'महाराष्ट्राचा स्वाभिमान हरपला'; नाना पाटेकरांच्या निधनाने एकनाथ शिंदे भावुक, राजकीय नेत्यांकडून श्रद्धांजली
उपमुख्यमंत्री एकनाथ शिंदे यांनी नाना पाटेकर यांच्या निधनाबद्दल तीव्र दुःख व्यक्त केले. नाना पाटेकर हे केवळ एक उत्कृष्ट अभिनेते नव्हते, तर अभिनयाची जिवंत शाळा होते. संवादफेक, मुद्राभिनय आणि भूमिकांमधील सहजता या सर्व बाबतीत त्यांनी स्वतःची वेगळी शैली निर्माण केली होती, असे शिंदे यांनी म्हटले.
नानांसोबतच्या वैयक्तिक आठवणी सांगताना शिंदे भावुक झाले. पुण्यातील त्यांच्या घरी दरवर्षी गणपती दर्शनासाठी जात असल्याचे त्यांनी सांगितले. गेल्या आठवड्यात गणपती दर्शनादरम्यान झालेली भेट शेवटची ठरेल, असे कधी वाटले नव्हते, अशी भावना त्यांनी व्यक्त केली.
‘काय क्रांतिवीर…’ अशी प्रेमाने मारलेली हाक आणि पाठीवर दिलेली कौतुकाची थाप मी कधीच विसरणार नाही, असे शिंदे म्हणाले.
नाना पाटेकर यांनी शिंदे यांच्या दरे येथील निवासस्थानी भेट देऊन शेतीची पाहणी केली होती. गाळ उपसण्याच्या कामासाठीही त्यांनी पुढाकार घेतला होता. ‘नाम फाउंडेशन’च्या माध्यमातून शेतकरी आणि दुष्काळग्रस्त कुटुंबांसाठी त्यांनी केलेले कार्य महाराष्ट्र कायम स्मरणात ठेवेल, असे शिंदे यांनी नमूद केले.
उपमुख्यमंत्री सुनेत्रा अजित पवार यांनी नाना पाटेकर यांच्या निधनाने भारतीय कलाविश्व आणि समाजकारणाची मोठी हानी झाल्याचे म्हटले.
नाना पाटेकर यांच्या अभिनयातील सहजता, प्रभावी संवादफेक आणि संवेदनशील व्यक्तिमत्त्वाचा उल्लेख करत त्यांनी ‘नटसम्राट’, ‘क्रांतिवीर’ आणि ‘परिंदा’ यांसारख्या चित्रपटांमधील त्यांच्या भूमिकांची आठवण करून दिली. नाना पाटेकर यांचे अजित पवार यांच्याशी अत्यंत जिव्हाळ्याचे संबंध होते. कौटुंबिक सुख-दुःखाच्या प्रसंगी नाना नेहमी पाठीशी उभे राहत असत. त्यामुळे त्यांच्या जाण्याने संपूर्ण पवार कुटुंबासाठी मोठी वैयक्तिक पोकळी निर्माण झाल्याची भावना सुनेत्रा पवार यांनी व्यक्त केली.
विधानपरिषद उपसभापती सचिन अहिर यांनी नाना पाटेकर यांच्या निधनाने चित्रपटसृष्टी पोरकी झाल्याचे म्हटले. चार दशकांहून अधिक काळ आपल्या अभिनयाने प्रेक्षकांच्या मनावर अधिराज्य गाजवणारे नाना पाटेकर हे समाजाच्या दुःखाशी थेट जोडलेले संवेदनशील व्यक्तिमत्त्व होते, असे अहिर म्हणाले. ‘नटसम्राट’, ‘परिंदा’, ‘क्रांतिवीर’ आणि ‘अपहरण’ यांसारख्या चित्रपटांमधून त्यांनी साकारलेल्या भूमिका प्रेक्षकांच्या मनात कायम राहतील. त्यांचा भारदस्त आवाज, संवादफेकीची आगळीवेगळी शैली आणि डोळ्यांतून व्यक्त होणाऱ्या भावना या त्यांच्या अभिनयाची वैशिष्ट्ये होती, असे त्यांनी सांगितले.
सांस्कृतिक कार्यमंत्री ॲड. आशिष शेलार यांनी नाना पाटेकर यांच्या निधनाबद्दल शोक व्यक्त करत त्यांना करारी, प्रतिभावान आणि संवेदनशील कलाकार म्हणून श्रद्धांजली अर्पण केली. मध्यमवर्गीय कामगार मराठी कुटुंबातून पुढे येत नाना पाटेकर यांनी अपार मेहनतीच्या जोरावर चित्रपटसृष्टीत स्वतःचे स्थान निर्माण केले. त्यांच्या अभिनयातील वेगळेपणा आणि स्पष्टवक्तेपणा यामुळे ते कायम प्रेक्षकांच्या स्मरणात राहतील, असे शेलार म्हणाले.नाना पाटेकर यांना महाराष्ट्र शासनाच्या स्वर्गीय राज कपूर विशेष योगदान पुरस्कार २०१३ सह अनेक पुरस्कारांनी गौरविण्यात आले होते. त्यांच्या निधनाने गिरणगावातील एक अस्सल, इरसाल आणि उत्सवप्रेमी मराठी माणूस हरपल्याची भावना शेलार यांनी व्यक्त केली.
उद्योगमंत्री डॉ. उदय सामंत यांनी नाना पाटेकर यांच्यासोबतच्या मैत्रीच्या आठवणींना उजाळा दिला. नानांसोबतचे संबंध केवळ सार्वजनिक जीवनापुरते मर्यादित नव्हते, तर त्यांच्याशी अत्यंत जिव्हाळ्याचे आणि मनापासूनचे मैत्रीचे नाते होते, असे सामंत यांनी सांगितले. ‘माझ्यावर प्रेमाने रागावणारा, चिडणारा एक आपला माणूस आज आपल्यातून निघून गेला,’ अशा शब्दांत त्यांनी दुःख व्यक्त केले. नाना पाटेकर यांचा परखड स्वभाव, माणसांकडे पाहण्याचा संवेदनशील दृष्टिकोन आणि योग्य वाटणाऱ्या गोष्टीसाठी ठामपणे उभे राहण्याची वृत्ती कायम स्मरणात राहील, असे सामंत यांनी नमूद केले.
नाना पाटेकर यांनी आपल्या अभिनय कारकिर्दीत अनेक अविस्मरणीय भूमिका साकारल्या. मात्र, त्यांचे कार्य केवळ चित्रपटसृष्टीपुरते मर्यादित नव्हते. ‘नाम फाउंडेशन’च्या माध्यमातून त्यांनी शेतकरी, दुष्काळग्रस्त आणि गरजू कुटुंबांना मदतीचा हात दिला. शेतकऱ्यांच्या अडचणी समजून घेण्यासाठी त्यांनी ग्रामीण भागात प्रत्यक्ष भेटी दिल्या. त्यांच्या या सामाजिक बांधिलकीची आठवण अनेक नेत्यांनी आपल्या शोकसंदेशातून करून दिली. नाना पाटेकर यांच्या निधनामुळे मराठी आणि हिंदी चित्रपटसृष्टीसह सामाजिक क्षेत्रातही मोठी पोकळी निर्माण झाल्याची भावना विविध मान्यवरांनी व्यक्त केली आहे.
.png "Videos"){kind=small}
