण्याचा दबाव टाकण्यात आल्याचा आरोप समोर आला आहे. माहितीनुसार, काही उमेदवारांना “माघार घ्या, आमच्यात सामील व्हा, अन्यथा सरकारी रोष ओढवून घ्यावा लागेल” अशा प्रकारच्या धमक्या देण्यात आल्याचे सांगितले जात आहे. या प्रकारामुळे निवडणूक प्रक्रियेच्या पारदर्शकतेवर प्रश्नचिन्ह निर्माण झाले आहे. या घटनेमुळे आयएमएच्या अंतर्गत राजकारणाचा मुद्दा ऐरणीवर आला असून, संघटनेतील गटबाजी उघड झाल्याचे चित्र आहे. संबंधित उमेदवारांनी या प्रकाराबाबत नाराजी व्यक्त करत निष्पक्ष आणि दबावमुक्त निवडणूक प्रक्रियेची मागणी केली आहे. दरम्यान, या आरोपांवर अद्याप अधिकृत प्रतिक्रिया आलेली नसली तरी, हा वाद वैद्यकीय क्षेत्रात चर्चेचा विषय ठरत आहे. भविष्यात या प्रकरणात चौकशी किंवा स्पष्टीकरण येण्याची शक्यता व्यक्त केली जात आहे.
.png "Videos"){kind=small}
