कृषी केंद्रासाठी ८८० कोटी मंजूर
नागपूर : नागपूर येथील डॉ. पंजाबराव देशमुख कृषी विद्यापीठाच्या मौजा दाभा परिसरातील जागेवर उभारण्यात येणाऱ्या जागतिक दर्जाच्या ‘आंतरराष्ट्रीय कृषी सुविधा केंद्रा’च्या बांधकामासाठी राज्य मंत्रिमंडळाने ८७९.६३ कोटींच्या सुधारित प्रशासकीय खर्चाला मंजुरी दिली आहे. मुख्यमंत्री देवेंद्र फडणवीस यांच्या अध्यक्षतेखाली झालेल्या मंत्रिमंडळाच्या बैठकीत हा निर्णय घेतला.
प्रकल्पाच्या पहिल्या टप्प्यासाठी यापूर्वी २३५ कोटींची तरतूद केली होती. मात्र, त्यात ३४२.७२ कोटींची वाढ करून पहिल्या टप्प्यासाठी ५७७.७२ कोटींच्या सुधारित प्रशासकीय खर्चाला मान्यता दिली आहे. दुसऱ्या टप्प्यातील बांधकामासाठी ३०१.९१ कोटींचा निधी मंजूर केला आहे. अशा प्रकारे प्रकल्पासाठी १८७९.६३ कोटींची तरतूद केली आहे. आंतरराष्ट्रीय कृषी संशोधन केंद्राच्या माध्यमातून कृषी क्षेत्रातील आधुनिक ज्ञान, संशोधन, अद्ययावत तंत्रज्ञान आणि कृषी प्रदर्शनांना प्रोत्साहन मिळणार आहे. आंतरराष्ट्रीय स्तरावरील संवाद, विचारांची देवाणघेवाण आणि कृषीविषयक नवकल्पनांसाठी हे केंद्र महत्त्वाचे व्यासपीठ ठरणार आहे.
केंद्राचे कामकाज सुरळीत चालावे आणि त्यासाठी व्यावसायिक स्वरूपाचे प्रारूप तयार करता यावे, यासाठी राज्याच्या मुख्य सचिवांच्या स्तरावर नियामक समिती तसेच स्वतंत्र व्यवस्थापन समिती स्थापन करण्यात येणार आहे. या आंतरराष्ट्रीय केंद्राच्या बांधकामाची जबाबदारी महाराष्ट्र राज्य पायाभूत सुविधा विकास महामंडळाकडे (एमएसआयडीसी) सोपवली आहे.
बिडगाव नगरपंचायत भवनासाठी १.८६ हेक्टर
जिल्ह्यातील बिडगाव तिरोडी (खुर्द) नगर पंचायतीच्या प्रशासकीय भवनाच्या बांधकामासाठी कामठी तालुक्यातील मौजा बिडगाव येथील १.८६ हेक्टर शासकीय जमीन विनामूल्य हस्तांतरित करण्यास राज्य मंत्रिमंडळाने मंजुरी दिली आहे. मुख्यमंत्री देवेंद्र फडणवीस यांच्या अध्यक्षतेखाली झालेल्या बैठकीत हा निर्णय घेतला.
जमिन हस्तांतरित करण्यास मान्यता
नागरिकांच्या सोयीसुविधा आणि सार्वजनिक हित लक्षात घेऊन मौजा बिडगाव येथील सर्वे क्रमांक ३१, ३२ आणि ३३ मधील अनुक्रमे ०.६७, १.०६ आणि ०.१३ हेक्टर अशी एकूण १.८६ हेक्टर जमीन नगर पंचायतीच्या मुख्याधिकाऱ्यांकडे हस्तांतरित करण्यास मान्यता दिली आहे. यामुळे नगर पंचायतीच्या प्रशासकीय भवनाच्या उभारणीचा मार्ग मोकळा झाला आहे.
FAQ
१. आंतरराष्ट्रीय कृषी सुविधा केंद्र कुठे उभारण्यात येणार आहे?
नागपूर येथील डॉ. पंजाबराव देशमुख कृषी विद्यापीठाच्या मौजा दाभा परिसरातील जागेवर हे केंद्र उभारण्यात येणार आहे.
२. या प्रकल्पासाठी किती निधी मंजूर करण्यात आला आहे?
प्रकल्पाच्या सुधारित प्रशासकीय खर्चासाठी ८७९.६३ कोटी रुपयांना मंजुरी देण्यात आली आहे.
३. हा निर्णय कोणी घेतला?
मुख्यमंत्री देवेंद्र फडणवीस यांच्या अध्यक्षतेखाली झालेल्या राज्य मंत्रिमंडळाच्या बैठकीत हा निर्णय घेण्यात आला.
.png "Videos"){kind=small}
