Nagpur News : कागदी आदेश झुगारला; प्रत्यक्ष जप्ती करा, हायकोर्टाचा दणका

Nagpur News : कागदी आदेश काढून कारवाई झाल्याचे दाखवू नका, तर प्रत्यक्ष जप्तीची प्रक्रिया राबवा, अशा कडक शब्दांत नागपूर खंडपीठाने प्रशासनाला सुनावले. न्यायालयाच्या या भूमिकेमुळे संबंधित प्रकरणातील कारवाईला वेग येण्याची शक्यता आहे.

• १ नोव्हेंबरपर्यंत डीजे आणि मॉडिफाय वाहनांवर पूर्ण बंदी
• न्यायालयाची महत्त्वाची निरीक्षणे
• पोळा मिरवणुकीतील व्हिडीओने उघड केली पोलखोल

Nagpur News : सण-उत्सवांच्या काळात वाजणाऱ्या बेकायदेशीर आणि कानठळ्या बसवणाऱ्या डीजे तसेच साऊंड सिस्टीमवर मुंबई उच्च न्यायालयाच्या नागपूर खंडपीठाने अत्यंत कडक भूमिका घेतली आहे. केवळ मनाई आदेश किंवा अधिसूचना काढल्याने ध्वनीप्रदूषणाची समस्या सुटणार नाही, असे स्पष्ट करीत न्यायमूर्ती उर्मिला जोशी-फाळके आणि न्यायमूर्ती राज वाकोडे यांच्या खंडपीठाने पोलिसांना मैदानावर उतरून थेट उपकरणे जप्त करण्याचे व कडक पावले उचलण्याचे निर्देश दिले आहे. नियम मोडणाऱ्या डीजे चालकांसह उत्सव आयोजकांवरही गुन्हे दाखल करण्याचे संकेत कोर्टाने दिले आहे.

१ नोव्हेंबरपर्यंत डीजे आणि मॉडिफाय वाहनांवर पूर्ण बंदी

सुनावणीदरम्यान पोलिस प्रशासनाने न्यायालयात शपथपत्र सादर करून माहिती दिली की, भारतीय नागरिक सुरक्षा संहिता, २०२३च्या कलम १६३ अन्वये २ सप्टेंबरला अधिसूचना काढली आहे. यानुसार आगामी दहीहंडी, पोळा, गणेशोत्सव, दुर्गापूजा, ताजुद्दीन बाबा उरूस आणि धम्मचक्र प्रवर्तन दिनाच्या पार्श्वभूमीवर ३ सप्टेंबरच्या मध्यरात्रीपासून १ नोव्हेंबरच्या मध्यरात्रीपर्यंत सर्व प्रकारचे डीजे, मल्टी-स्पीकर, प्लाझ्मा साऊंड सिस्टीम आणि साऊंडसाठी बदल केलेल्या वाहनांच्या वापरावर पूर्ण बदी असेल. सर्व डीजे मालकांना ही उपकरणे कुलूपबंद ठेवण्याचे निर्देश दिले आहे.

Nagpur News : गोल्डन रिंग रोडवर उभारणार ‘युटिलिटी कॉरिडोर’

न्यायालयाची महत्त्वाची निरीक्षणे

कागदी घोडे नाचवणे थांबवा केवळ कागदावर आदेश काढून आणि नोटीस देऊन पोलिस प्रशासनाला जबाबदारी झटकता येणार नाही, असे कोर्टाने सुनावले. उपकरणे जप्त करा डीजे चालकांकडून नियमभंग होणार नाही याची खबरदारी घेण्यासाठी त्यांची वाहने आणि अवजड साऊंड सिस्टीम जप्त करणे आवश्यक असल्याचे न्यायालयाने मान्य केले.

घटनास्थळी ठोस कारवाई पोलिस आयुक्त आणि उपआयुक्तांनी स्वतः लक्ष घालून प्रत्यक्ष घटनास्थळी जाऊन जप्तीची आणि दंडात्मक कारवाई करावी, असे निर्देश हायकोर्टाने दिले.

Nagpur News : २५ हजार पगार, हातात १५ हजार! विकास ठाकरे आक्रमक; दोषींवर गुन्ह्याची मागणी

पोळा मिरवणुकीतील व्हिडीओने उघड केली पोलखोल

मंडलेकर यांनी न्यायालयात पोळा सणादरम्यान काढलेल्या मिरवणुकीचे चित्रीकरण सादर केले. पोलिसांनी मनाई हुकूम जारी केला असतानाही आवाजाच्या तीव्रतेच्या सर्व मर्यादा पायदळी तुडवल्याचे व्हिडीओतून स्पष्ट झाले. न्यायालयाने या फुटेजची आणि आवाजाच्या डेसिबल पातळीची पडताळणी केली असता ध्वनीची पातळी कायद्याने ठरवून दिलेल्या मर्यादेपेक्षा कितीतरी पटीने जास्त असल्याचे निष्पन्न झाले. या पार्श्वभूमीवर ११ सप्टेंबर ते १ नोव्हेंबर कालावधीत विदर्भातील प्रत्येक जिल्ह्यांत नियमांची कठोर अंमलबजावणी करण्याचे आदेश राज्य सरकारला दिले आहे.