Shiv Sena : दिवाळीचा फराळ शेतकऱ्यांसोबत; एकनाथ शिंदेंपासून मंत्र्यांपर्यंत बांधावर जाणार, उदय सामंत यांची माहिती
राज्यातील दुष्काळी परिस्थितीमुळे संकटात सापडलेल्या शेतकरी कुटुंबांसोबत यंदाची दिवाळी साजरी करण्याचा निर्णय शिवसेनेने (Shiv Sena) घेतला आहे. उपमुख्यमंत्री एकनाथ शिंदे यांच्या नेतृत्वाखाली शिवसेनेचे मंत्री आणि पदाधिकारी राज्यातील विविध दुष्काळग्रस्त भागांत जाऊन शेतकऱ्यांसोबत दिवाळीचा फराळ करणार आहेत. यंदा शेतकरी हेच आमचे कुटुंब आहे, अशी भावना शिवसेनेचे नेते आणि मंत्री उदय सामंत (Uday Samant) यांनी व्यक्त केली.
दिवाळीच्या सणात आपण आपल्या कुटुंबासोबत आनंद साजरा करत असताना संकटात असलेल्या शेतकरी बांधवांच्या दुःखात सहभागी होणे ही आपली सामाजिक जबाबदारी आहे. केवळ आर्थिक मदत देऊन जबाबदारी संपत नाही, तर संकटाच्या काळात शेतकऱ्यांच्या पाठीशी उभे राहणे, त्यांच्याशी संवाद साधणे आणि त्यांना मानसिक आधार देणेही महत्त्वाचे आहे. याच भावनेतून शिवसेनेने हा निर्णय घेतल्याचे उदय सामंत यांनी सांगितले.
उपमुख्यमंत्री एकनाथ शिंदे जालना जिल्ह्यात शेतकऱ्यांसोबत दिवाळी साजरी करणार आहेत. तर उदय सामंत स्वतः नांदेड जिल्ह्यातील सायाळ येथे शेतकरी कुटुंबांसोबत दिवाळीचा फराळ करणार आहेत.
शिवसेनेचे विविध मंत्री राज्यातील दुष्काळग्रस्त भागांमध्ये जाऊन शेतकरी कुटुंबांची भेट घेणार आहेत. त्यांचे नियोजित दौरे पुढीलप्रमाणे :
गुलाबराव पाटील – पोखरी तांडा, जळगाव
प्रताप सरनाईक – पानखंडा, धाराशिव
दादा भुसे – मालेगाव
संजय शिरसाट – शिंदोण तांडा, छत्रपती संभाजीनगर
शंभूराज देसाई – खटाव, सातारा
प्रकाश आबिटकर – आटपाडी, उंबरगाव, सांगली
भरत गोगावले – भोर, पुणे
संजय राठोड – मंगरूळ, यवतमाळ
योगेश कदम – पालघर
आशिष जयस्वाल – कोलिथमारा, नागपूर
शिवसेनेच्या माध्यमातून आतापर्यंत सुमारे सात ते साडेसात लाख शेतकरी कुटुंबांपर्यंत शिधावाटप पोहोचवण्यात आले आहे. आणखी चार ते पाच लाख शेतकरी कुटुंबांपर्यंत मदत पोहोचवण्याचा संकल्प असल्याचे उदय सामंत यांनी सांगितले.
तसेच दुष्काळग्रस्त भागांमध्ये पाण्याची उपलब्धता सुलभ व्हावी, यासाठी प्रत्येक जिल्ह्यात ट्रॅक्टरला जोडता येणारे दोन ते अडीच हजार लिटर क्षमतेचे टँकर उपलब्ध करून देण्याचा निर्णय घेण्यात आला आहे.
शेतकऱ्यांसोबत दिवाळी साजरी करणे हा केवळ एक दिवसाचा दौरा किंवा औपचारिक उपक्रम नाही. दिवाळी संपली म्हणून शेतकऱ्यांप्रती असलेली जबाबदारी संपणार नाही. शासनाच्या माध्यमातून मदतकार्य सुरूच राहील आणि शिवसेनेचे सामाजिक कार्यही पुढे सुरू राहील, असे सामंत यांनी स्पष्ट केले.
दरवर्षी आपण आपल्या कुटुंबासोबत दिवाळी साजरी करतो; मात्र यंदा शेतकरी हेच आमचे कुटुंब आहे. संकटात असलेला प्रत्येक शेतकरी महायुती सरकारसाठी महत्त्वाचा आहे. त्यांच्या बांधावर जाऊन त्यांच्यासोबत फराळ करणे आणि त्यांच्या सुख-दुःखात सहभागी होणे, हीच यंदाच्या दिवाळीची खरी भावना असल्याचे उदय सामंत यांनी सांगितले.
Ans: शिवसेना यंदाची दिवाळी राज्यातील दुष्काळग्रस्त शेतकरी आणि त्यांच्या कुटुंबांसोबत साजरी करणार आहे.
Ans: उदय सामंत नांदेड जिल्ह्यातील सायाळ येथे शेतकरी बांधवांसोबत दिवाळी साजरी करणार आहेत.
Ans: उपमुख्यमंत्री एकनाथ शिंदे जालना जिल्ह्यात शेतकऱ्यांसोबत दिवाळी साजरी करणार आहेत.
.png "Videos"){kind=small}
