Aaple Sarkar Seva Kendra: पुणे जिल्ह्यात १,३७२ नवीन ‘आपले सरकार’ केंद्रांना मंजुरी; अर्ज करण्याची आज अंतिम मुदत!

Aaple Sarkar Seva Kendra: जिल्ह्यात यापूर्वी २०२२ मध्ये नवीन केंद्रांसाठी प्रक्रिया राबविण्यात आली होती. त्यानंतर सलग चार वर्षे नवीन केंद्रांना मंजुरी न मिळाल्याने स्थानिक नागरिक व लोकप्रतिनिधींकडून सातत्याने पाठपुरावा केला जात होता.

• पुणे जिल्ह्यातील ग्रामीण भागात १,३७२ नवीन ‘आपले सरकार’ सेवा केंद्रांना मंजुरी.
• केंद्रचालक निवडीसाठी अर्ज सादर करण्याची आज (३१ ऑगस्ट) अंतिम मुदत.
• शासकीय दाखले, प्रमाणपत्रे आणि योजनांचा लाभ आता थेट गावातच मिळणार.

Aaple Sarkar Seva Kendra: विविध शासकीय दाखले, प्रमाणपत्रे आणि कल्याणकारी योजनांच्या लाभासाठी ग्रामीण भागातील नागरिकांना तालुक्याच्या किंवा शासकीय कार्यालयांचे खेटा मारावे लागू नयेत, यासाठी पुणे जिल्ह्यात ‘आपले सरकार सेवा केंद्रांचे मोठे जाळे उभारण्यात येत आहे. जिल्हा प्रशासनाने ग्रामीण भागात नव्याने १ हजार ३७२ केंद्रे सुरू करण्यास मंजुरी दिली असून, केंद्रचालक निवडीसाठी आज (३१ ऑगस्ट) अर्ज करण्याचा शेवटचा दिवस आहे. (Maharashtra Government)

गेल्या काही वर्षांत ग्रामीण भागातील लोकसंख्येत मोठी वाढ झाल्याने गावागावांत शासकीय ऑनलाईन सेवांची मागणी वाढली होती. जिल्ह्यात यापूर्वी २०२२ मध्ये नवीन केंद्रांसाठी प्रक्रिया राबविण्यात आली होती. त्यानंतर सलग चार वर्षे नवीन केंद्रांना मंजुरी न मिळाल्याने स्थानिक नागरिक व लोकप्रतिनिधींकडून सातत्याने पाठपुरावा केला जात होता. याची दखल घेत राज्य शासनाने ग्रामीण भागात १ हजार ३७२ नवीन केंद्रांना हिरवा कंदील दाखवला आहे.

‘आमच्या नादात लागू नका’, मनसे नेते राजू पाटील यांचा भाजप कल्याण जिल्हाध्यक्ष नंदू परब यांना थेट इशारा

शासकीय अटी शिथिल; स्थानिकांना मिळणार रोजगाराची मोठी संधी

यापूर्वी ‘आपले सरकार केंद्र मिळविण्यासाठी असलेल्या काही किचकट अटी व शर्ती शिथिल करण्यात आल्या आहेत. प्रत्येक गावात शासकीय सेवा उपलब्ध व्हाव्यात आणि स्थानिक तरुणांना स्वयंरोजगाराची संधी मिळावी, या उद्देशाने नियमावली अधिक सुलभ करण्यात आली आहे. या केंद्रांसाठी अर्ज प्रक्रिया पूर्णपणे विनामूल्य ठेवण्यात आली आहे.

१०० गुणांच्या मूल्यांकनातून होणार निवड

केंद्रचालकांच्या निवडीसाठी पारदर्शक पद्धत अवलंबण्यात येणार असून १०० गुणांचे मूल्यमापन निश्चित केले आहे. यामध्ये शैक्षणिक पात्रता, संगणक व डिजिटल साक्षरता, कार्यालयासाठी उपलब्ध पायाभूत सुविधा, आर्थिक क्षमता, पूर्वानुभव, व्यवसाय आराखडा, स्थानिक उद्योजकता आणि चारित्र्य पडताळणी या निकषांवर आधारित गुणांकन केले जाईल. मुलाखतीनंतर सर्वाधिक गुण मिळवणाऱ्या पात्र उमेदवारांना केंद्राचे वाटप केले जाईल. ग्रामीण भागातील निवड प्रक्रिया सुरळीत पार पडल्यानंतर पुणे शहरातील ‘आपले सरकार केंद्रांसाठी स्वतंत्र जाहिरात प्रसिद्ध केली जाणार असल्याची माहिती प्रशासनाने दिली आहे.

रुग्णालयांची दर सहा महिन्यांनी सुरक्षा तपासणी! आगीचा धोका; अनेक ठिकाणी आढळल्या त्रुटी, अमरावती घटनेनंतर

निवड प्रक्रियेचे संपूर्ण वेळापत्रक

अर्ज स्वीकारण्याची अंतिम मुदतः ३१ ऑगस्ट
अर्जाची छाननी १ ते ११ सप्टेंबर
पात्र उमेदवारांच्या मुलाखतीः १५ ते २४ सप्टेंबर
प्राथमिक निवड यादी प्रसिद्धीः ५ ऑक्टोबर
हरकती व सूचना नोंदविण्याची मुदतः ५ ते ९ ऑक्टोबर
अंतिम निवड यादी: २६ ऑक्टोबर