पाटस हद्दीत अष्टविनायक मार्गावर भीषण अपघात; भरधाव कंटेनर थेट नर्सरीत घुसला अन्…

चालकाचे नियंत्रण सुटल्याने कंटेनर रस्ता सोडून थेट पाटस हद्दीतील गार फाटा येथील लडकत यांच्या घरासमोरील नर्सरीत घुसला. सुदैवाने या दुर्घटनेत कोणतीही जीवितहानी झाली नाही. मात्र आर्थिक नुकसान झाले आहे.

पाटस : पाटस-दौंड अष्टविनायक मार्गावर सोमवारी (दि. १७ ऑगस्ट) पहाटे साडेसहाच्या सुमारास भरधाव कंटेनरचा भीषण अपघात झाला आहे. चालकाचे नियंत्रण सुटल्याने कंटेनर रस्ता सोडून थेट पाटस हद्दीतील गार फाटा येथील लडकत यांच्या घरासमोरील नर्सरीत घुसला. सुदैवाने या दुर्घटनेत कोणतीही जीवितहानी झाली नाही. मात्र, नर्सरीतील झाडे, रोपे व साहित्याचे मोठे नुकसान झाल्याने लडकत कुटुंबाचे लाखो रुपयांचे आर्थिक नुकसान झाले आहे.

दौंडच्या दिशेने पाटसकडे भरधाव वेगाने जाणाऱ्या कंटेनरवरील चालकाचे गार फाटा परिसरात अचानक नियंत्रण सुटले. त्यानंतर कंटेनर रस्त्यालगत असलेल्या लडकत यांच्या घरासमोरील झाडे-फुलांच्या नर्सरीत घुसला. पहाटेच्या शांत वातावरणात कंटेनर आदळल्याचा मोठा आवाज झाल्याने परिसरातील नागरिकांमध्ये काही काळ घबराट पसरली.

नागरिकांनी घराबाहेर येऊन पाहिले असता कंटेनर नर्सरीत घुसल्याचे दिसून आले. अपघातावेळी कंटेनरचा वेग मोठा असल्याचे सांगण्यात येत आहे. मात्र, घरासमोरील करंजीचे झाड कंटेनरच्या मार्गात आल्याने त्याचा वेग काही प्रमाणात कमी झाला. त्यामुळे कंटेनर थेट घरात न घुसता नर्सरीच्या आवारातच थांबला. करंजीचे झाड नसते तर कंटेनर थेट घरात घुसून मोठी जीवितहानी होण्याची शक्यता होती, अशी भीती स्थानिक नागरिकांनी व्यक्त केली.

या अपघातात नर्सरीमधील लहान-मोठी रोपे, फुलझाडे तसेच इतर साहित्याची मोठ्या प्रमाणावर मोडतोड झाली. अनेक दिवसांच्या मेहनतीने उभारलेली नर्सरी काही क्षणांत उद्ध्वस्त झाल्याने लडकत कुटुंबावर मोठे आर्थिक संकट ओढवले आहे. घटनेची माहिती मिळताच परिसरातील नागरिकांनी घटनास्थळी मोठी गर्दी केली. या मार्गावरून सातत्याने भरधाव वाहतूक होत असल्याने भविष्यात मोठी दुर्घटना घडण्याची शक्यता व्यक्त होत आहे.

हे सुद्धा वाचा : दोन एसटी बस समोरासमोर धडकल्या, मागून कारही आदळली; रत्नागिरी-पावस मार्गावर विचित्र अपघात, २२ प्रवासी जखमी

वेगावर नियंत्रणाची मागणी

अष्टविनायक मार्गावरील वाढत्या अपघातांच्या पार्श्वभूमीवर भरधाव वाहनांच्या वेगावर नियंत्रण आणण्यासाठी प्रशासनाने तातडीने उपाययोजना कराव्यात, अशी मागणी स्थानिक नागरिकांनी केली आहे. मार्गावरील धोकादायक ठिकाणी स्पीड ब्रेकर बसविणे, सीसीटीव्ही कॅमेरे बसविणे तसेच पोलिसांची गस्त वाढविण्याची मागणी करण्यात आली आहे. प्रशासनाने वेळीच उपाययोजना न केल्यास भविष्यात मोठा अनर्थ होण्याची शक्यता नागरिकांनी व्यक्त केली आहे.