Mira-Bhayander: पालिकेची सीबीएसई शाळा पुन्हा लांबणीवर? २४ वर्ग खासगी शाळेला भाड्याने देण्याचा प्रस्ताव, महासभेच्या निर्णयाकडे लक्ष
मिरा-भाईंदर : सर्वसामान्य आणि गरीब कुटुंबातील विद्यार्थ्यांना इंग्रजी माध्यमातून दर्जेदार शिक्षण मिळावे, यासाठी मिरा-भाईंदर महापालिकेने २०२३ मध्ये सीबीएसई शाळा सुरू करण्याचा निर्णय घेतला होता. मात्र, निर्णय होऊन तीन वर्षे उलटत आली तरी प्रत्यक्षात शाळा सुरू झालेली नाही. आता इंद्रलोक परिसरातील सीबीएसई शाळेसाठी प्रस्तावित इमारतीतील २४ वर्गखोल्या नामांकित एन. एल. डालमिया शाळेला एका वर्षासाठी भाड्याने देण्याचा प्रस्ताव प्रशासनाने महासभेपुढे मांडला आहे. त्यामुळे पालिकेची सीबीएसई शाळा सुरू होण्यास आणखी विलंब होण्याची शक्यता निर्माण झाली आहे.
राज्यात 526 अनधिकृत शाळांचे जाळे; शिक्षण विभागाची केवळ 8 शाळांवर कारवाई, दंडही वसूल
महापालिकेच्या शहरात सध्या ३६ शाळा असून त्यामध्ये हजारो विद्यार्थी शिक्षण घेत आहेत. या विद्यार्थ्यांना मराठी, हिंदी, उर्दू आणि गुजराती माध्यमातून शिक्षण दिले जाते. खासगी शाळांच्या धर्तीवर सीबीएसई अभ्यासक्रम उपलब्ध करून देण्याच्या उद्देशाने २०२३ मध्ये पालिकेने सीबीएसई शाळा सुरू करण्याचा निर्णय घेतला होता.
या शाळेसाठी इंद्रलोक परिसरातील नवीन इमारत प्रस्तावित करण्यात आली. सुरुवातीला खासगी शैक्षणिक संस्थेच्या माध्यमातून शाळा चालविण्याचा निर्णय घेऊन स्वारस्य अभिव्यक्ती मागवण्यात आली. मात्र, अपेक्षित प्रतिसाद मिळाला नाही. त्यानंतर २०२५ मध्ये पुन्हा निविदा प्रक्रिया राबवण्यात आली. यावेळी नामांकित शैक्षणिक संस्थांकडून प्रतिसाद मिळाला. मात्र, त्यानंतरची पुढील कार्यवाही प्रशासनाकडून रखडल्याने चालू शैक्षणिक वर्षातही सीबीएसई शाळा सुरू होऊ शकलेली नाही.
याच प्रस्तावित इमारतीतील २४ वर्गखोल्या आता एन. एल. डालमिया शाळेला एका वर्षासाठी भाड्याने देण्याचा प्रस्ताव महासभेपुढे ठेवण्यात आला आहे. संबंधित संस्थेकडून महापालिकेला दरमहा सुमारे दीड कोटी रुपये भाडे मिळणार असल्याचे प्रस्तावात नमूद करण्यात आले आहे. एन. एल. डालमिया शाळेच्या मिरा रोड येथील इमारतीत नुकत्याच लागलेल्या आगीमुळे काही भागाचे नुकसान झाले आहे. त्या पार्श्वभूमीवर दुरुस्तीचे काम सुरू असताना काही वर्ग प्रस्तावित इमारतीत स्थलांतरित करण्याचा प्रस्ताव असल्याचे सांगण्यात येत आहे.
विशेष म्हणजे, या प्रस्तावित इमारतीत सध्या महापालिकेच्या शाळेचे काही वर्ग सुरू आहेत. तसेच काही जागेत फिजिओथेरपी केंद्रही सुरू आहे. अशा परिस्थितीत उर्वरित २४ वर्गखोल्या खासगी शैक्षणिक संस्थेला भाड्याने दिल्यास महापालिकेची शाळा आणि खासगी शाळेचे कामकाज एकाच इमारतीत कसे चालणार, असा प्रश्न उपस्थित झाला आहे. या निर्णयामुळे भविष्यात महापालिकेच्या शाळेचे स्थलांतर करण्याची शक्यताही व्यक्त केली जात आहे. मात्र, याबाबत महापालिका प्रशासनाची अधिकृत भूमिका अद्याप स्पष्ट झालेली नाही.
एन. एल. डालमिया शाळेला लागलेल्या आगीमध्ये संबंधित इमारतीतील नाट्यगृह आणि संगणक कक्षाचे नुकसान झाल्याची माहिती अग्निशमन विभागाकडून देण्यात आली होती. वर्गखोल्यांचे मोठ्या प्रमाणात नुकसान झाले नसल्यास विद्यार्थ्यांना प्रस्तावित महापालिका इमारतीत स्थलांतरित करण्याची गरज का निर्माण झाली, असा सवालही उपस्थित केला जात आहे. त्यामुळे प्रस्तावित सीबीएसई शाळेची इमारत एका खासगी शैक्षणिक संस्थेला अप्रत्यक्षपणे वापरासाठी देण्याचा प्रयत्न तर नाही ना, अशी चर्चा सुरू झाली आहे. मात्र, हा केवळ व्यक्त करण्यात आलेला संशय असून त्याला अद्याप कोणतीही अधिकृत पुष्टी मिळालेली नाही.
मुंबईत एकनाथ शिंदेंचा नवा प्लान? सचिन अहिरांकडे संघटनेची धुरा सोपवण्याच्या हालचालींना वेग
एन. एल. डालमिया संस्थेला एका वर्षासाठी जागा देण्यात आल्यानंतर दुरुस्तीचे काम वेळेत पूर्ण न झाल्यास संबंधित संस्थेकडून मुदतवाढ मागितली जाऊ शकते. अशी मुदतवाढ मंजूर झाल्यास पुढील वर्षी देखील प्रस्तावित इमारतीत महापालिकेची सीबीएसई शाळा सुरू करण्यास अडथळा निर्माण होण्याची शक्यता आहे. त्यामुळे महासभा प्रशासनाच्या या प्रस्तावाला मंजुरी देते की प्रस्तावित सीबीएसई शाळेचा प्राधान्याने विचार करून इमारत पालिकेच्या शाळेसाठी राखून ठेवते, याकडे आता पालक, विद्यार्थी आणि शहरवासीयांचे लक्ष लागले आहे.
.png "Videos"){kind=small}
