Devendra Fadnavis on Manoj Jarange Patil
Devendra Fadnavis On Manoj Jarange Patil: मनोज जरांगे पाटील (Manoj Jarange Patil) यांनी पुन्हा एकदा मराठा आरक्षणासाठी आझाद मैदानावर उपोषण सुरू केले आहे. उपोषणाचा आज तिसरा दिवस आहे, तरीही सरकारकडून कोणताही तोडगा निघताना दिसत नाहीये. या पार्श्वभूमीवर, राज्याचे मुख्यमंत्री देवेंद्र फडणवीस (Devendra Fadnavis) यांनी एका वृत्तवाहिनीशी बोलताना सरकारची भूमिका स्पष्ट केली आहे.
देवेंद्र फडणवीस म्हणाले की, मनोज जरांगे पाटील ज्या मागण्या करत आहेत, त्याकडे सरकार सकारात्मक दृष्टिकोनातून पाहत आहे. ते मराठा समाजाला सरसकट ओबीसीत समाविष्ट करण्याची मागणी करत आहेत. परंतु, न्यायालयाचे काही निर्णय आहेत आणि या निर्णयांचा अवमान करता येणार नाही.
फडणवीस यांनी स्पष्ट केले की, कायद्याच्या चौकटीबाहेर जाऊन जर असा निर्णय केवळ लोकांना खुश करण्यासाठी घेतला, तर तो न्यायालयात एकाही दिवसासाठी टिकणार नाही. अशा परिस्थितीत मराठा समाजाची फसवणूक झाल्याची भावना निर्माण होईल.
मुख्यमंत्र्यांनी सांगितले की, राधाकृष्ण विखे पाटील यांच्या नेतृत्वाखालील मंत्रिमंडळ उपसमिती यावर चर्चा करत आहे. तसेच, राज्याच्या महाधिवक्त्यांसोबत आणि कायदेशीर सल्लागारांसोबतही चर्चा सुरू आहे.
फडणवीस म्हणाले की, लोकशाहीमध्ये चर्चेतून तोडगा निघतो, आडमुठ्या भूमिकेतून नाही. सरकार कायद्यानुसार चालते. मंत्रिमंडळ उपसमितीने जरांगे पाटील यांच्या मागण्यांवर सकारात्मक निर्णय घेतले आहेत आणि जिथे कायदेशीर अडचणी आहेत, त्याची माहिती त्यांना दिली आहे.
फडणवीस यांनी आपल्या भाषणात सांगितले की, राज्य सरकारने २०१४ ते २०२५ या काळात मराठा समाजाच्या हितासाठी अनेक सकारात्मक निर्णय घेतले आहेत. ते म्हणाले, “पहिलं आरक्षण माझ्या नेतृत्वात सरकारने दिलं, दुसरं एकनाथ शिंदे यांच्या नेतृत्वात दिलं, आणि आता पुन्हा माझ्या नेतृत्वातील हे सरकार मराठा समाजाच्या हितासाठीच निर्णय घेत आहे.” या संपूर्ण परिस्थितीतून, फडणवीस यांनी सरकारची कायदेशीर आणि व्यावहारिक भूमिका स्पष्ट केली आहे.
.png "Videos"){kind=small}
