Ganpati Decoration 2026: यंदा बाप्पाची आरास खिशाला कात्री लावणार! डेकोरेशन साहित्याच्या किमतीत 20 ते 30 टक्के वाढ

Ganpati Decoration 2026: गणेशोत्सवाच्या पार्श्वभूमीवर बाप्पाच्या आराससाठी यंदा पारंपरिक सजावटीसोबत आधुनिक डेकोरेशनला पसंती मिळत आहे. आकर्षक कागदी मंदिरे आणि विविध प्रकारच्या LED लायटिंगला ग्राहकांकडून मागणी वाढली आहे.

• बाप्पाच्या आरासला आधुनिक साज
• कागदी मंदिरांसह एलईडी लायटिंगला पसंती
• डेकोरेशन साहित्य २०-३० टक्क्यांनी महाग

खान नजमूल इस्लाम, नाशिक: गणरायाच्या आगमनाची तयारी सुरू झाली असून, गणेशोत्सवाच्या पार्श्वभूमीवर जुने नाशिक (Nashik) परिसरातील बाजारपेठेत सजावटीच्या साहित्याची मोठी रेलचेल पाहायला मिळत आहे. घरगुती तसेच सार्वजनिक गणेश मंडळांच्या आरास सजावटीसाठी आधुनिक, आकर्षक आणि पर्यावरणपूरक साहित्याला यंदा ग्राहकांची विशेष पसंती मिळत आहे. मात्र, गेल्या वर्षीच्या तुलनेत सजावटीच्या साहित्याच्या दरात २०-३० टक्क्यांहून अधिक वाढ झाल्याची माहिती व्यापाऱ्यांनी दिली. इलेक्ट्रॉनिक व इलेट्रिकल साहित्याबरोबरच कापड, प्लास्टिक आणि इतर कच्या मालाच्या किमती वाढल्याने सजावटीच्या वस्तू महागल्याचे जुने नाशिकमधील होलसेल सजावट साहित्य विक्रेत्यांनी सांगितले.(Ganpati Decoration 2026)

Ganesh Chaturthi: गणपती बाप्पाला २१ दुर्वा का अर्पण करतात? जाणून घ्या दुर्वांचे धार्मिक महत्त्व

मल्टीकलर लाईटस्, तोरणचे आकर्षण

यंदा थ्रीडी फोल्डेबल मखर, मखमली मखर, कागदी व पुठ्ठयाचे रेडीमेड मंदिर, विविध धार्मिक व ऐतिहासिक थीमचे बॅकड्रॉप, गोवर्धन पर्वत, राम मंदिर तसेच शिवकालीन गड-किल्ल्यांच्या प्रतिकृतींना मागणी आहे. कमी जागेत सहज बसणारे आणि वापरल्यानंतर साठवून ठेवता येणारे फोल्डेबल मखर ग्राहकांच्या पसंतीस उतरले आहे.

सजावटीमध्ये एलईडी चक्र, लायटिंग तोरण, मल्टीकलर लाइट्स, लेझर लाइट्स, फेरी लाइट्स आणि डिजिटल लाइटिंग बैकड्रॉप यंदाचे प्रमुख आकर्षण ठरत आहे. पारंपरिक सजावटीसोबत कृत्रिम झेंडूच्या माळा, मोगऱ्याच्या कळ्यांचे लटकन, विविध रंगांच्या कापडी व प्लास्टिकच्या वेली यांनाही मागणी वाढली आहे.

कापडी बॅकड्रॉप, रेडिमेड मंदिराला मागणी

गणेशभक्तांकडून कमी खर्चात आकर्षक आरास करण्याला प्राधान्य दिले जात आहे. त्यामुळे तयार सजावटीचे किट, कागदी मखर, कापडी बेंकड्रॉप आणि रेडीमेड मंदिराच्या डिझाइनला चांगली मागणी असल्याचे व्यापाऱ्यांनी सागितले. “थर्माकोलच्या वापरावर निर्बंध आल्यापासून ग्राहकांचा कल कापडी बॅकड्रॉप, मखमली मखर आणि कागदी रेडीमेड मंदिरांकडे वाढला आहे. कमी बजेटमध्ये आकर्षक सजावट करता येत असल्याने रेडी-टू-यूज साहित्याला यंदा चांगला प्रतिसाद मिळत आहे, अशी माहिती जुने नाशिकमधील सजावट साहित्य विक्रेत्यांनी दिली.

एलईडी सिरीज लाइटिंग – १०० ते ५००
प्लास्टिक फुलांच्या माळा – ५० ते ३००
डेकोरेटिव्ह बल्ब – ३० ते १५०
पडदा एलईडी लाईट – ३०० ते १,०००
एलईडी माळ – ५० ते २००
एलईडी पट्टी – ५० ते ३००

Ganeshotsav 2026 : गणेशाच्या नैवेद्यासाठी बनवा हेल्दी आणि टेस्टी ‘ड्रायफ्रुट्स मोदक’, काही मिनिटांची रेसिपी