मुंबई-पुणे एक्स्प्रेसवेवरील मिसिंग लिंक पुन्हा सुरू; दरड हटवल्यानंतर वाहतुकीला हिरवा कंदील

लोणावळा-खोपोली परिसरात झालेल्या विक्रमी पावसानंतर बंद करण्यात आलेल्या मुंबई-पुणे द्रुतगती मार्गावरील मिसिंग लिंकबाबत मोठा दिलासा देणारी बातमी समोर आली आहे. दरड हटविण्याचे काम आणि सुरक्षिततेची तपासणी पूर्ण झाल्यानंतर प्रशासनाने हा मार्ग पुन्हा वाहतुकीसाठी खुला केला आहे.

• मुसळधार पावसामुळे बंद करण्यात आलेली मुंबई-पुणे एक्स्प्रेसवेवरील मिसिंग लिंक अखेर सोमवारी रात्री पुन्हा वाहतुकीसाठी खुली करण्यात आली.
• दरड हटवून तांत्रिक तपासणीनंतर मार्ग सुरक्षित घोषित करण्यात आला असून सध्या दोन लेनवरून वाहतूक सुरू आहे.
• खालापूर फूड मॉल परिसरातील साचलेले पाणी ओसरल्याने एक्स्प्रेसवेवरील वाहतूकही हळूहळू पूर्वपदावर येत आहे.

खोपोली: लोणावळा-खोपोली परिसरातील मुसळधार पावसामुळे बंद करण्यात आलेली मुंबई-पुणे द्रुतगती मार्गावरील मिसिंग लिंक अखेर सोमवारी रात्री उशिरा वाहतुकीसाठी खुली करण्यात आली. दरड हटविण्याचे काम पूर्ण झाल्यानंतर एमएसआरडीसी, सुरक्षा अभियंते आणि संबंधित बांधकाम कंपनीने घटनास्थळाची पाहणी करून मार्ग सुरक्षित असल्याचा अहवाल दिला. त्यानंतर रात्री १०.१० वाजल्यापासून पुण्याकडून मुंबईकडे जाणारी वाहतूक पुन्हा सुरू करण्यात आली.

Raigad News: धाटाव MIDC मध्ये नालेसफाईचा फज्जा? केमिकलयुक्त पाणी रस्त्यावर; नागरिकांची चिंता वाढली

मिसिंग लिंकवरील दुसऱ्या बोगद्याजवळ दरड कोसळली

रविवारी झालेल्या विक्रमी पावसाचा मोठा फटका द्रुतगती मार्गाला बसला होता. लोणावळा परिसरात अवघ्या २४ तासांत ६२५ मिमी, तर खोपोली परिसरात ३२३ मिमी पावसाची नोंद झाली. या अतिवृष्टीमुळे मिसिंग लिंकवरील दुसऱ्या बोगद्याजवळ दरड कोसळली, तर खालापूर येथील फूड मॉल परिसरात पावसाचे पाणी रस्त्यावर आल्याने सकाळच्या सत्रात दोन्ही दिशेची वाहतूक विस्कळीत झाली होती.  (फोटो सौजन्य: Pinterest)

दरड हटविण्याचे काम पूर्ण

पहाटेच्या सुमारास बोगद्याबाहेरील कमानीलगत मोठ्या प्रमाणात माती आणि दगडांचा ढिगारा कोसळल्याने प्रशासनाने तत्काळ संबंधित मार्गिका बंद केली. सुदैवाने या घटनेत कोणतीही जीवितहानी झाली नाही. त्यानंतर महामार्ग प्रशासनाने युद्धपातळीवर दरड हटविण्याचे काम सुरू केले. दिवसभर सुरू असलेली ही मोहीम संध्याकाळपर्यंत पूर्ण करण्यात आली.

केवळ दोनच लेन वाहतुकीसाठी खुल्या

तांत्रिक तपासणी आणि सुरक्षिततेची खात्री झाल्यानंतर वाहतूक सुरू करण्याचा निर्णय घेण्यात आला. मात्र खबरदारीचा उपाय म्हणून सध्या पुण्याकडून मुंबईकडे जाणाऱ्या मार्गिकेतील केवळ दोनच लेन वाहतुकीसाठी खुल्या ठेवण्यात आल्या आहेत. डोंगरावरून अद्याप पाण्याचा प्रवाह सुरू असल्याने उर्वरित दोन लेन तात्पुरत्या बंद ठेवण्यात आल्या आहेत. महामार्ग पोलिसांच्या माहितीनुसार, डोंगरावरील पाण्याचा वेग कमी झाल्यानंतर उर्वरित लेनही टप्प्याटप्प्याने सुरू करण्यात येणार आहेत. तसेच खालापूर येथील फूड मॉल परिसरात महामार्गावर साचलेले पाणीही पूर्णपणे ओसरल्याने वाहतूक आता हळूहळू पूर्वपदावर येत असून, दिवसभर अडकून पडलेल्या प्रवाशांना अखेर मोठा दिलासा मिळाला आहे.

Mumbai Rain Update: मुंबईत पावसाचा हाहाकार! सखल भागांत पाणी साचण्यास सुरुवात; लोकल ट्रेनची वाहतूक उशिराने, रेड अलर्ट जारी

विरोधकांची सत्ताधाऱ्यांवर टीका

सोमवारी मुंबई पुणे मिसिंग लिंकच्या मोठ्या बोगद्या समोर मोठी दरड कोसळली. यानंतर तात्काळ मिसिंग लिंक वाहतुकीसाठी बंद करण्याचा निर्णय घेण्यात आला आहे. याचा एक व्हिडीओ देखील सोशल मीडियावर मोठ्या प्रमाणात व्हायरल झाला आहे. मिसिंग लिंक वाहतुकीसाठी बंद होताच, राजकारण तापले आणि विरोधकांनी सत्ताधाऱ्यांवर टीका करण्यास सुरुवात केली. अनेक राजकीय नेत्यांनी सोशल मीडियावर पोस्ट शेअर करत मिसिंग लिंकच्या बांधकामाबाबत प्रश्न उपस्थित केले.