मुंबईत घर खरेदीत चांगली वाढ
मुंबई : मुंबईत सप्टेंबर २०२६ मध्ये १२६२२ घरांची नोंदणी झाली. हा गेल्या १४ वर्षांतील सर्वात मोठा आकडा आहे. घरांच्या विक्रीतून स्टॅम्प ड्युटीतून मिळणारा महसूल १२२७ कोटी रुपये इतका आहे. ‘नाईट फ्रँक इंडिया’च्या रिपोर्टमध्ये ही माहिती देण्यात आली आहे. सप्टेंबर २०२६ मध्ये मुंबईत तब्बल १२६२२ प्रॉपर्टीजची नोंदणी झाली. गेल्या १४ वर्षांत सप्टेंबर महिन्यात झालेली ही सर्वाधिक नोंदणी आहे.
गेल्या वर्षीच्या तुलनेत यात ५ टक्क्यांची वाढ झाली आहे. एकीकडे घरांची विक्री वाढली असली तरी, राज्य सरकारला मिळणाऱ्या स्टॅम्प ड्युटी (मुद्रांक शुल्क) महसुलात मात्र घट झाली आहे. या महिन्यात सरकारला १२२७ कोटी रुपयांचा महसूल मिळाला. सप्टेंबर २०२५ मध्ये हा आकडा १२९२ कोटी रुपये होता, म्हणजेच यात ५ टक्क्यांची घसरण झाली आहे. व्यवहारांच्या स्वरूपात झालेल्या बदलामुळे ही घट झाल्याचे रिपोर्टमध्ये म्हटले आहे. महिन्यागणिक विचार केला तर, ऑगस्ट २०२६ च्या तुलनेत सप्टेंबरमध्ये नोंदणीत ०.३ टक्क्यांची किरकोळ वाढ झाली.
दरम्यान, ऑगस्टमध्ये १२५८० घरांची नोंदणी झाली होती. मात्र, महसुलात ८ टक्क्यांची वाढ होऊन तो ११३१ कोटी रुपयांवरून वर गेला आहे. सणासुदीच्या काळामुळे या महिन्यात बाजारात चांगलीच उलाढाल पाहायला मिळाली.
गणेशोत्सवात खरेदीत वाढ
१४ ते २५ सप्टेंबर या गणेशोत्सवाच्या काळात मुंबईत ५३७९ घरांची नोंदणी झाली. २०२५ च्या गणेशोत्सवाच्या तुलनेत ही तब्बल २२ टक्क्यांची वाढ आहे. गेल्या चार वर्षांतील सणासुदीच्या काळातील हा सर्वात मोठा आकडा आहे. २०२५ मध्ये ४३९२, २०२४ मध्ये ३४०५ आणि २०२३ मध्ये ३७८२ घरांची नोंदणी झाली होती. विशेष म्हणजे, सप्टेंबर महिन्याच्या एकूण महसुलापैकी निम्म्याहून अधिक महसूल फक्त या सणासुदीच्या काळातच मिळाला.
.png "Videos"){kind=small}
