Nagpur News :कचरा प्रक्रिया केंद्रात घडला अपघात; ट्रॉमल मशीनमध्ये अडकून कामगाराचा मृत्यू

Nagpur News : नागपुरातील वाठोडा परिसरातील कचरा वर्गीकरण केंद्रात ट्रॉमल मशीनची स्वच्छता करताना पाय घसरून मशीनमध्ये अडकल्याने सलमान अयुब खान (२८) या कामगाराचा मृत्यू झाला. घटनेनंतर कामगारांच्या सुरक्षेचा प्रश्न ऐरणीवर आला असून वाठोडा पोलीस तपास करीत आहेत.

• स्वच्छता करताना पाय घसरला; मशीनमध्ये अडकला कामगार
• कुटुंबीयांचा संताप; नुकसानभरपाईचे आश्वासन
• कामगारांच्या सुरक्षेचा प्रश्न ऐरणीवर; पोलिसांकडून तपास सुरू

Nagpur News : कामाच्या ठिकाणी सुरक्षेचा अभाव पुन्हा एकदा जीवावर बेतल्याची घटना नागपुरात समोर आली आहे. कचरा वर्गीकरण केंद्रात मशीनची स्वच्छता करताना पाय घसरून यंत्रात अडकल्याने एका २८ वर्षीय कामगाराचा दुर्दैवी मृत्यू झाला. वाठोडा परिसरातील बिडगाव रोडवर असलेल्या कचरा वर्गीकरण प्रकल्पात मंगळवारी सकाळी हा अपघात घडला. या घटनेनंतर प्रकल्पातील कामगारांच्या सुरक्षेचा मुद्दा पुन्हा ऐरणीवर आला आहे.

स्वच्छता करताना पाय घसरला; मशीनमध्ये अडकला कामगार

सलमान अयुब खान (२८, रा. अंतुजीनगर, भांडेवाडी) असे मृत कामगाराचे नाव आहे. मंगळवारी सकाळी साडेसातच्या सुमारास सलमान हा सहकारी कामगार अक्षय बेलकर याच्यासोबत ट्रॉमल मशीनवर चढून कचरा स्वच्छ करण्याचे काम करीत होता. याचदरम्यान अचानक त्याचा पाय घसरला आणि तो मशीनमध्ये अडकला.

या अपघातात सलमान गंभीर जखमी झाला. घटनेनंतर प्रकल्पातील कर्मचाऱ्यांची धावपळ उडाली. कंपनीच्या कर्मचाऱ्यांनी तातडीने त्याच्या कुटुंबीयांना माहिती दिली आणि त्याला उपचारासाठी पारडी परिसरातील खासगी रुग्णालयात दाखल केले. मात्र, डॉक्टरांनी तपासणीअंती त्याला मृत घोषित केले.

Nagpur News : जिल्ह्यात बोअरवेल खोदकामांवर बंदी; जिल्हाधिकाऱ्यांचा सुधारित आदेश

कुटुंबीयांचा संताप; नुकसानभरपाईचे आश्वासन

घटनेची माहिती मिळताच वाठोडा पोलिसांनी घटनास्थळी धाव घेतली. पंचनामा केल्यानंतर मृतदेह शवविच्छेदनासाठी मेडिकल रुग्णालयात पाठवण्यात आला. सलमानचे वडील अयुब खान यांच्या तक्रारीवरून पोलिसांनी आकस्मिक मृत्यूची नोंद केली आहे.

दरम्यान, सलमानच्या मृत्यूची बातमी समजताच कुटुंबीय आणि प्रकल्पातील कामगारांनी नाराजी व्यक्त केली. त्यामुळे काही काळ परिसरात तणावाचे वातावरण निर्माण झाले होते. परिस्थिती लक्षात घेऊन कंपनीच्या अधिकाऱ्यांनी कुटुंबीयांशी चर्चा केली. त्यांना योग्य नुकसानभरपाई देण्याचे आश्वासन देण्यात आल्याची माहिती आहे.

Nagpur News : ट्रान्सफार्मरमधील ऑईल चोरणारे जेरबंद; २१ लाख ७५ हजारांचा मुद्देमाल जप्त

कामगारांच्या सुरक्षेचा प्रश्न ऐरणीवर; पोलिसांकडून तपास सुरू

महापालिकेने कचरा वर्गीकरणाचे काम एसयूएसबीडीई कंपनीकडे सोपवले आहे. मात्र, या प्रकल्पात घडलेल्या अपघातामुळे कामगारांच्या सुरक्षेसाठी आवश्यक उपाययोजना केल्या जातात का, असा प्रश्न उपस्थित झाला आहे.

मशीनची स्वच्छता करताना ती पूर्णपणे बंद होती का, कामगारांना आवश्यक सुरक्षा साधने पुरवण्यात आली होती का आणि सुरक्षा नियमांचे पालन केले जात होते का, याची तपासणी होणे गरजेचे आहे. दरम्यान, हा अपघात नेमका कशामुळे घडला आणि त्यामागे कोणाचा निष्काळजीपणा आहे का, याचा तपास वाठोडा पोलीस करीत आहेत.