पुण्यात अभ्यासिकांसाठी नियंत्रण नियमावली हाेणार; नेमकं काय करणार उपाययाेजना?

पुणे शहरातील अनधिकृत अभ्यासिका आणि पेईंग गेस्ट यासाठी महापालिका नियंत्रण नियमावली करणार आहे. परीक्षेसाठी येणारे विद्यार्थी आणि व्यावसायिकांमुळे स्थानिकांना हाेणाऱ्या त्रासामुळे महापालिकेने हे पाऊल उचलले आहे.

• विद्यार्थी आणि व्यावसायिकांमुळे स्थानिकांना त्रास
• पुण्यात अभ्यासिकांसाठी नियंत्रण नियमावली हाेणार
• नेमकं काय करणार उपाययाेजना?

पुणे : पुणे शहरातील अनधिकृत अभ्यासिका आणि पेईंग गेस्ट यासाठी महापालिका नियंत्रण नियमावली करणार आहे. परीक्षेसाठी येणारे विद्यार्थी आणि व्यावसायिकांमुळे स्थानिकांना हाेणाऱ्या त्रासामुळे महापालिकेने हे पाऊल उचलले आहे. सर्वेक्षण करणे, पथारी, हातगाडी व्यावसाियकांवर कारवाई करणे, मिळकत कर विभाग आणि बांधकाम विभागामार्फतही कारवाई करण्याचा निर्णय घेण्यात आला आहे.

पुण्यात राज्यभरातून स्पर्धा परीक्षेचा अभ्यास करण्यासाठी विद्यार्थी शहरात राहत आहेत. स्पर्धा परीक्षांच्या तयारीसाठी अनेक क्लासेस तसेच अभ्यासिकांची संख्या शहरात वाढत आहे. त्यामुळे अनधिकृत पथारी, स्टाॅलधारक व्यावसायिकायांची संख्या वाढून अतिक्रमणात भर पडली आहे. याचा त्रास स्थानिक पुणेकरांना हाेऊ लागला आहे. यासंदर्भात आलेल्या तक्रारींची दखल घेत पृथ्वीराज बी पी यांच्या अध्यक्षतेखाली बैठक घेण्यात आली. या बैठकीत अनधिकृत अभ्यासिका आणि पेईंग गेस्ट यांच्यासाठी नियंत्रण नियमावली करण्याचे ठरले. तसेच इतर काही निर्णय घेण्यात आले.

या बैठकीस अतिक्रमण/अनधिकृत बांधकाम निर्मूलन विभागाचे प्रमुख सोमनाथ बनकर, परिमंडळ क्र. ०५ उपायुक्त निखील मोरे, कसबा-विश्रामबागवाडा सहाय्यक आयुक्त प्रदिप आव्हाड, कार्यकारी अभियंता सुरेंद्र कर्पे, मुख्य सुरक्षा अधिकारी रमेश शेलार, कर आकारणी व कर संकलन विभागाचे अधिकारी, राष्ट्रवादी क्रॉंग्रेस पक्षाचे प्रतिनिधी राहुल देखणे आदी उपस्थित होते. बैठकीत स्पर्धा परीक्षांच्या विद्यार्थ्यांमुळे होणाऱ्या त्रासाबाबत चर्चा झाली.

शहरात साडे सातशेहून अधिक अभ्यासिका उभारण्यात आल्या आहेत. नवी पेठेतील अभ्यासिकेला आग लागल्याची घटना काही दिवसांपूर्वी घडली होती. त्यानंतर विद्यार्थ्यांच्या सुरक्षिततेचा मुद्दा समोर आला होता. त्यावर महापालिकने शहरातील अभ्यासिकांचे सर्वेक्षण केले होते. त्याचा अहवाल तात्कालीन महापालिका आयुक्त डॉ. राजेंद्र भोसले यांना सादर करण्यात आला होता. तसेच अग्नीशमन दलाकडूनही अभ्यासिंकाचे फायर ऑडिट पूर्ण केले जाणार होते. मात्र यावर पुढे कार्यवाही करण्यास प्रशासनाने उदासीनता दाखविली.

पुणे शहरातील मुख्य भागात, पेठांमध्ये विद्यार्थ्यांसाठी हॉस्टेल मोठ्या प्रमाणात उभारण्यात आले आहेत. तसेच खानावळी, हॉटेल व्यावसायिकांचे जाळे मोठ्या प्रमाणात विस्तारलले आहे. तर ठिकठिकाणी खाऊ गल्ल्या उभारण्यात आल्या आहेत. त्यामुळे रस्त्यांवर गर्दी मोठ्या प्रमाणात असते. याचा त्रास अनेक वर्षांपासून स्थानिक नागरिकांना सहन करावा लागत आहे. महापालिकेला कर भरुन देखील सुविधा मिळत नाहीत. तसेच बाहेरुन आलेल्यांचा त्रास का सहन करावा, अशा तक्रारी महापालिकेकडे आल्या आहेत. यासंदर्भात कारवाई करण्यासाठी पुढील १० ते १५ दिवसात पोलिस अधिकारी यांच्यासोबत संयुक्त बैठकीचे नियोजन करण्यात येणार आहे. याबाबतची आढावा बैठक पुन्हा १७ डिसेंबर रोजी घेतली जाणार आहे.

काय करणार उपाययाेजना?

• पार्किंगमधील अनधिकृत अभ्यासिकांवर ७ दिवसांमध्ये कारवाई करण्यात येणार असून, हे काम बांधकाम विकास विभाग करणार आहे.
• अभ्यासिका, पेंईंग गेस्ट यांच्याबाबत नियंत्रण नियमावली तयार करण्यात येणार आहे.
• अनधिकृत अभ्यासिका, पेंईंग गेस्ट यांचे सर्वेक्षण बांधकाम विकास विभागाकडून केले जाणार आहे.
• अभ्यासिका जवळील अनधिकृत पथारी तसेच हातगाड्या यांच्यावर रात्रीच्या वेळी कारवाई केली जाणार.
• कर आकारणी व कर संकलन विभागाकडील पेठ निरीक्षक यांचेमार्फत अभ्यासिका, पेंईंग गेस्ट यांचे सर्वेक्षण करणे.

महापालिकेने गेल्या वर्षी केलेल्या सर्वेक्षणात अभ्यासिकांमध्ये आगविरोधी यंत्रणांचा अभाव असल्याचे निदर्शनास आले होते. दरम्यान, शहरात अभ्यासिका ७५० पेक्षा जास्त असल्याचे सांगितले होते. प्रत्यक्षात मात्र दोन हजारहून अधिक अभ्यासिका आहेत. पुण्यात सुमारे अडीच ते तीन लाख विद्यार्थी स्पर्धा परीक्षेची तयारी करतात. त्यामुळे पुणे शहराच्या पायाभूत सुविधांवर तणाव येत असल्याची चर्चा केली जात आहे. शहरात पेंईंग गेस्ट, हॉस्टेल याबाबतची पाहणी कर आकारणी विभागाकडून केली जाणार आहे. त्यानुसार कर आकारणी केली जाणार आहे. असे प्रशासनाकडून सांगण्यात येत आहे.