PCMC महापालिका आयुक्तांच्या बैठकीत महत्वाचे निर्णय; पवना नदी सुधार प्रकल्प अन्…

पिंपरी: चिंचवड विधानसभा मतदारसंघातील (PCMC) महत्त्वपूर्ण विकासकामांना गती देण्यासाठी महापालिकेचे आयुक्त श्रावण हर्डीकर यांच्या उपस्थितीत बैठक घेण्यात आली. या बैठकीत वाहतूक व्यवस्थापन (Traffic), पायाभूत सुविधा, मिसिंग लिंक रस्ते आणि पवना नदी सुधार प्रकल्पाबाबत सविस्तर चर्चा करण्यात आली. तातडीने कार्यवाही करण्याचे स्पष्ट निर्देश प्रशासनाला देण्यात आले.

बैठकीदरम्यान विशेषतः काळेवाडी एम.के. चौकातील ग्रेड सेपरेटर, पिंपळे गुरवमधील अंडरपास, तसेच स्वराज्य चौक आणि पिंपळे सौदागर परिसरातील प्रस्तावित उड्डाणपुलांची कामे तातडीने सुरू करण्याच्या सूचना देण्यात आल्या. या प्रकल्पांमुळे वाढत्या वाहतूक कोंडीला मोठा दिलासा मिळणार असल्याचे आयुक्तांनी स्पष्ट केले.

प्रवास सुखकर होणार! पुण्याच्या ‘या’ भागातील वाहतूक कोंडी सोडवण्यासाठी PMRDA चा मोठा निर्णय

मतदारसंघातील महत्त्वाच्या मिसिंग लिंक रस्त्यांची कामे वेगाने पूर्ण करण्याची गरज अधोरेखित करण्यात आली. संत गार्डन–काळेवाडी पूल मार्ग, मोरया स्टेडियम–काकडे टाऊनशिप रस्ता तसेच वाकड परिसरातील काही प्रमुख लिंक रस्त्यांची कामे अंतिम टप्प्यात आहेत. उर्वरित अडथळे दूर करण्यासाठी महापालिका आणि संबंधित विभागांमध्ये समन्वय वाढवण्याचे निर्देश देण्यात आले. या मार्गांमुळे वाहतूक व्यवस्था अधिक सुसूत्र होण्यास मदत होणार आहे.

किवळे, मामुर्डी आणि रावेत परिसरात वाढत्या निवासी क्षेत्रांचा विचार करून पार्क, रस्ते, नागरी सुविधा केंद्रे व विरंगुळा केंद्रे विकसित करण्याचे आदेश देण्यात आले. आरक्षणे तातडीने विकसित करण्यावर भर देण्यात येणार असून नागरिकांना स्वच्छ, सुरक्षित आणि दर्जेदार सुविधा मिळाव्यात यासाठी महापालिकेला नियोजनबद्ध पद्धतीने काम करण्यास सांगितले.

वाकड ते मामुर्डी रस्ता होणार ‘सुसाट’! आमदार शंकर जगतापांनी अधिकाऱ्यांना दिल्या महत्वाच्या सूचना

याच बैठकीत पवना नदी सुधार प्रकल्पाला विशेष चालना देण्यात येणार असल्याचेही सांगितले. प्रकल्पातील तांत्रिक आणि निधी संबंधित अडचणी दूर करण्यासाठी राज्य व केंद्र शासनाशी समन्वय साधला जाणार असल्याची माहिती देताना, “पवना नदी ही शहराची जीवनवाहिनी असून तिचे पुनरुज्जीवन हे प्राधान्याचे काम आहे,” असे स्पष्ट करण्यात आले. बैठकीत चिंचवड मतदारसंघाचा सर्वांगीण विकास अधिक वेगाने व्हावा, वाहतूक कोंडीवर नियंत्रण मिळावे आणि नागरिकांना उत्तम नागरी सुविधा उपलब्ध व्हाव्यात यासाठी प्रशासनाने सातत्याने काम करण्याचे निर्देश देण्यात आले.

Web Title: Pcmc commissioner shravan hardikar take meeting for develeopment and pawana river project

Get Latest  Marathi News ,  Maharashtra News and  Marathi News from Politics,  Election News ,  Sports News ,  Entertainment News,  Business News and   Religion News  only on Navarashtra.com