पुणे रेल्वे स्थानकाचा विस्तार होणार; अनेक आवश्यक सोयी-सुविधाही मिळणार
पुणे / चंद्रकांत कांबळे : वाढत्या प्रवासी गर्दीचा विचार करून पुणे रेल्वे स्थानकाच्या विस्तारासाठी नवीन सहा प्लॅटफॉर्म बनवण्याचा निर्णय रेल्वे प्रशासनाकडून घेण्यात आला होता. आता या कामाला गती येताना दिसत आहे. पीएच-५३ अंतर्गत एकूण ४४ कोटी ९ लाख रुपयांच्या विविध कामांना मंजुरी देण्यात आली. यामुळे पुणे स्टेशनवर नव्या आयलंड प्लॅटफॉर्मसह आवश्यक सोयी-सुविधा उभारणीच्या कामाला गती येताना दिसून येत आहे.
या योजनेत प्लॅटफॉर्म क्रमांक ७ व ८ साठी १० कोटी ३९ लाख रुपयांचा निधी मंजूर करण्यात आला आहे. या अंतर्गत ६५० मीटर लांबीचा व १० मीटर रुंदीचा आयलंड प्लॅटफॉर्म उभारण्यात येणार आहे. यामुळे या भागातील गाड्यांची हाताळणी अधिक सुलभ होणार आहे. तसेच प्लॅटफॉर्म क्रमांक ९ व १० साठी १८ कोटी ३८ लाख रुपयांची तरतूद करण्यात आली आहे. या कामामध्ये ७५० मीटर लांबीचा व १२ मीटर रुंदीचा प्लॅटफॉर्म उभारण्याबरोबरच ४०० मीटर सीओपी, दोन स्वच्छतागृह ब्लॉक आणि १० पाणी स्टँड उभारले जाणार आहेत. या सुविधांमुळे प्रवाशांना अधिक आरामदायी सेवा मिळणार आहे.
याशिवाय प्लॅटफॉर्म क्रमांक ११ व १२ साठी १५ कोटी ३२ लाख रुपयांचा निधी मंजूर झाला आहे. या अंतर्गत ६०० मीटर लांबीचा व १३ मीटर रुंदीचा प्लॅटफॉर्म,४०० मीटर सीओपी,दोन स्वच्छतागृह ब्लॉक आणि १० पाणी स्टँड उभारले जाणार आहेत.
कोणत्या प्लॅटफॉर्मसाठी किती पैसे मंजूर?
– प्लॅटफॉर्म क्र. ७ आणि ८ साठी – १० कोटी ३९ लाख रूपये मंजूर
– प्लॅटफॉर्म क्र. ९ आणि १० साठी १८ कोटी ३८ लाख रूपये मंजूर
– प्लॅटफॉर्म क्र. ११ आणि १२ साठी १५ कोटी ३२ लाख रूपये मंजूर
पुणे रेल्वे स्थानकाची एकूण क्षमता वाढणार
या नवीन सहा प्लॅटफॉर्मच्या कामांमुळे पुणे रेल्वे स्थानकाची एकूण क्षमता वाढणार असून, प्रवाशांची वाढती गर्दी हाताळणे अधिक सोपे होणार आहे. तसेच आधुनिक सुविधा उपलब्ध झाल्याने प्रवाशांचा प्रवास अधिक सुरक्षित व सोयीस्कर होणार आहे.
.png "Videos"){kind=small}
