Manoj Jarange Patil : ‘दोन जन्म झाले तरी जरांगेंची मागणी मान्य होणार नाही’; सदावर्तेंचा थेट इशारा, ठाकरेंनाही सुनावलं

Manoj Jarange Patil : मनोज जरांगे पाटील यांनी मुंबईतील आझाद मैदानावर आंदोलन करण्याची घोषणा केली आहे. त्यांच्या या भूमिकेवर ज्येष्ठ वकील गुणरत्न सदावर्ते यांनी जोरदार टीका केली असून गणेशोत्सवाच्या काळात मुंबईत आंदोलन करण्यावरून राज ठाकरे, उद्धव ठाकरे आणि संजय राऊत यांच्यावरही निशाणा साधला आहे.

• ‘गणेशभक्त तुम्हाला माफ करणार नाहीत’; सदावर्तेंचा जरांगेंना इशारा
• मुंबई आंदोलनावरून राज ठाकरे, उद्धव ठाकरे आणि संजय राऊतांवरही निशाणा
• ‘कायद्यासमोर कोणी मोठं नाही’; सदावर्ते आंदोलन न्यायालयात नेणार

Manoj Jarange Patil : मनोज जरांगे पाटील यांनी मराठा आरक्षणाच्या मागणीसाठी पुन्हा आक्रमक भूमिका घेतली आहे. अंतरवाली सराटी येथे झालेल्या बैठकीत त्यांनी मुंबईकडे कूच करण्याची घोषणा केली असून 15 सप्टेंबर रोजी मराठा बांधव मुंबईच्या दिशेने रवाना होणार असल्याचं सांगितलं आहे. त्यानंतर आता ज्येष्ठ वकील गुणरत्न सदावर्ते यांनी जरांगे यांच्या आंदोलनावर जोरदार टीका केली आहे.

गणेशोत्सवाच्या पूर्वसंध्येला मुंबईला धमकी दिली जात असल्याचा आरोप सदावर्ते यांनी केला. सणासुदीच्या काळात मुंबईच्या कायदा-सुव्यवस्थेवर ताण निर्माण होऊ शकतो, असं म्हणत त्यांनी जरांगे यांच्या आंदोलनाच्या वेळेवरच सवाल उपस्थित केला.

विशेष म्हणजे सदावर्ते यांनी या मुद्द्यावरून राज ठाकरे, उद्धव ठाकरे आणि संजय राऊत यांच्यावरही निशाणा साधला. जरांगे यांच्या आंदोलनामुळे विद्यार्थ्यांना शाळेत जाता आलं नाही किंवा त्यांच्या शिक्षणावर परिणाम झाला तर जबाबदारी कोणाची, असा सवाल त्यांनी केला. ‘गणेशभक्तांचा उद्रेक होईल आणि गणेशभक्त तुम्हाला माफ करणार नाहीत’, असा इशाराही सदावर्ते यांनी दिला. राष्ट्रवादी काँग्रेसमधील नेत्यांवरही त्यांनी टीका केली.

Manoj Jarange Patil : ‘जरांगे भंपक माणूस, ऑस्करसाठी नामांकन पाठवा’; अजय बारसकरांची घणाघाती टीका

‘जरांगेंची मागणी दोन जन्म झाले तरी मान्य होणार नाही’

मनोज जरांगे यांच्या आंदोलनामागे एवढी ताकद कुठून आली, असा सवाल सदावर्ते यांनी उपस्थित केला. सर्वपक्षीय नेत्यांनी छुपं राजकारण करू नये, असं आवाहन करत त्यांनी सरकारच्या भूमिकेचाही उल्लेख केला.

‘दोन जन्म झाले तरी जरांगे यांची ही मागणी मान्य होऊ शकत नाही’, असा दावा सदावर्ते यांनी केला. जरांगे हे मुख्यमंत्री यांच्या घराला लक्ष्य करून मुंबईत येत असल्याचा आरोपही त्यांनी केला.

आझाद मैदानातील आंदोलनाच्या वेळेवरूनही सदावर्तेचा आक्षेप

दरम्यान, आझाद मैदानातील आंदोलनाच्या वेळेवरूनही सदावर्ते यांनी आक्षेप घेतला. पाच वाजल्यानंतर आझाद मैदानात आंदोलन करता येत नाही, असा दावा करत कायद्यापुढे कोणीही मोठं नसल्याचं त्यांनी म्हटलं.

या सर्व मुद्द्यांवर आपण न्यायालयात बाजू मांडणार असल्याचं गुणरत्न सदावर्ते यांनी स्पष्ट केलं आहे. त्यामुळे मनोज जरांगे यांच्या मुंबई आंदोलनाआधीच हा वाद आणखी पेटण्याची शक्यता आहे. मात्र, सदावर्ते यांनी केलेले आरोप आणि दावे हे त्यांचे वैयक्तिक आरोप असून त्यांची स्वतंत्रपणे पडताळणी झालेली नाही, हेही लक्षात घेणं महत्त्वाचं आहे.

Maratha Reservation : जरांगे मुंबईत धडकणार, सरकारची भूमिका स्पष्ट; प्रवीण दरेकर म्हणाले, ‘सरकार चर्चेसाठी तयार’